ꠔꠃꠞꠣꠔ ৩: ꠟꠦꠛꠤꠀꠘ 22 - Siloṭi Asmani Kitab (Nagri lipi)ꠁꠝꠣꠝ ꠅꠇꠟꠦ ꠟꠤꠟ꠆ꠟꠣ-ꠇꠥꠞꠛꠣꠘꠤ ꠈꠣꠅꠀꠞ ꠘꠤꠅꠝ 1 ꠄꠞꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2 “ꠔꠥꠝꠤ ꠁꠝꠣꠝ ꠢꠣꠞꠥꠘ ꠀꠞ ꠔꠣꠞ ꠙꠥꠀꠂꠘ꠆ꠔꠞꠦ ꠇꠅ, ꠛꠘꠤ ꠁꠍꠞꠣꠁꠟꠦ ꠀꠝꠣꠞ ꠘꠣꠝꠦ ꠟꠤꠟ꠆ꠟꠣ ꠀꠞ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠎꠔꠔꠣ ꠀꠘꠂꠘ, ꠁꠔꠣ ꠔ ꠙꠛꠤꠔ꠆ꠞ। ꠄꠞꠟꠣꠉꠤ ꠅꠔꠣ ꠢꠇ꠆ꠇꠟꠔꠣꠞꠦ ꠁꠝꠣꠝ ꠅꠇꠟꠦ ꠁꠎ꠆ꠎꠔ-ꠔꠣꠎꠤꠝ ꠇꠞꠣ ꠎꠞꠥꠞ। ꠁ ꠛꠦꠙꠣꠞꠦ ꠔꠣꠞꠣ ꠎꠣꠘꠥ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠘꠣ ꠇꠞꠦ। ꠀꠝꠤꠃ ꠔ ꠝꠣꠛꠥꠖ। 3 “ꠔꠥꠝꠤ ꠔꠣꠞꠣꠞꠦ ꠎꠣꠘꠣꠁ ꠖꠦꠅ, ꠔꠣꠞꠣꠞ ꠀꠅꠟꠣꠖꠞ ꠝꠣꠎꠞ ꠇꠦꠃ ꠎꠥꠖꠤ ꠘꠣꠙꠣꠇ ꠢꠣꠟꠔꠦ ꠝꠣꠛꠥꠖꠞ ꠘꠣꠝꠦ ꠖꠦꠅꠀ ꠇꠥꠞꠛꠣꠘꠤꠞ ꠇꠥꠘꠥ ꠎꠤꠘꠤꠡꠞ ꠇꠣꠘ꠆ꠖꠣꠔ ꠎꠣꠄ, ꠔꠦ ꠔꠣꠞꠦ ꠀꠝꠣꠞ ꠍꠣꠝꠘ ꠕꠣꠇꠤ ꠢꠞꠣꠁꠟꠤꠛꠣꠄ। ꠀꠝꠤꠃ ꠔ ꠝꠣꠛꠥꠖ। 4 ꠢꠣꠞꠥꠘꠞ ꠀꠅꠟꠣꠖ ꠅꠇꠟꠞ ꠝꠣꠎꠦ ꠇꠦꠃ ꠎꠥꠖꠤ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠛꠣ ꠗꠣꠔꠥ ꠎꠣꠅꠀ ꠛꠦꠝꠣꠞꠤ ꠅꠄ, ꠔꠦ ꠙꠣꠇ-ꠍꠣꠚ ꠘꠣ ꠅꠀ ꠙꠞ꠆ꠎꠘ꠆ꠔ ꠢꠦ ꠇꠥꠞꠛꠣꠘꠤꠞ ꠇꠥꠘꠥꠔꠣ ꠈꠣꠅꠀ ꠘꠣꠎꠣꠁꠎ। ꠀꠞ ꠝꠞꠣ ꠟꠣꠡꠞꠦ ꠛꠣ ꠅꠃ ꠟꠣꠡꠞ ꠟꠣꠉꠤ ꠎꠦꠔꠣ ꠇꠣꠝꠅ ꠟꠣꠉꠣꠁꠟ ꠅꠁꠍꠦ ꠁꠔꠣ ꠇꠥꠘꠥꠔꠣ ꠍꠁꠀ ꠎꠥꠖꠤ ꠇꠦꠃ ꠘꠣꠙꠣꠇ ꠛꠘꠦ, ꠛꠣ ꠇꠦꠃꠞꠞ ꠎꠃꠛꠘꠞ ꠙꠣꠘꠤ ꠛꠣꠞ ꠅꠄ, 5 ꠀꠞ ꠎꠦ ꠎꠘ ꠇꠥꠘꠥꠎꠣꠔ ꠝꠣꠐꠤꠔ ꠌꠟꠞꠣ ꠢꠥꠞꠥ-ꠝꠥꠞꠥ ꠘꠣꠙꠣꠇ ꠎꠣꠘꠖꠣꠞ ꠛꠣ ꠎꠦꠇꠥꠘꠥ ꠇꠣꠞꠘꠦ ꠘꠣꠙꠣꠇ ꠅꠀ ꠇꠥꠘꠥ ꠝꠣꠘꠡꠞꠦ ꠍꠁꠀ ꠢꠦ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠄ, 6 ꠔꠦ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠢꠦ ꠘꠣꠙꠣꠇ ꠢꠣꠟꠔꠦꠃ ꠞꠁꠛ, ꠀꠞ ꠙꠣꠘꠤꠖꠤ ꠘꠣꠁꠀ ꠢꠣꠞꠤ ꠙꠣꠇ-ꠍꠣꠚ ꠘꠣ ꠅꠀ ꠙꠞ꠆ꠎꠘ꠆ꠔ ꠇꠥꠞꠛꠣꠘꠤꠞ ꠇꠥꠘꠥ ꠙꠛꠤꠔ꠆ꠞ ꠎꠤꠘꠤꠡ ꠈꠣꠅꠀ ꠔꠣꠞ ꠟꠣꠉꠤ ꠢꠣꠞꠣꠝ। 7 ꠛꠣꠖꠦ ꠡꠥꠞꠥꠎ ꠒꠥꠛꠤꠀ ꠢꠣꠞꠟꠦ ꠢꠦ ꠎꠦꠛꠟꠣ ꠙꠣꠇ-ꠍꠣꠚ ꠅꠁꠛ, ꠅꠃ ꠡꠝꠄ ꠢꠦ ꠁꠔꠣ ꠈꠣꠁꠔ ꠙꠣꠞꠛ। ꠁꠔꠣ ꠔ ꠔꠣꠞꠃ ꠈꠣꠘꠤ। 8 ꠁꠝꠣꠝꠦ ꠇꠥꠘꠥ ꠝꠞꠣ ꠙꠡꠥ ꠛꠣ ꠎꠋꠟꠤ ꠎꠣꠘꠥꠀꠞꠞ ꠕꠣꠛꠣꠄ ꠝꠣꠞꠣ ꠇꠥꠘꠥ ꠙꠡꠥꠞ ꠉꠥꠡ꠆ꠔ ꠈꠣꠁꠀ ꠘꠤꠎꠞꠦ ꠘꠣꠙꠣꠇ ꠛꠣꠘꠣꠁꠅ ꠘꠣ। ꠀꠝꠤꠃ ꠔ ꠝꠣꠛꠥꠖ। 9 “ꠁꠝꠣꠝ ꠅꠇꠟꠞ ꠛꠦꠙꠣꠞꠦ ꠀꠝꠤ ꠎꠦꠔꠣ ꠀꠁꠘ-ꠇꠣꠘꠥꠘ ꠖꠤꠍꠤ, ꠁꠔꠣ ꠔꠣꠞꠣ ꠝꠣꠘꠤꠀ ꠌꠟꠃꠇ। ꠀꠞꠘꠣꠄ ꠖꠥꠡꠤ ꠛꠘꠛꠣꠄ ꠀꠞ ꠘꠣꠙꠣꠇꠤꠞ ꠖꠞꠥꠘ ꠔꠣꠞꠣꠞ ꠝꠞꠘ ꠅꠁꠛ। ꠝꠘꠅ ꠞꠣꠈꠤꠅ, ꠀꠝꠤ ꠝꠣꠛꠥꠖꠦꠃ ꠔꠣꠞꠣꠞꠦ ꠙꠛꠤꠔ꠆ꠞ ꠇꠞꠤ। 10 “ꠁꠝꠣꠝ ꠙꠞꠤꠛꠣꠞꠞ ꠝꠣꠘꠥꠡ ꠍꠣꠠꠣ ꠖꠥꠍꠞꠣ ꠇꠥꠘꠥ ꠎꠘꠦ ꠇꠥꠞꠛꠣꠘꠤꠞ ꠙꠛꠤꠔ꠆ꠞ ꠎꠤꠘꠤꠡ ꠈꠣꠅꠀ ꠘꠤꠡꠦꠗ। ꠁꠝꠣꠝꠞ ꠇꠥꠘꠥ ꠝꠦꠝꠣꠘ ꠛꠣ ꠇꠣꠝꠟꠣꠄꠅ ꠁꠔꠣ ꠈꠣꠅꠀ ꠢꠣꠞꠣꠝ। 11 ꠅꠁꠟꠦ ꠁꠝꠣꠝꠞ ꠈꠞꠤꠖꠣ ꠉꠥꠟꠣꠝꠦ ꠛꠣ ꠔꠣꠘ ꠛꠣꠠꠤꠔ ꠎꠘꠝꠤꠍꠦ ꠁꠟꠣꠈꠣꠘ ꠉꠥꠟꠣꠝꠦ ꠁꠔꠣ ꠈꠣꠅꠀ ꠎꠣꠁꠎ। 12 ꠁꠝꠣꠝꠞ ꠙꠥꠠꠤ ꠎꠥꠖꠤ ꠀꠞꠇ ꠁꠝꠣꠝ ꠍꠣꠠꠣ ꠛꠣꠁꠞꠣ ꠇꠥꠘꠥ ꠖꠣꠝꠣꠘ꠆ꠖꠞ ꠟꠉꠦ ꠛꠤꠀ-ꠡꠣꠖꠤ ꠅꠄ, ꠔꠦ ꠔꠣꠁꠅ ꠇꠥꠞꠛꠣꠘꠤꠞ ꠅꠃ ꠙꠛꠤꠔ꠆ꠞ ꠎꠤꠘꠤꠡ ꠈꠣꠅꠀ ꠢꠣꠞꠣꠝ। 13 ꠅꠁꠟꠦ ꠁꠝꠣꠝꠞ ꠇꠥꠘꠥ ꠠꠣꠠꠤ ꠙꠥꠠꠤ ꠛꠣ ꠔꠣꠟꠣꠇ ꠙꠣꠅꠀ ꠘꠤꠀꠅꠟꠣꠖꠤ ꠇꠥꠘꠥ ꠙꠥꠠꠤ ꠎꠥꠖꠤ ꠛꠣꠚꠞ ꠛꠣꠠꠤꠔ ꠞꠁꠛꠣꠞ ꠟꠣꠉꠤ ꠢꠤꠞꠛꠣꠞ ꠀꠁꠅꠄ, ꠔꠦ ꠔꠣꠁ ꠔ ꠛꠣꠚꠞ ꠈꠣꠘꠤꠞ ꠅꠋꠡ ꠙꠣꠁꠛ। “ꠁꠝꠣꠝ ꠙꠞꠤꠛꠣꠞꠞ ꠛꠣꠁꠞꠣ ꠇꠥꠘꠥ ꠎꠘꠦ ꠇꠥꠞꠛꠣꠘꠤꠞ ꠙꠛꠤꠔ꠆ꠞ ꠇꠥꠘꠥ ꠈꠣꠘꠤ ꠈꠣꠅꠀ ꠎꠣꠁꠎ ꠘꠣꠄ। 14 ꠇꠦꠃ ꠎꠥꠖꠤ ꠜꠥꠟ ꠇꠞꠤꠀ ꠁꠔꠣ ꠈꠣꠁꠟꠣꠄ, ꠔꠦ ꠁ ꠎꠘꠦ ꠁꠝꠣꠝꠞ ꠉꠦꠍꠦ ꠈꠦꠔꠤ-ꠙꠥꠞꠘ ꠖꠤꠔꠦ ꠅꠁꠛ। ꠅꠃ ꠈꠣꠘꠤꠞ ꠖꠣꠝꠞ ꠟꠉꠦ ꠀꠞꠅ ꠙꠣꠌ ꠛꠣꠐꠞ ꠄꠇ ꠛꠣꠐ ꠖꠣꠝ ꠛꠦꠡꠤ ꠖꠤꠔꠦ ꠅꠁꠛ। 15 ꠛꠘꠤ ꠁꠍꠞꠣꠁꠟꠦ ꠝꠣꠛꠥꠖꠞ ꠘꠣꠝꠦ ꠔꠣꠞꠣꠞ ꠎꠦ ꠎꠤꠘꠤꠡ ꠙꠛꠤꠔ꠆ꠞ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠣꠘ ꠇꠞꠂꠘ, ꠁꠝꠣꠝ ꠅꠇꠟꠦ ꠎꠣꠘꠥ ꠁꠔꠣꠞꠦ ꠅꠙꠛꠤꠔ꠆ꠞ ꠘꠣ ꠛꠣꠘꠣꠁꠘ। 16 ꠔꠣꠞꠣ ꠛꠣꠁꠞꠣ ꠝꠣꠘꠡꠞꠦ ꠁꠔꠣ ꠈꠣꠁꠔꠦ ꠖꠤꠀ ꠝꠣꠘꠡꠞꠦ ꠖꠥꠡꠤ ꠛꠣꠘꠣꠁꠀ ꠈꠦꠔꠤ-ꠙꠥꠞꠘꠞ ꠖꠣꠠꠅ ꠎꠣꠘꠥ ꠘꠣ ꠚꠣꠟꠣꠁꠘ। ꠝꠘꠅ ꠞꠣꠈꠤꠅ, ꠀꠝꠤ ꠝꠣꠛꠥꠖꠦꠁ ꠔꠣꠞꠣꠞꠦ ꠙꠛꠤꠔ꠆ꠞ ꠇꠞꠤ।” ꠎꠦꠟꠣꠈꠣꠘ ꠟꠤꠟ꠆ꠟꠣ-ꠇꠥꠞꠛꠣꠘꠤ ꠇꠛꠥꠟ ꠅꠄ ꠘꠣ 17 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 18 “ꠔꠥꠝꠤ ꠉꠤꠀ ꠁꠝꠣꠝ ꠢꠣꠞꠥꠘ, ꠔꠣꠞ ꠙꠥꠀꠂꠘ ꠀꠞ ꠢꠇꠟ ꠛꠘꠤ ꠁꠍꠞꠣꠁꠟꠞꠦ ꠇꠅ, ꠔꠥꠝꠞꠣꠞ ꠇꠥꠘꠥ ꠝꠣꠘꠡꠦ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠇꠥꠘꠥ ꠎꠘꠦ ꠎꠥꠖꠤ ꠝꠣꠘ꠆ꠘꠔ ꠀꠖꠣꠄ ꠇꠞꠣꠞ ꠟꠣꠉꠤ ꠛꠣ ꠘꠤꠎꠞ ꠈꠥꠡꠤꠄ ꠘꠚꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠘꠣꠝꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠖꠤꠛꠣꠞ ꠘꠤꠅꠔꠦ ꠇꠥꠘꠥꠔꠣ ꠟꠁꠀ ꠀꠄ, 19 ꠔꠦ ꠁꠇꠐꠣ ꠅꠁꠔꠦ ꠅꠁꠛ ꠄꠉꠥ ꠘꠤꠈꠥꠔ ꠛꠤꠍꠣꠟ, ꠝꠦꠠꠣ ꠛꠣ ꠍꠣꠉꠟꠞ ꠙꠣꠑꠣ। ꠁꠟꠣ ꠘꠣ ꠅꠁꠟꠦ ꠔ ꠝꠣꠛꠥꠖꠦ ꠇꠛꠥꠟ ꠇꠞꠔꠣ ꠘꠣꠄ। 20 ꠈꠥꠔ ꠀꠟꠣ ꠇꠥꠘꠥ ꠙꠡꠥꠖꠤ ꠎꠣꠘꠥ ꠇꠥꠞꠛꠣꠘꠤ ꠀꠖꠣꠄ ꠘꠣ ꠇꠞꠦ, ꠇꠞꠟꠦꠅ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠔ ꠘꠣꠄ। 21 ꠇꠥꠘꠥ ꠝꠣꠘ꠆ꠘꠔ ꠀꠖꠣꠄ ꠇꠞꠣꠞ ꠟꠣꠉꠤ ꠛꠣ ꠘꠤꠎꠞ ꠈꠥꠡꠤꠄ ꠘꠚꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠦꠃ ꠎꠥꠖꠤ ꠝꠣꠛꠥꠖꠞ ꠘꠣꠝꠦ ꠍꠣꠟꠣꠝꠔꠤ ꠇꠥꠞꠛꠣꠘꠤ ꠖꠤꠔ ꠌꠣꠄ, ꠔꠦ ꠁꠔꠣꠞ ꠟꠣꠉꠤ ꠄꠉꠥ ꠘꠤꠈꠥꠔ ꠉꠞꠥ, ꠝꠦꠠꠣ ꠛꠣ ꠍꠣꠉꠟ ꠀꠘꠔꠦ ꠅꠁꠛ। ꠉꠔꠞꠅ ꠈꠥꠔ ꠀꠟꠣ ꠇꠥꠘꠥ ꠙꠡꠥꠖꠤ ꠇꠥꠞꠛꠣꠘꠤ ꠖꠤꠟꠦ ꠁꠔꠣ ꠇꠛꠥꠟ ꠅꠁꠔ ꠘꠣꠄ। 22 ꠇꠥꠘꠥ ꠝꠣꠘꠡꠦ ꠎꠣꠘꠥ ꠇꠥꠞꠛꠣꠘꠤꠞ ꠘꠤꠅꠔꠦ ꠀꠘ꠆ꠖꠣ, ꠟꠦꠋꠠꠣ, ꠇꠣꠐꠣ-ꠌꠤꠞꠣ, ꠇꠥꠘꠥ ꠅꠋꠉ ꠇꠣꠐꠣ, ꠙꠥꠎꠀꠟꠣ ꠊꠣ, ꠛꠣ ꠖꠣꠃꠖ-ꠈꠣꠃꠎꠟꠤ ꠇꠥꠘꠥ ꠙꠡꠥꠞꠦ ꠝꠣꠛꠥꠖꠞ ꠖꠞꠛꠣꠞꠅ ꠘꠣ ꠀꠘꠦ, ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠅꠟꠣ ꠈꠥꠔ ꠀꠟꠣ ꠇꠥꠘꠥ ꠙꠡꠥꠞꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠔꠥꠟꠤꠅ ꠘꠣ। 23 ꠔꠣ-ꠅ ꠙꠡꠥꠞ ꠇꠥꠘꠥ ꠅꠋꠉ ꠘꠤꠅꠝꠞ ꠛꠦꠡꠤ ꠟꠣꠝ꠆ꠛꠣ ꠛꠣ ꠛꠣꠐ꠆ꠐꠤ ꠕꠣꠇꠟꠦ, ꠅꠟꠣꠈꠣꠘ ꠙꠡꠥꠞꠦ ꠘꠤꠎꠞ ꠈꠥꠡꠤꠄ ꠘꠚꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠤꠔꠣ ꠙꠣꠞꠛꠣ, ꠅꠁꠟꠦ ꠇꠥꠘꠥ ꠝꠣꠘ꠆ꠘꠔ ꠙꠥꠞꠘꠞ ꠟꠣꠉꠤ ꠁꠟꠣꠈꠣꠘ ꠇꠥꠞꠛꠣꠘꠤ ꠇꠛꠥꠟ ꠅꠁꠔ ꠘꠣꠄ। 24 ꠇꠥꠘꠥ ꠙꠡꠥꠞ ꠅꠘ꠆ꠒꠇꠥꠡ ꠎꠥꠖꠤ ꠕꠦꠔꠟꠣ, ꠍꠦꠌꠣ, ꠇꠣꠐꠣ-ꠌꠤꠞꠣ ꠕꠣꠇꠦ, ꠔꠦ ꠁꠔꠣꠞꠦ ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠅ ꠘꠣ, ꠘꠤꠎꠞ ꠖꠦꠡꠅ ꠉꠤꠀ ꠁꠟꠣ ꠇꠞꠤꠅ ꠘꠣ। 25 ꠜꠤꠘ ꠎꠣꠔꠤꠞ ꠇꠥꠘꠥ ꠝꠣꠘꠡꠞ ꠉꠦꠍ ꠕꠣꠇꠤ ꠅꠟꠣꠈꠣꠘ ꠙꠡꠥ ꠀꠘꠤꠀ ꠔꠥꠝꠞꠣꠞ ꠀꠟ꠆ꠟꠣꠞ ꠘꠣꠝꠦ ꠇꠥꠞꠛꠣꠘꠤ ꠖꠤꠅ ꠘꠣ। ꠁꠔꠣꠞ ꠉꠔꠞꠅ ꠈꠥꠔ ꠕꠣꠇꠣꠄ ꠁꠔꠣꠖꠤ ꠇꠥꠞꠛꠣꠘꠤ ꠖꠤꠟꠦ ꠔꠥꠝꠞꠣꠞ ꠇꠥꠘꠥ ꠚꠣꠄꠖꠣ ꠅꠁꠔ ꠘꠣꠄ।” 26 ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 27 “ꠎꠘꠝꠞ ꠛꠣꠖ ꠕꠣꠇꠤ ꠡꠣꠔ ꠖꠤꠘ ꠙꠞ꠆ꠎꠘ꠆ꠔ ꠉꠞꠥ ꠛꠣ ꠍꠣꠉꠟ ꠛꠣ ꠝꠦꠠꠣ-ꠛꠣꠁꠌ꠆ꠌꠣꠞꠦ ꠔꠣꠞ ꠝꠣʼꠞ ꠟꠉꠦ ꠞꠁꠔꠦ ꠖꠤꠛꠣꠄ। ꠀꠐ ꠘꠝ꠆ꠛꠞ ꠖꠤꠘ ꠕꠣꠇꠤ ꠁꠔꠣꠞꠦ ꠝꠣꠛꠥꠖꠞ ꠘꠣꠝꠦ ꠀꠉꠥꠘꠤꠔ ꠖꠦꠅꠀ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠦꠅꠀ ꠎꠣꠁꠛ। 28 ꠔꠣ-ꠅ ꠉꠣꠁ ꠀꠞ ꠔꠣꠁꠞ ꠛꠣꠍꠥꠞꠞꠦ, ꠝꠦꠠꠤ ꠛꠣ ꠍꠣꠉꠤ ꠀꠞ ꠔꠣꠁꠞ ꠛꠣꠁꠌ꠆ꠌꠣꠞꠦ, ꠄꠇꠁ ꠖꠤꠘꠦ ꠎꠛ ꠇꠞꠣ ꠢꠣꠞꠣꠝ। 29 ꠔꠥꠝꠞꠣ ꠝꠣꠛꠥꠖꠞ ꠘꠣꠝꠦ ꠇꠥꠘꠥ ꠡꠥꠇꠥꠞꠣꠘꠣ ꠇꠥꠞꠛꠣꠘꠤ ꠖꠤꠔꠦ ꠌꠣꠁꠟꠦ, ꠁꠔꠣ ꠅꠃ ꠘꠝꠥꠘꠣꠄ ꠀꠖꠣꠄ ꠇꠞꠤꠅ ꠎꠦꠟꠣ ꠔꠣꠁꠘ ꠈꠥꠡꠤ ꠅꠁꠘ। 30 ꠇꠥꠞꠛꠣꠘꠤꠞ ꠉꠥꠡ꠆ꠔ ꠇꠥꠞꠛꠣꠘꠤꠞ ꠖꠤꠘꠞ ꠝꠣꠎꠦ ꠈꠣꠁꠟꠤꠔꠦ ꠅꠁꠛ, ꠁꠔꠣ ꠛꠣꠖꠞ ꠖꠤꠘ ꠛꠤꠀꠘ ꠙꠞ꠆ꠎꠘ꠆ꠔ ꠕꠅꠀ ꠢꠣꠞꠣꠝ। ꠀꠝꠤꠃ ꠔ ꠝꠣꠛꠥꠖ। 31 “ꠔꠥꠝꠞꠣ ꠀꠝꠣꠞ ꠢꠥꠇꠥꠝ ꠝꠣꠘꠤꠅ ꠀꠞ ꠅꠃ ꠟꠣꠈꠣꠘ ꠌꠟꠤꠅ। ꠀꠝꠤꠃ ꠔ ꠝꠣꠛꠥꠖ। 32 ꠔꠥꠝꠞꠣ ꠀꠝꠣꠞ ꠙꠣꠇ-ꠙꠛꠤꠔ꠆ꠞ ꠘꠣꠝꠞꠦ ꠅꠡꠝ꠆ꠝꠣꠘ ꠇꠞꠤꠅ ꠘꠣ, ꠎꠣꠔꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠀꠝꠤ ꠙꠣꠇ-ꠙꠛꠤꠔ꠆ꠞ ꠢꠤꠡꠣꠛꠦ ꠉꠁꠘ꠆ꠘ ꠅꠁ। ꠀꠝꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠣꠇ-ꠙꠛꠤꠔ꠆ꠞ ꠛꠣꠘꠣꠁ। 33 ꠀꠝꠤ ꠔꠥꠝꠞꠣꠞ ꠝꠣꠛꠥꠖ ꠅꠀꠞ ꠘꠤꠅꠔꠦ ꠔꠥꠝꠞꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠛꠣꠞ ꠇꠞꠤ ꠀꠘꠍꠤ। ꠀꠝꠤꠃ ꠔ ꠝꠣꠛꠥꠖ।” |
© Ahle Kitab Society. All rights reserved.