ꠎꠛꠥꠞ ꠡꠞꠤꠚ 32 - Siloṭi Asmani Kitab (Latin lipi)

al-Zobur 32

Hozrot Daudor maskil-ḳaoali.

¹ Nek-kofali ḳoy tarare, maf ḳora oise zarar naformanire, Mabud moulae zerar gunare amol-namar hishabo dorta naere.

² Hou zon-o nek-kofali, Allae zar gunare ḳaṭi disoin ḳata taki, zar maze nai kunu dukabazi.

³ Touba ḳorslam na zebla amar gunar lagi, hara din kukai kukai koy oisil mor aḍḍi-guḍḍi.

⁴ Tumar ate zatia dorsil din-rait amare, ḳomi gesil mor ḳayar shokti Soit-maia gorome. (Sela)

⁵ Ami zebla touba ḳorlam tumar dorbare, oforad shikar ḳorlam lukailam na kunutare, ḳoilam ami zebla shikar ḳormu oforadre, loge loge-u mafi dilae tumi amar shob shazare. (Sela)

⁶ Te mosibotor ḳalo forteḳ forezgare dua ḳorouk tumar-u dorbare, moha boinna oile-o faito nae to tarare.

⁷ Mor lukanir bankar tumi, basaiso more mosibot taki, ami uddar faoae beria raḳso tumi mor sairobae kushir ḳaoali. (Sela)

⁸ Ami Allae talim dimu, tumare solar fot deḳaimu, ami to soukdi nozor raḳmu, aḳol-buddi tumare dimu,

⁹ gada kiba guṛar laḳan obuz oio na, itare shamlaite oy doṛi-lagam dia, na dile manto nae ita tumar kunu ḳota.

¹⁰ Naformanor lagi bout zala-zontrona ase, Mabudor ufre borosha ḳorle doya-mayae beria raḳe.

¹¹ Mabudor name anondo-ullash ḳoro shob forezgar, zur golae gao gozol-git nikut dil zar.