ꠁꠘ꠆ꠎꠤꠟ ১৬: ২-ꠔꠤꠝꠕꠤ 3 - Siloṭi Asmani Kitab (Nagri lipi)ꠀꠈꠦꠞꠤ ꠎꠝꠣꠘꠣꠞ ꠘꠣꠚꠞꠝꠣꠘꠤ 1 ꠅ ꠔꠤꠝꠕꠤ, ꠅꠃ ꠢꠥꠡꠤꠀꠞꠤ ꠈꠣꠘꠣꠁꠘ ꠝꠘꠅ ꠞꠣꠈꠤꠅ, ꠀꠈꠦꠞꠤ ꠎꠝꠣꠘꠣꠔ ꠈꠥꠛ ꠝꠍꠤꠛꠔꠞ ꠖꠤꠘ ꠀꠁꠛ। 2 ꠝꠣꠘꠥꠡ ꠡ꠆ꠛꠣꠞꠕꠙꠞ ꠅꠁꠎꠤꠛ, ꠐꠦꠇꠣ-ꠙꠄꠡꠣꠞ ꠟꠣꠟꠌꠤ, ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠘꠤ, ꠝꠣꠘꠡꠞꠦ ꠄꠟꠣꠝꠤ ꠇꠞꠣ, ꠖꠥꠞꠘꠣꠝ ꠉꠣꠅꠀ, ꠝꠣ-ꠛꠣꠚꠞ ꠅꠛꠣꠁꠖ꠆ꠖ, ꠘꠤꠝꠇ-ꠢꠣꠞꠣꠝꠤ ꠇꠞꠛ ꠀꠞ ꠀꠟ꠆ꠟꠣꠞ ꠘꠣꠚꠞꠝꠣꠘꠤ ꠇꠞꠛ। 3 ꠝꠣꠄꠀ-ꠝꠝꠔꠣ ꠇꠝꠤꠎꠤꠛ, ꠇꠣꠁꠎ꠆ꠎꠣ-ꠚꠍꠣꠖ ꠇꠞꠟꠦ ꠀꠙꠥꠡ ꠇꠞꠔ ꠘꠣꠄ। ꠙꠞꠞ ꠛꠖꠘꠣꠝ ꠉꠣꠁꠛ, ꠘꠤꠎꠞꠦ ꠡꠣꠝꠟꠣꠁꠔ ꠙꠣꠞꠔ ꠘꠣꠄ, ꠝꠣꠘꠥꠡ ꠅꠝꠣꠘꠥꠡ ꠅꠁꠎꠤꠛ ꠀꠞ ꠢꠇꠟ ꠘꠝꠥꠘꠣꠞ ꠘꠦꠇ ꠇꠣꠝꠞ ꠖꠥꠡꠝꠘꠤ ꠇꠞꠛ। 4 ꠝꠣꠘꠡꠦ ꠛꠦꠁꠝꠣꠘꠤ, ꠚꠥꠐꠣꠘꠤ ꠀꠞ ꠛꠦꠙꠞꠥꠀ ꠜꠣꠛ ꠖꠦꠈꠣꠁꠛ, ꠀꠟ꠆ꠟꠣꠞ ꠀꠡꠤꠇ ꠘꠣ ꠅꠁꠀ ꠖꠥꠘꠤꠀꠛꠤ ꠀꠞꠣꠝ-ꠀꠄꠄꠡꠞ ꠀꠡꠤꠇ ꠅꠁꠛ। 5 ꠛꠣꠁꠞꠞ ꠜꠣꠛ-ꠍꠥꠞꠔꠦ ꠛꠥꠎꠣ ꠎꠣꠁꠛ ꠈꠥꠛ ꠀꠟ꠆ꠟꠣꠅꠀꠟꠣ ꠙꠣꠇ-ꠝꠥꠍꠟ꠆ꠟꠤ, ꠅꠁꠟꠦ ꠝꠥꠟꠔ ꠟꠦꠛꠣꠍꠗꠣꠞꠤ ꠜꠘ꠆ꠒ। ꠔꠦ ꠔꠥꠝꠤ ꠁꠔꠣꠞ ꠉꠦꠍ ꠕꠣꠇꠤ ꠢꠞꠤꠀ ꠞꠁꠅ। 6 ꠅꠔꠣꠞ ꠝꠣꠎꠞ ꠇꠦꠃ ꠇꠦꠃ ꠗꠥꠇꠣ ꠖꠤꠀ ꠝꠣꠘꠡꠞ ꠊꠞꠅ ꠢꠣꠝꠣꠁꠀ ꠇꠝ ꠁꠝꠣꠘꠤ ꠛꠦꠐꠤꠘ꠆ꠔꠞꠦ ꠇꠥ-ꠙꠕꠦ ꠐꠣꠘꠦ। ꠁꠔꠣ ꠛꠦꠐꠤꠘ꠆ꠔꠞ ꠝꠉꠎ ꠅꠁꠟ ꠉꠥꠘꠣꠞ ꠜꠣꠘ꠆ꠒꠣꠞ। ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠚꠥꠞ꠆ꠔꠤ-ꠀꠝꠥꠖꠞ ꠛꠡꠦ ꠌꠟꠦ। 7 ꠔꠣꠞꠣ ꠢꠣꠝꠦꠡꠣ ꠀꠟ꠆ꠟꠣꠁ ꠙꠕꠞ ꠔꠣꠟꠤꠝ ꠢꠥꠘꠦ, ꠅꠁꠟꠦ ꠇꠥꠘꠥꠖꠤꠘꠅ ꠀꠟ꠆ꠟꠣꠁ ꠢꠇꠤꠇꠔ ꠔꠣꠞꠣꠞ ꠜꠤꠔꠞꠦ ꠢꠣꠝꠣꠄ ꠘꠣ। 8 ꠝꠤꠡꠞꠞ ꠚꠦꠞꠣꠃꠘꠞ ꠎꠣꠖꠥꠉꠤꠞ-ꠉꠥꠘꠤꠘ ꠎꠣꠘ꠆ꠘꠤ ꠀꠞ ꠎꠣꠝ꠆ꠛꠞꠤꠄ ꠎꠦꠟꠣ ꠝꠥꠍꠣ ꠘꠛꠤꠞ ꠛꠤꠞꠥꠗꠤꠔꠣ ꠇꠞꠍꠤꠟꠣ, ꠑꠤꠇ ꠅꠃ ꠟꠣꠈꠣꠘ ꠅꠉꠥꠁꠘ꠆ꠔꠦꠅ ꠀꠟ꠆ꠟꠣꠁ ꠢꠇꠞ ꠛꠤꠞꠥꠗꠤꠔꠣ ꠇꠞꠦ। ꠁꠔꠣꠞ ꠛꠤꠛꠦꠇ ꠙꠌꠤ ꠉꠦꠍꠦ, ꠔꠣꠞꠣꠞ ꠜꠤꠔꠞꠦ ꠁꠝꠣꠘꠞ ꠜꠣꠟꠣꠁ ꠘꠣꠁ। 9 ꠅꠁꠟꠦ ꠔꠣꠞꠣ ꠀꠞ ꠀꠉꠥꠀꠁꠔ ꠙꠣꠞꠔ ꠘꠣꠄ, ꠢꠃ ꠎꠣꠖꠥꠉꠤꠞ ꠎꠣꠘ꠆ꠘꠤ ꠀꠞ ꠎꠣꠝ꠆ꠛꠞꠤꠞ ꠛꠦꠀꠈꠟꠤ ꠎꠦꠟꠣ ꠢꠇꠟꠞ ꠉꠦꠍꠦ ꠗꠞꠣ ꠙꠠꠍꠤꠟ, ꠁꠔꠣꠞ ꠛꠦꠀꠈꠟꠤꠅ ꠅꠟꠣ ꠗꠞꠣ ꠙꠠꠛ। ꠀꠟ꠆ꠟꠣꠞ ꠇꠣꠟꠣꠝꠃ ꠝꠥꠝꠤꠘꠞ ꠈꠥꠞꠣꠇ 10 ꠅ ꠔꠤꠝꠕꠤ, ꠔꠥꠝꠤ ꠀꠝꠣꠞ ꠔꠣꠟꠤꠝ, ꠀꠝꠣꠞ ꠌꠣꠟ-ꠌꠟꠘ, ꠀꠝꠣꠞ ꠃꠖ꠆ꠖꠦꠡ꠆ꠡ, ꠁꠝꠣꠘ, ꠍꠛꠞꠉꠣꠞꠤ, ꠝꠢꠛ꠆ꠛꠔ, ꠀꠞ ꠀꠝꠣꠞ ꠗꠂꠎ꠆ꠎꠞ ꠇꠕꠣ ꠙꠥꠞꠣꠙꠥꠞ ꠈꠤꠀꠟ ꠇꠞꠍ। 11 ꠀꠘ꠆ꠔꠤꠅꠈꠤꠀ, ꠁꠇꠘꠤꠅ ꠀꠞ ꠟꠥꠡ꠆ꠞꠣ ꠐꠣꠃꠘꠅ ꠀꠝꠤ ꠇꠔ ꠎꠥꠟꠥꠝ-ꠝꠍꠤꠛꠔ ꠡꠁꠎ꠆ꠎ ꠇꠞꠍꠤ, ꠁꠔꠣ ꠔ ꠔꠥꠝꠤ ꠎꠣꠘ। ꠅꠁꠟꠦ ꠝꠣꠟꠤꠇꠦ ꠀꠝꠣꠞꠦ ꠞꠇ꠆ꠇꠣ ꠇꠞꠍꠂꠘ। 12 ꠀꠍꠟꠦ ꠀꠟ꠆ꠟꠣꠞ ꠒꠞ-ꠈꠚ ꠜꠤꠔꠞꠦ ꠞꠣꠈꠤꠀ, ꠁꠍꠣꠄꠁ ꠁꠝꠣꠘꠖꠣꠞ ꠛꠘꠤꠀ ꠎꠦꠞꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠔ ꠌꠣꠄ, ꠔꠣꠞꠣ ꠔ ꠎꠥꠟꠥꠝ-ꠝꠍꠤꠛꠔꠅ ꠙꠠꠛꠃ। 13 ꠅꠁꠟꠦ ꠜꠘ꠆ꠒ ꠀꠞ ꠈꠛꠤꠍ ꠅꠇꠟ ꠖꠤꠘ ꠖꠤꠘ ꠀꠞꠅ ꠈꠣꠞꠣꠙ ꠅꠁꠛ। ꠔꠣꠞꠣ ꠘꠤꠎꠦꠅ ꠛꠦ-ꠙꠕꠦ ꠌꠟꠛ, ꠀꠞ ꠀꠞꠇ ꠎꠘꠞꠦꠅ ꠛꠦ-ꠙꠕꠤ ꠛꠣꠘꠣꠁꠛ। 14 ꠔꠦ ꠔꠥꠝꠤ ꠎꠦꠔꠣ ꠔꠣꠟꠤꠝ ꠙꠣꠁꠍ, ꠙꠣꠁꠀ ꠖꠤꠟꠦ-ꠎꠣꠘꠦ ꠄꠇꠤꠘ ꠇꠞꠍ, ꠄꠞ ꠃꠙꠞꠦ ꠕꠤꠞ ꠕꠣꠇꠅ, ꠇꠣꠞꠘ ꠔꠥꠝꠤ ꠘꠤꠎꠦ ꠎꠣꠘ, ꠁ ꠔꠣꠟꠤꠝ ꠇꠣꠞ ꠉꠦꠍ ꠕꠣꠇꠤ ꠙꠣꠁꠍ। 15 ꠔꠥꠝꠤ ꠔ ꠢꠥꠞꠥꠝꠣꠘ ꠕꠘꠦꠃ ꠀꠟ꠆ꠟꠣꠞ ꠇꠣꠟꠣꠝꠞ ꠔꠣꠟꠤꠝ ꠙꠣꠁꠍ, ꠀꠞ ꠅꠃ ꠇꠣꠟꠣꠝꠦꠃ ꠔꠥꠝꠣꠞꠦ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠞ ꠃꠍꠤꠟ꠆ꠟꠣꠄ, ꠘꠣꠎꠣꠔ ꠢꠣꠍꠤꠟꠞ ꠙꠕ ꠛꠣꠔꠣꠁ ꠖꠤꠛ। 16 ꠢꠥꠘꠅ, ꠀꠟ꠆ꠟꠣꠞ ꠇꠣꠟꠣꠝꠞ ꠙꠞꠔꠦꠇꠐꠣ ꠢꠞꠚ ꠀꠟ꠆ꠟꠣꠞ ꠉꠦꠍ ꠕꠣꠇꠤꠃ ꠀꠁꠍꠦ। ꠁꠔꠣ ꠔ ꠔꠣꠟꠤꠝ, ꠢꠥꠡꠤꠀꠞꠤ, ꠢꠦꠖꠣꠄꠅꠔ, ꠀꠞ ꠢꠇ ꠎꠤꠘ꠆ꠖꠦꠉꠤ ꠉꠠꠤꠛꠣꠞ ꠈꠥꠞꠣꠇ, 17 ꠎꠣꠔꠦ ꠀꠟ꠆ꠟꠣꠞ ꠛꠘ꠆ꠖꠣ ꠅꠇꠟ ꠃꠙꠎꠥꠇ꠆ꠔ ꠛꠘꠤꠀ ꠢꠇꠟ ꠘꠦꠇ ꠇꠣꠝꠞ ꠟꠣꠉꠤ ꠎꠥꠁꠔ ꠅꠁꠘ। |
© Ahle Kitab Society. All rights reserved.