ꠎꠛꠥꠞ ꠡꠞꠤꠚ 96 - Siloṭi Asmani Kitab (Nagri lipi)

ꠀꠟ-ꠎꠛꠥꠞ ৯৬

¹ ꠝꠣꠛꠥꠖꠞ ꠘꠣꠝꠦ ꠘꠄꠀ ꠉꠤꠔ ꠉꠣꠅ, ꠅ ꠢꠣꠞꠣ ꠖꠥꠘꠤꠀ, ꠝꠣꠛꠥꠖꠞ ꠉꠤꠔ ꠉꠣꠅ,

² ꠝꠣꠛꠥꠖꠞ ꠘꠣꠝꠦ ꠉꠤꠔ ꠉꠣꠅ, ꠔꠣꠘ ꠔꠣꠞꠤꠚ ꠇꠞꠅ, ꠖꠤꠘꠦ ꠖꠤꠘꠦ ꠔꠣꠘ ꠖꠦꠅꠀ ꠘꠣꠎꠣꠔꠞ ꠔꠛꠟꠤꠉ ꠇꠞꠅ।

³ ꠢꠇꠟ ꠎꠣꠔꠤꠞꠦ ꠎꠣꠘꠣꠅ ꠔꠣꠘ ꠉꠃꠞꠛꠞ ꠇꠕꠣ, ꠢꠇꠟ ꠝꠣꠘꠡꠞꠦ ꠇꠅ ꠔꠣꠘ ꠇꠥꠖꠞꠔꠤ ꠇꠣꠝꠞ ꠝꠢꠤꠝꠣ।

⁴ ꠝꠣꠛꠥꠖꠃ ꠝꠢꠣꠘ, ꠝꠢꠣ ꠔꠣꠞꠤꠚ ꠔꠣꠘ, ꠢꠇꠟ ꠖꠦꠛ-ꠖꠦꠛꠤ ꠕꠣꠇꠤ ꠛꠠ ꠜꠄꠅꠋꠇꠞ ꠔꠣꠁꠘ,

⁵ ꠎꠣꠔꠤ ꠅꠇꠟꠞ ꠖꠦꠛ-ꠖꠦꠛꠤ ꠔ ꠛꠦꠇꠣꠝꠣ ꠙꠥꠔꠥꠟ ꠈꠣꠟꠤ, ꠝꠣꠛꠥꠖꠦꠃ ꠛꠣꠘꠣꠁꠍꠂꠘ ꠢꠇꠟ ꠀꠍꠝꠣꠘ ꠝꠘ꠆ꠒꠟꠤ।

⁶ ꠡꠣꠘ-ꠡꠃꠇꠔ ꠀꠞ ꠝꠢꠤꠝꠣ ꠔꠣꠘ ꠍꠣꠝꠘꠦ ꠞꠁꠍꠦ, ꠛꠟ-ꠡꠇ꠆ꠔꠤ ꠀꠞ ꠎꠣꠇ-ꠎꠝꠇꠦ ꠔꠣꠘ ꠊꠞ ꠢꠣꠎꠣꠁꠍꠦ।

⁷ ꠅ ꠎꠉꠔꠞ ꠈꠣꠘ꠆ꠖꠣꠘ ꠅꠇꠟ, ꠎꠣꠘꠣꠅ ꠝꠣꠛꠥꠖꠞ ꠉꠥꠘꠉꠣꠘ, ꠉꠃꠞꠛ ꠀꠞ ꠛꠟ-ꠡꠇ꠆ꠔꠤꠞ ꠇꠕꠣ ꠎꠣꠘꠣꠅ ꠔꠣꠘ,

⁸ ꠝꠣꠛꠥꠖꠞ ꠘꠣꠝꠦ ꠔꠣꠘ ꠙꠣꠅꠘꠣ ꠉꠃꠞꠛ ꠎꠣꠘꠣꠅ, ꠟꠤꠟ꠆ꠟꠣ-ꠍꠖꠉꠣ ꠀꠔꠅ ꠟꠁꠀ ꠔꠣꠘ ꠖꠞꠛꠣꠞꠅ ꠢꠣꠝꠣꠅ।

⁹ ꠙꠣꠇ-ꠍꠣꠚ ꠖꠤꠟꠦ ꠝꠣꠛꠥꠖꠞ ꠍꠣꠝꠘꠦ ꠍꠁꠎꠖꠣꠔ ꠙꠠꠅ, ꠢꠣꠞꠣ ꠖꠥꠘꠤꠀ ꠔꠣꠘ ꠍꠣꠝꠘꠦ ꠕꠞ-ꠕꠞꠣꠁꠀ ꠇꠣꠙꠤꠀ ꠃꠑꠅ।

¹⁰ ꠎꠣꠔꠤ ꠅꠇꠟꠞ ꠝꠣꠎꠦ ꠄꠟꠣꠘ ꠇꠞꠅ, ꠝꠣꠛꠥꠖꠃ ꠛꠣꠖꠡꠣ। ꠎꠉꠔꠞꠦ ꠛꠣꠘꠣꠁꠍꠂꠘ ꠝꠎꠛꠥꠔ, ꠇꠞꠔ ꠘꠣꠄ ꠇꠥꠘꠥ ꠟꠠꠣ-ꠌꠠꠣ, ꠔꠣꠁꠘ ꠘꠤꠌ꠆ꠌꠤꠔ ꠢꠇꠟ ꠎꠣꠔꠤꠞ ꠢꠇ ꠛꠤꠌꠣꠞ ꠇꠞꠛꠣ।

¹¹ ꠀꠍꠝꠣꠘ ꠅꠇꠟ ꠚꠥꠞ꠆ꠔꠤ ꠇꠞꠃꠇ, ꠖꠥꠘꠤꠀ ꠈꠥꠡꠤ ꠅꠃꠇ, ꠖꠞꠤꠀ ꠀꠞ ꠔꠣꠞ ꠝꠣꠎꠞ ꠡꠛ ꠎꠣꠘꠖꠣꠞ ꠉꠞ꠆ꠎꠤꠀ ꠃꠑꠃꠇ,

¹² ꠎꠝꠤꠘ ꠀꠞ ꠄꠞ ꠢꠇ꠆ꠇꠟꠔꠣ ꠈꠥꠡꠤ-ꠛꠣꠡꠤ ꠇꠞꠃꠇ, ꠛꠘ-ꠛꠣꠉꠣꠘꠞ ꠡꠛ ꠉꠣꠍ-ꠙꠣꠟꠣꠅ ꠀꠘꠘ꠆ꠖ-ꠃꠟ꠆ꠟꠣꠡ ꠇꠞꠃꠇ।

¹³ ꠝꠣꠛꠥꠖꠞ ꠍꠣꠝꠘꠦ ꠅꠟꠣꠃ ꠇꠞꠃꠇ ꠁꠔꠣ ꠢꠇꠟꠔꠣ, ꠔꠣꠁꠘ ꠔ ꠀꠁꠞꠣ ꠖꠥꠘꠤꠀꠞ ꠛꠤꠌꠣꠞ ꠇꠞꠔꠣ। ꠎꠉꠔꠞ ꠛꠤꠌꠣꠞ-ꠚꠄꠍꠣꠟꠣ ꠇꠞꠛꠣ ꠢꠇ-ꠁꠘꠍꠣꠚꠦ, ꠔꠣꠝꠣꠝ ꠎꠣꠔꠤꠞ ꠛꠤꠌꠣꠞ-ꠚꠄꠍꠣꠟꠣ ꠇꠞꠛꠣ ꠢꠇ-ꠢꠣꠟꠣꠟꠤꠄ॥