ꠔꠃꠞꠣꠔ ৪: ꠡꠥꠝꠣꠞꠤ 17 - Siloṭi Asmani Kitab (Nagri lipi)ꠢꠎꠞꠔ ꠢꠣꠞꠥꠘ (ꠀ꠩) ꠅꠞ ꠟꠣꠑꠤꠔ ꠚꠥꠟ 1 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠣꠞꠣ ꠎꠣꠘꠥ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠢꠤꠡꠣꠛꠦ ꠙꠞꠔꠦꠇ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞꠞ ꠉꠦꠍ ꠕꠣꠇꠤ ꠄꠇꠐꠣ ꠇꠞꠤ ꠝꠥꠐ ꠛꠣꠞꠅꠐꠣ ꠟꠣꠑꠤ ꠀꠘꠤꠀ ꠔꠥꠝꠣꠞ ꠉꠦꠍꠦ ꠖꠦꠄ। ꠖꠤꠟꠦ ꠔꠥꠝꠤ ꠎꠣꠞꠎꠤꠞ ꠟꠣꠑꠤꠞ ꠃꠙꠞꠦ ꠅꠃ ꠎꠘꠞ ꠘꠣꠝ ꠟꠦꠈꠛꠣꠄ। 3 ꠟꠦꠛꠤ ꠈꠣꠘ꠆ꠖꠣꠘꠞ ꠟꠣꠑꠤꠔ ꠟꠦꠈꠤꠅ ꠁꠝꠣꠝ ꠢꠣꠞꠥꠘꠞ ꠘꠣꠝ, ꠅꠟꠣ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠝꠣꠚꠤꠇ ꠙꠞꠔꠦꠇ ꠈꠣꠘ꠆ꠖꠣꠘꠞ ꠡꠞ꠆ꠖꠣꠞꠞ ꠟꠣꠉꠤ ꠄꠇꠅꠐꠣ ꠟꠣꠑꠤ ꠕꠣꠇꠛ। 4 ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠙꠛꠤꠔ꠆ꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠎꠦ ꠎꠣꠉꠣꠔ ꠔꠥꠝꠞꠣꠞ ꠟꠉꠦ ꠀꠝꠣꠞ ꠖꠦꠈꠣ ꠅꠄ, ꠅꠃ ꠟꠣꠑꠤꠉꠥꠁꠘ ꠢꠘꠅ ꠕꠁꠅ। 5 ꠔꠦꠃ ꠀꠝꠣꠞ ꠙꠍꠘ꠆ꠖ ꠇꠞꠣ ꠛꠘ꠆ꠖꠣꠞ ꠟꠣꠑꠤꠞ ꠝꠣꠎꠦ ꠉꠣꠍꠞ ꠈꠦꠋ ꠚꠥꠐꠤꠛ। ꠅꠃ ꠟꠣꠈꠣꠘ ꠔꠥꠝꠞꠣꠞ ꠛꠤꠞꠥꠖ꠆ꠖꠦ ꠛꠘꠤ ꠁꠍꠞꠣꠁꠟꠞ ꠛꠦꠞ-ꠛꠦꠞꠤ ꠇꠞꠣ ꠀꠝꠤ ꠛꠘ꠆ꠖ ꠇꠞꠝꠥ।” 6 ꠔꠦꠃ ꠝꠥꠍꠣꠄ ꠁꠔꠣ ꠢꠇꠟꠔꠣ ꠛꠘꠤ ꠁꠍꠞꠣꠁꠟꠞꠦ ꠎꠣꠘꠣꠁꠟꠣ। ꠀꠞ ꠔꠣꠞꠣꠞ ꠛꠣꠚ-ꠖꠣꠖꠣꠞ ꠈꠣꠘ꠆ꠖꠣꠘ ꠝꠣꠚꠤꠇ ꠙꠞꠔꠦꠇ ꠡꠞ꠆ꠖꠣꠞꠦ ꠎꠣꠞꠎꠤꠞ ꠈꠣꠘ꠆ꠖꠣꠘꠞ ꠔꠞꠚ ꠕꠣꠇꠤ ꠄꠉꠥ ꠇꠞꠤ, ꠝꠥꠐ ꠛꠣꠞꠅ ꠈꠣꠘ꠆ꠖꠣꠘꠞ ꠛꠣꠞꠅꠐꠣ ꠟꠣꠑꠤ ꠀꠘꠤꠀ ꠖꠤꠟꠣ। ꠅꠃ ꠟꠣꠑꠤꠘ꠆ꠔꠞ ꠄꠉꠥ ꠟꠣꠑꠤ ꠀꠍꠤꠟ ꠢꠣꠞꠥꠘ ꠘꠛꠤꠞ। 7 ꠝꠥꠍꠣꠄ ꠅꠃ ꠟꠣꠑꠤꠉꠥꠁꠘ ꠘꠤꠀ ꠡꠣꠢꠣꠖꠔ ꠔꠣꠝ꠆ꠛꠥꠞ ꠜꠤꠔꠞꠦ ꠝꠣꠛꠥꠖꠞ ꠍꠣꠝꠘꠦ ꠕꠁꠟꠣ। 8 ꠛꠣꠖꠞ ꠖꠤꠘ ꠝꠥꠍꠣ ꠉꠤꠀ ꠡꠣꠢꠣꠖꠔ ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠁꠀ ꠖꠦꠈꠂꠘ, ꠟꠦꠛꠤ ꠈꠣꠘ꠆ꠖꠣꠘ ꠕꠣꠇꠤ ꠢꠣꠞꠥꠘꠞ ꠘꠣꠝꠦ ꠎꠦ ꠟꠣꠑꠤ ꠞꠣꠈꠣ ꠅꠁꠍꠦ, ꠁ ꠟꠣꠑꠤꠔ ꠈꠣꠟꠤ ꠈꠦꠋ ꠘꠣꠄ, ꠇꠥꠠꠤ ꠖꠤꠀ ꠚꠥꠟ ꠚꠥꠐꠤꠀ ꠛꠣꠖꠣꠝꠅ ꠗꠞꠤꠟꠤꠍꠦ। 9 ꠔꠦꠃ ꠝꠥꠍꠣꠄ ꠝꠣꠛꠥꠖꠞ ꠍꠣꠝꠘꠦ ꠕꠣꠇꠤ ꠟꠣꠑꠤ ꠉꠥꠁꠘ ꠛꠣꠞ ꠇꠞꠤ ꠀꠘꠤꠀ ꠛꠘꠤ ꠁꠍꠞꠣꠁꠟꠞ ꠍꠣꠝꠘꠦ ꠕꠁꠟꠣ। ꠡꠞ꠆ꠖꠣꠞ ꠅꠇꠟꠦ ꠟꠣꠑꠤ ꠉꠥꠁꠘ ꠖꠦꠈꠟꠣ, ꠖꠦꠈꠤꠀ ꠎꠣꠞꠎꠤꠞ ꠟꠣꠑꠤ ꠌꠤꠘꠤꠀ ꠘꠤꠟꠣ। 10 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, “ꠛꠤꠞꠥꠗꠤ ꠘꠣꠚꠞꠝꠣꠘ ꠅꠇꠟꠞ ꠝꠘꠅ ꠞꠅꠀꠞ ꠟꠣꠉꠤ ꠘꠤꠡꠣꠘꠣ ꠢꠤꠡꠣꠛꠦ ꠔꠥꠝꠤ ꠢꠣꠞꠥꠘꠞ ꠟꠣꠑꠤꠐꠣ ꠢꠤꠞꠛꠣꠞ ꠡꠣꠢꠣꠖꠔ ꠡꠘ꠆ꠖꠥꠇꠞ ꠍꠣꠝꠘꠦ ꠕꠅ। ꠔꠦꠃ ꠀꠝꠣꠞ ꠛꠤꠞꠥꠖ꠆ꠖꠦ ꠔꠣꠞꠣꠞ ꠛꠇꠛꠇ ꠇꠞꠣ ꠈꠣꠘ ꠔꠥꠝꠤ ꠛꠘ꠆ꠖ ꠇꠞꠔꠣꠄ ꠙꠣꠞꠛꠣꠄ, ꠔꠣꠞꠣꠅ ꠀꠞ ꠝꠞꠔꠣ ꠘꠣꠄ।” 11 ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠟꠣ, ꠝꠥꠍꠣꠄ ꠑꠤꠇ ꠅꠟꠣ ꠇꠞꠟꠣ। 12 ꠁꠔꠣ ꠖꠦꠈꠤꠀ ꠛꠘꠤ ꠁꠍꠞꠣꠁꠟꠦ ꠝꠥꠍꠣꠞꠦ ꠇꠁꠟꠣ, “ꠀꠝꠞꠣ ꠔ ꠝꠞꠤꠎꠣꠁꠀꠞ, ꠛꠤꠘꠣꠡ ꠅꠁꠎꠤꠀꠞ, ꠀꠝꠞꠣꠞ ꠡꠞ꠆ꠛꠘꠣꠡ ꠅꠁꠎꠣꠞ! 13 ꠎꠦꠇꠥꠘꠥ ꠝꠣꠘꠥꠡ ꠝꠣꠛꠥꠖꠞ ꠊꠞꠞ ꠗꠣꠞꠅ ꠉꠦꠟꠦꠃ ꠝꠞꠤꠎꠣꠞ, ꠔꠦ ꠀꠝꠞꠣ ꠢꠇꠟꠃ ꠝꠞꠤꠎꠤꠝꠥ ꠘꠤ?” |
© Ahle Kitab Society. All rights reserved.