ꠎꠛꠥꠞ ꠡꠞꠤꠚ 5 - Siloṭi Asmani Kitab (Latin lipi)

al-Zobur 5

Hozrot Daudor mizmor.

¹ O Mabud, amar foriad ḳobul ḳoro, dilor ḳandon amar tumar ḳane huno.

² O amar Alla, amar bashsha tumi, amar aoaz huno tumi doya ḳori, dua-minoti ḳori tumar gese-u ḳali.

³ Tumi forti din fozore amar buli to huno, dilor hokkolta hazai raki tumar didaro.

⁴ Tumi to ila Alla nae ḳarafi zar fosond, tumar meman oito nae kunu fafi zon.

⁵ Boṛai-beṭagiri deḳaorar ṭai nai tumar samne, hoḳol laḳan naformani tumi ginna ḳoro nize.

⁶ Misa ḳota matrare nichchoy binash ḳoro tumi, Mabude to ginnain beshi kun-ḳarafi sol-soturi.

⁷ Oile tumar doya-mayae tumar goro hamaimu ami, noto oia soizda ḳormu tumar fobitro gor muki.

⁸ O Mabud, amar sairobae to dushmone bora, tumar forezgarir fote more neo salaia, amar samne tumar fot ḳoro sohi-shuza.

⁹ Tarar mukor kunu ḳota-u ekinor zuka nae, tarar dil-mon bora ḳali binashor sintae, kula ḳoyboror fosa lashor laḳan tarar gola, fam-foṭṭi marar ustad to tarar zifra.

¹⁰ O Alla, tumi itare dushi shaibosto ḳoro, tarar shorbonash ouk tarar fatail fando, shima saṛa naformanir dae ḳedao otare, birudita ḳorra to otae tumi Allar loge.

¹¹ Oile tumar sayat boshotḳari kushe-bashe rouk, hor-hamesha kushir gozol tara hoḳole gauk. tumi basao tarare tumar ashik zara, amud-furti ḳorouk shobe tumar name tara.

¹² Tumi-u Mabude forezgarre deo rohom-borkot, rohomotor beṛadi tumi tarare raḳo nirafod.