ꠎꠛꠥꠞ ꠡꠞꠤꠚ 95 - Siloṭi Asmani Kitab (Nagri lipi)ꠀꠟ-ꠎꠛꠥꠞ ৯৫ 1 ꠀꠅ ꠀꠝꠞꠣ ꠈꠥꠡꠤꠞ ꠉꠎꠟ ꠉꠣꠁ ꠝꠣꠛꠥꠖꠞ ꠘꠣꠝꠦ, ꠞꠇ꠆ꠇꠣꠇꠣꠞꠤ ꠐꠤꠟ꠆ꠟꠣ ꠔꠣꠁꠘ, ꠚꠥꠞ꠆ꠔꠤ ꠇꠞꠤ ꠎꠥꠞꠦ ꠎꠥꠞꠦ। 2 ꠌꠟꠅ ꠀꠝꠞꠣ ꠡꠥꠇꠥꠞ-ꠉꠥꠎꠣꠞ ꠇꠞꠤ ꠇꠞꠤ ꠔꠣꠘ ꠍꠣꠝꠘꠦ ꠎꠣꠁ, ꠛꠣꠎꠘꠣꠞ ꠔꠣꠟꠦ ꠔꠣꠟꠦ ꠔꠣꠘ ꠘꠣꠝꠦ ꠎꠥꠞꠦ-ꠡꠥꠞꠦ ꠉꠣꠁ। 3 ꠝꠣꠛꠥꠖꠃ ꠔ ꠃꠙꠞꠀꠟꠣ, ꠡꠞ꠆ꠛ ꠝꠢꠣꠘ ꠀꠟ꠆ꠟꠣꠔꠣꠟꠣ, ꠖꠥꠁ ꠎꠣꠢꠣꠘꠞ ꠛꠟ-ꠡꠇ꠆ꠔꠤꠞ ꠔꠣꠁꠘꠃ ꠛꠠ ꠛꠣꠖꠡꠣ। 4 ꠎꠝꠤꠘ ꠀꠞ ꠙꠣꠔꠣꠟ ꠡꠛꠃ ꠔꠣꠘ ꠀꠔꠅ, ꠙꠣꠠ-ꠙꠞꠛꠔꠞ ꠃꠌꠣ ꠐꠤꠟ꠆ꠟꠣꠅ ꠔꠣꠘꠃ ꠔ। 5 ꠔꠣꠁꠘꠃ ꠖꠞꠤꠀꠞ ꠝꠣꠟꠤꠇ ꠛꠣꠘꠣꠁꠍꠂꠘ ꠁꠔꠣ, ꠢꠥꠇꠘꠣ ꠎꠝꠤꠘꠅ ꠔꠣꠘ ꠖꠥꠁꠅ ꠀꠔꠦ ꠉꠠꠣ। 6 ꠀꠅ ꠀꠝꠞꠣ ꠍꠁꠎꠖꠣ ꠖꠤꠀ ꠔꠣꠘ ꠄꠛꠣꠖꠔ ꠇꠞꠤ, ꠀꠝꠞꠣꠞꠦ ꠙꠄꠖꠣꠇꠣꠞꠤ ꠝꠣꠛꠥꠖꠞ ꠍꠣꠝꠘꠦ ꠘꠔꠎꠣꠘꠥ ꠛꠘꠤ। 7 ꠔꠣꠁꠘꠃ ꠔ ꠀꠝꠞꠣꠞ ꠀꠟ꠆ꠟꠣꠔꠣꠟꠣ, ꠀꠝꠞꠣ ꠔꠣꠘ ꠝꠦꠠꠣꠞ ꠙꠣꠟ, ꠔꠣꠘ ꠎꠝꠤꠘꠞ ꠛꠘ꠆ꠖꠣ। ꠀꠢ! ꠔꠣꠘ ꠉꠟꠣꠞ ꠀꠅꠀꠎ ꠎꠥꠖꠤ ꠢꠥꠘꠔꠣꠄ ꠔꠥꠝꠞꠣ! 8 ꠖꠤꠟꠞꠦ ꠙꠣꠡꠣꠘ ꠇꠞꠤꠅ ꠘꠣ ꠔꠥꠝꠞꠣ ꠎꠦꠟꠣ ꠇꠞꠍꠟꠣꠄ ꠝꠦꠞꠤꠛꠣꠔ, ꠢꠃ ꠖꠤꠘ ꠇꠞꠍꠟꠣꠄ ꠎꠦꠔꠣ ꠝꠞꠥꠜꠥꠝꠤꠞ ꠝꠣꠍꠣ ꠘꠣꠝꠞ ꠎꠣꠉꠣꠔ। 9 ꠔꠥꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠢꠘꠅ ꠔ ꠖꠦꠈꠍꠤꠟ ꠝꠞꠦ ꠀꠎꠝꠣꠁꠀ, ꠀꠝꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠤꠀꠅ ꠔꠣꠞꠣ ꠇꠞꠟꠣ ꠝꠞꠦ ꠙꠞꠤꠇ꠆ꠇꠣ। 10 ꠢꠃ ꠎꠝꠣꠘꠣꠞ ꠝꠣꠘꠡꠞ ꠎꠣꠟꠣ ꠡꠁꠟꠣꠝ ꠀꠝꠤ ꠌꠣꠟ꠆ꠟꠤꠡ ꠛꠍꠞ ꠗꠞꠤꠀ, ꠢꠦꠡꠦ ꠇꠁꠟꠣꠝ, ꠁꠔꠣꠞ ꠖꠤꠟ ꠔ ꠛꠦ-ꠙꠕꠤ ꠀꠝꠣꠞ ꠙꠕꠞꠦ ꠌꠤꠘꠟ ꠘꠣ, 11 ꠔꠦꠃꠉꠤ ꠀꠝꠣꠞ ꠉꠥꠍꠣꠞ ꠌꠥꠐꠦ ꠇꠁꠟꠣꠝ ꠇꠍꠝ ꠇꠞꠤꠀ, ꠝꠞ ꠖꠦꠅꠀ ꠀꠞꠣꠝꠞ ꠖꠦꠡꠅ ꠢꠣꠝꠣꠘꠤꠞ ꠡꠥꠎꠥꠉ ꠙꠣꠁꠔ ꠘꠣꠄ ꠔꠣꠞꠣ॥ |
© Ahle Kitab Society. All rights reserved.