ꠎꠛꠥꠞ ꠡꠞꠤꠚ 21 - Siloṭi Asmani Kitab (Latin lipi)

al-Zobur 21

Gan-baznar forisaloḳor lagi: Hozrot Daudor mizmor.

¹ O Mabud, tumar bol-takkote bashshae kushi korra, tumi zuddot zitanie tain kub kushi-bashi korra.

² Tan monor asha tumi furaiso, tan mukor abdarre tumi firai diso na. Sela

³ Bout rohom-borkot loia tumi tan gese aiso, ḳaṭi shunar mukuṭ-taz tan matat findaiso.

⁴ Bashshae tumar dorbaro saila zindegi, ar tanre dilae tumi siroḳalor hayati.

⁵ Tumar deoa zoye baṛaise tan ijjot, gourob-mohima diso tane tumar-u rohomot.

⁶ Tanre diso tumi siroḳalin borkot, tumar fak didaro diso tanre kushir niamot.

⁷ Bashshae to Mabudor ufre-u borosha ḳoroin, Allatalar doya-mayae tain mozbut roin.

⁸ O bashsha, tumar ate dushmon falre dorbo, ḍain ate tumar birudire tallash ḳori anbo.

⁹ Tumi aibar ḳalo itare agunir kunḍoli banaibae, aguine tarare a ḳori gilbo Mabudor gusae.

¹⁰ Dunia taki miṭailibae itar aolad oḳlor nam, Adom zat taki fusilibae tarar shob ḳandan.

¹¹ Tumar bifokke ku-motlobe fand fatise tara, tarar ita hoḳolta-u oibo beḳama.

¹² Tarar mukre nishan ḳoria tumar donuko marle ṭan, fiṭ guraia bagia tara basaito saibo zan.

¹³ Tumar bol-shokti zair ḳoro ogo amar Alla, gan-baznae gaimu amra tumar lila-ḳela.