ইঞ্জিল ১৩: ১-থিষল: 1 - Siloṭi Asmani Kitab (Nagri lipi)1 ꠀꠝꠤ ꠙꠣꠃꠟꠥꠍ, ꠜꠣꠁ ꠍꠤꠟꠣꠍ ꠀꠞ ꠔꠤꠝꠕꠤꠄ ꠕꠤꠡꠟꠘꠤꠇꠤ ꠐꠣꠃꠘꠞ ꠎꠝꠣꠔꠞ ꠉꠦꠍꠦ ꠟꠦꠈꠞꠣꠝ। ꠔꠥꠝꠞꠣ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣ ꠙꠣꠇ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠀꠙꠘ ꠎꠘ ꠅꠁꠍ। ꠔꠥꠝꠞꠣꠞ ꠃꠙꠞꠦ ꠞꠢꠝꠔ ꠀꠞ ꠡꠣꠘ꠆ꠔꠤ ꠘꠣꠎꠤꠟ ꠅꠃꠇ। ꠕꠤꠡꠟꠘꠤꠇꠤ ꠎꠝꠣꠔꠞ ꠁꠝꠣꠘ 2 ꠀꠝꠞꠣ ꠖꠥꠀ ꠇꠞꠣꠞ ꠛꠣꠟꠣ ꠢꠣꠝꠦꠡꠣ ꠔꠥꠝꠞꠣꠞ ꠎꠝꠣꠔꠞ ꠢꠇꠟꠞ ꠘꠣꠝ ꠝꠘꠅ ꠇꠞꠤꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ। 3 ꠁꠝꠣꠘꠞ ꠟꠣꠉꠤ ꠔꠥꠝꠞꠣ ꠎꠦ ꠇꠣꠝ ꠇꠞꠞꠣꠄ, ꠝꠢꠛ꠆ꠛꠔꠞ ꠟꠣꠉꠤ ꠔꠥꠝꠞꠣ ꠎꠦ ꠝꠦꠘꠔ ꠇꠞꠞꠣꠄ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠀꠡꠣ-ꠜꠞꠡꠣ ꠇꠞꠤꠀ ꠔꠥꠝꠞꠣ ꠎꠦ ꠍꠛꠞ ꠇꠞꠞꠣꠄ, ꠁꠔꠣ ꠀꠝꠞꠣꠞ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠖꠞꠛꠣꠞꠅ ꠖꠥꠀ ꠇꠞꠣꠞ ꠡꠝꠄ ꠢꠣꠝꠦꠡꠣ ꠝꠘꠅ ꠇꠞꠤ। 4 ꠅ ꠜꠣꠁ ꠅꠇꠟ, ꠀꠟ꠆ꠟꠣꠞ ꠝꠣꠄꠀꠞ ꠛꠘ꠆ꠖꠣ ꠅꠇꠟ, ꠀꠝꠞꠣ ꠎꠣꠘꠤ, ꠀꠟ꠆ꠟꠣꠄꠃ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠍꠂꠘ। 5 ꠀꠝꠞꠣꠞ ꠈꠥꠡ-ꠈꠛꠞꠤꠞ ꠔꠛꠟꠤꠉ ꠇꠣꠝ ꠔ ꠔꠥꠝꠞꠣꠞ ꠉꠦꠍꠦ ꠈꠣꠟꠤ ꠝꠥꠈꠞ ꠇꠕꠣꠃ ꠞꠁꠍꠦ ꠘꠣ, ꠛꠞꠋ ꠀꠟ꠆ꠟꠣꠁ ꠛꠟ, ꠙꠣꠇ ꠞꠥꠢꠥ, ꠀꠞ ꠘꠤꠌ꠆ꠌꠤꠔ ꠜꠞꠡꠣꠞ ꠃꠙꠞꠦ ꠌꠣꠟꠥ ꠅꠁꠍꠦ। ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠀꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁꠔꠣꠝ, ꠅꠃ ꠡꠝꠄ ꠇꠤꠟꠣꠘ ꠌꠟꠍꠤ, ꠁꠔꠣ ꠔ ꠔꠥꠝꠞꠣ ꠎꠣꠘꠃ। 6 ꠔꠥꠝꠞꠣ ꠛꠃꠔ ꠎꠥꠟꠥꠝ-ꠝꠍꠤꠛꠔꠞ ꠝꠣꠎꠦꠅ ꠙꠣꠇ ꠞꠥꠢꠥꠞ ꠖꠦꠅꠀ ꠈꠥꠡꠤꠄ ꠀꠝꠞꠣꠞ ꠔꠛꠟꠤꠉ ꠇꠛꠥꠟ ꠇꠞꠤꠀ, ꠀꠝꠞꠣꠞ ꠀꠞ ꠝꠣꠟꠤꠇꠞ ꠙꠕꠦ ꠌꠟꠞꠣꠄ। 7 ꠅꠃꠟꠣ ꠌꠟꠤꠀ ꠔꠥꠝꠞꠣ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠄꠇ ꠘꠤꠡꠣꠘꠣ ꠅꠁꠉꠦꠍ। 8 ꠝꠣꠟꠤꠇꠞ ꠇꠣꠟꠣꠝ ꠔꠥꠝꠞꠣꠞ ꠝꠣꠎꠖꠤ ꠈꠣꠟꠤ ꠝꠣꠇꠤꠖꠘꠤꠀ ꠀꠞ ꠉ꠆ꠞꠤꠍ ꠖꠦꠡꠅꠃ ꠍꠤꠔ꠆ꠞꠤꠍꠦ ꠘꠣ, ꠛꠞꠋ ꠀꠟ꠆ꠟꠣꠞ ꠃꠙꠞꠦ ꠔꠥꠝꠞꠣꠞ ꠁꠝꠣꠘꠞ ꠇꠕꠣ ꠢꠇꠟ ꠎꠣꠉꠣꠔꠃ ꠍꠤꠔ꠆ꠞꠤꠉꠦꠍꠦ। ꠁ ꠛꠦꠙꠣꠞꠦ ꠀꠝꠞꠣ ꠇꠥꠘ꠆ꠔꠣ ꠝꠣꠔꠣꠞ ꠎꠞꠥꠞ ꠘꠣꠄ। 9 ꠢꠇꠟ ꠝꠣꠘꠡꠦꠃ ꠔ ꠀꠝꠞꠣꠞꠦ ꠇꠁꠞꠣ, ꠔꠥꠝꠞꠣ ꠇꠔ ꠀꠖꠞ ꠇꠞꠤꠀ ꠀꠝꠞꠣꠞꠦ ꠇꠛꠥꠟ ꠇꠞꠍꠤꠟꠣꠄ, ꠔꠣꠞꠣ ꠄꠅꠈꠣꠘ ꠇꠁꠞꠣ, ꠔꠥꠝꠞꠣ ꠇꠤꠟꠣ ꠖꠦꠛ-ꠖꠦꠛꠤꠘ꠆ꠔꠞ ꠙꠥꠎꠣ ꠛꠣꠖ ꠖꠤꠀ ꠀꠟ꠆ꠟꠣꠞ ꠙꠕꠤ ꠅꠁꠀ, ꠎꠤꠘ꠆ꠖꠣ ꠢꠇ ꠀꠟ꠆ꠟꠣꠞ ꠄꠛꠣꠖꠔ ꠇꠞꠣꠔ ꠀꠁꠍ। 10 ꠀꠞ ꠝꠥꠞ꠆ꠖꠣ ꠅꠇꠟꠞ ꠝꠣꠎ ꠕꠣꠇꠤ ꠎꠦꠘꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠣ ꠅꠁꠍꠦ, ꠢꠃ ꠁꠍꠣ ꠖꠥꠘꠤꠀꠔ ꠀꠅꠀꠞ ꠛꠣꠞ ꠌꠣꠁꠔꠣꠄ ꠙꠣꠞ। ꠔꠣꠁꠘ ꠅꠁꠟꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣ, ꠛꠦꠢꠦꠡ꠆ꠔ ꠕꠣꠇꠤ ꠟꠣꠝꠤꠀ ꠀꠁꠞꠣ, ꠀꠟ꠆ꠟꠣꠞ ꠎꠦ ꠉꠎꠛ ꠀꠁꠀ ꠟꠣꠝꠦꠞ, ꠁ ꠉꠎꠛ ꠕꠣꠇꠤ ꠅꠃ ꠁꠍꠣꠄ ꠀꠝꠞꠣꠞꠦ ꠛꠣꠌꠣꠁꠛꠣ। |
© Ahle Kitab Society. All rights reserved.