ꠎꠛꠥꠞ ꠡꠞꠤꠚ 26 - Siloṭi Asmani Kitab (Latin lipi)

al-Zobur 26

Hozrot Daudor mizmor.

¹ Ami zen nirdushi Mabud, tumi ta ḳoro go zair, ami to hok fote-u soliar, Mabudor ufre-u borosha ḳoriar, bodlaitam nae niot amar.

² Mabud go, amare azmaia deḳo, amar dil forikka ḳoria zasai ḳoro.

³ Tumar doya-maya to amar sokur samne, ami soli tumar deḳail hok fote.

⁴ Misa matrar aḍḍat ami boi na, beiman-munafikor daro ḳase zai na.

⁵ Ḳobis-naformanor shong taki horia roi, bojjat oḳlor aḍḍat ami na boi.

⁶ Ḳalasor ray faia go Mabud, at doisi ami, tumar gor toaf ḳoria adae ḳori kurbani.

⁷ Zure zure tumar shukria zanairam, tumar hokkol keramotir ḳota ḳoiram.

⁸ Mabud, tumar boshot gor ami balobashi, ze zagat tumar gourob-mohimar boshoti.

⁹ Gunagaror loge amar zan na nio, kuni oḳlor loge amar moron na dio.

¹⁰ Tarar ato ase ḳali naformani, ḍain at bora tarar gushor ṭeḳadi.

¹¹ Ami to soli hok-halal fote, doya-maya ḳoria ḳalas ḳoro more.

¹² Homan zagat mozbut ase amar duio fao, Mabudor tarif ḳormu ami moha mozliso.