ꠎꠛꠥꠞ ꠡꠞꠤꠚ 30 - Siloṭi Asmani Kitab (Latin lipi)

al-Zobur 30

Allar goror ian dibar ḳalo hozrot Daudor mizmor.

¹ Tumar tarif ḳormu Mabud tulia ancho more, dushmonre diso na shuzug furti korto mor ufre.

² Ogo Mabud Alla zure zure fana saisi tumar dorbare, foriad hunia tumi-u bemar taki shifa ḳorso amare.

³ Fatal takia Mabud tulia ancho more, hamai geslam goin gato basaiso amare.

⁴ Mabudor ashik bondae gao tan gunogan, fak-fobitro zania tane shukur-guzar ḳoro tan.

⁵ Tan gusa roy na to beshi shomoy, hara zibon-u tan doya-rohom roy, raitor bala zae ḳali ḳanda-ḳaṭi kori, bian oite-u ae kushi ar furti.

⁶ Shudinor ḳalo ḳoislam to ami-u, amar binash oito nae kunu din-u.

⁷ Tumar rohomote Mabud faṛor laḳan mozbut ḳorse more, zebla tumar muk lukailae ḍor hamaise mor bitre.

⁸ Zure zure ḍaḳsi go Mabud ami tumare, doya mangisi ami amar Allar dorbare.

⁹ Ami zudi hamai zai goin roshatole, lab kita oibo tumar ami morigele? Murdar ḳayar duil-balue ḳorbo ni tumar gunogan, gaibo ni itae tumar hok-halalir boyan?

¹⁰ Hunia mor foriad Mabud rohom ḳoro more, shaijjo ḳoro ogo Mabud tumi amare.

¹¹ Duk-koshṭor halot taki oḳon amare tulia ancho tumi-u more kushir mahfile, solar soṭor lebas mor tumi bodlaiso, kushi-bashir shundor lebas more findaiso.

¹² Amar dile hor-hamesha gunogan gaibo tumar, shukria zanaimu siroḳal Alla Mabud amar.