ꠎꠛꠥꠞ ꠡꠞꠤꠚ 11 - Siloṭi Asmani Kitab (Latin lipi)

al-Zobur 11

Gan-baznar forisaloḳor lagi: Hozrot Daudor mizmor.

¹ Ami to Mabudor gese-u asroy loisi, te tumra ḳene amare ḳoirae, “O faki, tumar asroy faṛedi bagia zao.

² Bojjator dole donukre furafur zuit ḳori dorse, shorol manshore andarit marto ḳori tir lagaise.

³ Bangia foṛi zae zudi shomazor mul filar, ila oile kita ḳorbo zara forezgar?”

⁴ Mabud to roin tan fobitro mukamo, tan arosh-kursi boail ase asmano, adom zatire raḳoin tan sokur nozoro.

⁵ Bala-bura hoḳolre zasai koroin Mabude, zalim oḳol tan dushmon, gin ḳoroin tarare.

⁶ Bojjator ufre ḍaliba tain zalail gondoḳ ar angra, gorom agunir gulla-u oibo tarar ḳani-fani hamesha.

⁷ Mabud nize forezgar, fosond ḳoroin forezgarre, hok-nikut bondae faiba tan mukor didarre.