ꠎꠛꠥꠞ ꠡꠞꠤꠚ 3 - Siloṭi Asmani Kitab (Latin lipi)

al-Zobur 3

Afon fua Absalomor samon taki bagibar ḳalo Hozrot Daudor mizmor.

¹ O Mabud, amar dushmonor foriman ḳoto baṛigese, deḳra ni, ḳoto manshe amar loge lager.

² Amar befare ḳoto zone matira, ḳoira, Allar dorbaro tar zan basanir fot nai. (Sela)

³ Oile O Mabud, ḳoror dushmon taki tumi-u amar roikkaḳari, tumi-u amar shan-boṛai, bifodor maze amare shaosh dirae.

⁴ Ami zure zure Mabudre ḍaki, nizor fobitro faṛo taki amar arzi hunoin. (Sela)

⁵ Ami hutilam, hutia gumailam, bade hozag-o oilam, shoyong Mabude-u amare tan kulo ṭai dein.

⁶ Amar sairobae hazare hazar dushmone beria ubai roise, ubaile-o ami itare ḍorai na.

⁷ O Mabud, zoldi ḳoro! O amar Alla, amar zan basao! Tumi to amar hokkol dushmonor muko gushi marbae, bojjat oḳlor dat bangilibae.

⁸ Zan basani to Mabudor-u ḳam, afon prozar ufre tumar rohom-borkot zari rouk. (Sela)