ꠎꠛꠥꠞ ꠡꠞꠤꠚ 96 - Siloṭi Asmani Kitab (Latin lipi)

al-Zobur 96

¹ Mabudor name noya git gao, O hara dunia, Mabudor git gao,

² Mabudor name git gao, tan tarif ḳoro, dine dine tan deoa nazator toblig ḳoro.

³ Hoḳol zatire zanao tan gourobor ḳota, hoḳol manshore ḳo tan kudroti kamor mohima.

⁴ Mabud-u mohan, moha tarif tan, hoḳol deb-debi taki boṛo boyonkor tain,

⁵ zati oḳlor deb-debi to beḳama futul ḳali, Mabude-u banaisoin hoḳol asman monḍoli.

⁶ Shan-shouḳot ar mohima tan samne roise, bol-shokti ar zak-zomoḳe tan gor hazaise.

⁷ O zogotor ḳandan oḳol, zanao Mabudor gunogan, gourob ar bol-shoktir ḳota zanao tan,

⁸ Mabudor name tan faona gourob zanao, lilla-sodga ato loia tan dorbaro hamao.

⁹ Fak-saf dile Mabudor samne soizdat foṛo, hara dunia tan samne tor-toraia ḳafia uṭo.

¹⁰ Zati oḳlor maze elan ḳoro, Mabud-u bashsha. Zogotre banaisoin mozbut, ḳorto nae kunu loṛa-soṛa, tain nichchit hoḳol zatir hok bisar ḳorba.

¹¹ Asman oḳol furti korouk, dunia kushi-o ouk, doria ar tar mazor shob zandar gorzia uṭouk,

¹² zomin ar er hokkolta kushi-bashi ḳorouk, bon-baganor shob gas-fala-o anondo-ullash ḳorouk.

¹³ Mabudor samne ola-u ḳorouk ita hoḳolta, tain to aira duniar bisar ḳorta. Zogotor bisar-foysala ḳorba hok-insafe, tamam zatir bisar-foysala ḳorba hok-halalie.