ꠀꠍꠝꠣꠘꠤ ꠇꠤꠔꠣꠛ: ꠁꠃꠘꠥꠍ 2 - Siloṭi Asmani Kitab (Nagri lipi)

ꠝꠣꠍꠞ ꠙꠦꠐꠅ ꠢꠎꠞꠔ ꠁꠃꠘꠥꠍ (ꠀ꠩) ꠅꠞ ꠔꠃꠛꠣ

¹ ꠁꠃꠘꠥꠍꠦ ꠝꠣꠍꠞ ꠙꠦꠐꠅ ꠕꠘꠦ ꠝꠣꠛꠥꠖ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠟꠣ।

² ꠝꠍꠤꠛꠔꠅ ꠙꠁꠠꠣ ꠝꠃꠟꠣ ꠒꠣꠇꠤꠟꠣꠝ ꠔꠞꠦ, ꠞꠢꠝ ꠇꠞꠤꠀ ꠔꠥꠁ ꠎꠥꠀꠙ ꠖꠤꠟꠦ ꠝꠞꠦ। ꠙꠣꠔꠣꠟꠞ ꠙꠦꠐꠅ ꠛꠁꠀ ꠀꠝꠤ ꠇꠣꠘ꠆ꠖꠤꠟꠣꠝ, ꠇꠛꠥꠟ ꠇꠞꠤꠟꠣꠄ ꠀꠞꠎ ꠞꠢꠤꠝ ꠞꠢꠝꠣꠘ।

³ ꠖꠞꠤꠀꠞ ꠝꠥꠞꠅ ꠛꠘ꠆ꠖꠥ ꠝꠞꠦ ꠚꠣꠟꠣꠁꠟꠣꠄ, ꠔꠥꠝꠣꠞ ꠙꠣꠘꠤꠞ ꠓꠦꠃꠄ ꠀꠝꠣꠄ ꠜꠣꠡꠣꠁ ꠟꠁꠀ ꠎꠣꠄ।

⁴ ꠝꠤꠟꠦ ꠘꠣ ꠖꠤꠖꠣꠞ ꠔꠥꠝꠣꠞ ꠘꠣꠁ ꠇꠣꠘ꠆ꠒꠣꠞꠤ, ꠔꠣꠟ꠆ꠟꠣꠡꠤ ꠇꠞꠤꠀ ꠝꠥꠇꠣꠝ ꠎꠤꠇꠤꠞ ꠇꠞꠤ।

⁵ ꠓꠦꠃꠅꠞ ꠝꠣꠎꠦꠔꠦ ꠙꠠꠤ ꠎꠣꠘ ꠗꠠꠚꠠ ꠇꠞꠦ, ꠖꠞꠤꠀꠞ ꠟꠔꠣ-ꠙꠣꠔꠣꠄ ꠙꠦꠌꠤꠟꠤꠟ ꠝꠞꠦ।

⁶ ꠙꠣꠔꠣꠟꠞ ꠔꠟꠦ ꠉꠤꠀ ꠝꠤꠟꠦꠞ ꠘꠣ ꠇꠤꠘꠣꠞ, ꠈꠞꠦꠖꠤ ꠌꠣꠁꠀ ꠖꠦꠈꠤ ꠖꠥꠀꠞ ꠘꠣꠁ ꠀꠞ। ꠛꠘ꠆ꠖꠤ ꠅꠁꠀ ꠇꠣꠘ꠆ꠖꠤ ꠀꠝꠤ ꠘꠤꠞꠣꠡ ꠛꠖꠘꠦ, ꠀꠎꠣꠖ ꠇꠞꠤꠟꠣꠄ ꠝꠃꠟꠣ ꠉꠁꠘ ꠉꠣꠠꠣ ꠕꠘꠦ।

⁷ ꠎꠣꠘ ꠀꠝꠣꠞ ꠎꠣꠄ ꠎꠣꠄ ꠅꠁꠟ ꠎꠈꠘ, ꠇꠣꠔꠞ ꠅꠁꠀ ꠉ ꠛꠘ꠆ꠖꠥ ꠇꠞꠤꠘꠥ ꠡꠞꠘ। ꠜꠤꠇ꠆ꠇꠣ ꠝꠣꠋꠉꠤꠟꠣꠝ ꠇꠣꠋꠉꠣꠟ ꠖꠞꠛꠣꠞꠦ ꠔꠥꠝꠣꠞ, ꠀꠞꠡꠅ ꠕꠣꠇꠤꠀ ꠖꠄꠀꠟ ꠖꠦꠈꠣꠁꠟꠣꠄ ꠖꠤꠖꠣꠞ।

⁸ ꠝꠥꠞ꠆ꠔꠤꠙꠥꠎꠣ ꠇꠞꠦ ꠎꠣꠞꠣ ꠘꠣ ꠙꠣꠁꠛ ꠞꠢꠝꠔ, ꠄꠟꠣꠝꠤ ꠇꠞꠤꠀ ꠔꠣꠞꠣ ꠀꠞꠣꠁꠟ ꠇꠥꠖꠞꠔ।

⁹ ꠡꠥꠇꠥꠞ-ꠉꠥꠎꠣꠞ ꠇꠞꠅ ꠁꠃꠘꠥꠍ ꠝꠣꠛꠥꠖ ꠝꠦꠢꠦꠞꠛꠣꠘ, ꠔꠥꠝꠣꠞ ꠖꠞꠛꠣꠞꠦ ꠀꠝꠤ ꠇꠞꠤꠝꠥ ꠇꠥꠞꠛꠣꠘ। ꠟꠤꠟ꠆ꠟꠣ-ꠍꠖꠉꠣ ꠖꠣꠘ-ꠈꠄꠞꠣꠔ ꠡꠙꠤꠝꠥ ꠔꠞꠦ, ꠘꠣꠎꠣꠔꠞ ꠝꠣꠟꠤꠇ ꠝꠃꠟꠣꠄ ꠛꠣꠌꠣꠅ ꠀꠝꠣꠞꠦ।

¹⁰ ꠛꠣꠖꠦ ꠝꠣꠛꠥꠖꠦ ꠢꠃ ꠝꠣꠍꠞꠦ ꠢꠥꠇꠥꠝ ꠖꠤꠟꠣ, ꠝꠣꠍꠦ ꠁꠃꠘꠥꠍꠞꠦ ꠘꠤꠀ ꠢꠥꠇꠘꠣ ꠎꠝꠤꠘꠞ ꠃꠙꠞꠦ ꠛꠣꠁꠔ ꠇꠞꠤ ꠚꠣꠟꠣꠁ ꠖꠤꠟ।