ꠎꠛꠥꠞ ꠡꠞꠤꠚ 10 - Siloṭi Asmani Kitab (Latin lipi)

al-Zobur 10

¹ Mabud go, tumi kene duroi roirae? Bifodor ḳalo kitallagi lukairae?

² Zalimor bahadurie duki-ḳangal buge, heshe tarar soturir fando tara-u dora foṛe.

³ Mondo zone tar monor bojjatir bahaduri deḳae, lubi manshe Mabudre tuchcho mono ḳoria galiae.

⁴ Beṭagiri koria mondo luke sae na tan didar, Alla bolte ḳeu nai, ola ekin tarar.

⁵ Duniabi zindegi hamesha laboban tarar, tarar souke deḳe na to hok insaf tumar, “Ita bule bout ufre,” oḳan tara ḳoy, “Amar birudire fu dia uṛailimu nichchoy.”

⁶ Mone mone ḳoy tara, “Amar kunu foton nai, kunu zuge kunu din-u bifod-afod aito nae.”

⁷ Tar mato lannot ar danda, zur-zulume bora, zifra bora naformani bojjatir boshot ḳana.

^8-9 Nirai zonglar maze he ut fatia boy, nirjon zagat ni-oforadire kun ḳorat roy. Oshohae-obaga oḳol tarar duio souḳor nishana, shinghoe zela ḳaf doria zonglat boy lukaia, duki zonre dorar lagi tara-o ola boy, doria tare ṭania ani fando harai toy.

¹⁰ Fando harai norom ḳori fishia surmar ḳore, oshohae-obaga zon tarar nokur tabat foṛe.

¹¹ Mone mone ḳoy tara, “Allae ita deḳoin na, tan muk to lukailisoin, itar baedi sain-o na.”

¹² O Mabud zoldi ao, tumar atḳan baṛao, duki-ḳangalre na fauria zan ḳan basao.

¹³ Naformane ḳene ḳore Alla Pakre elami? Mone mone ḳene ḳoy, “Tain hishab loiba ni?”

¹⁴ Otoso tumi to duḳ-mosibot deḳrae, erar zimmadari tumar ator ḳobzae. Oshohae zone to tumar ato-u nizore shofe, tumar gese-u asroy fae etim-miskine.

¹⁵ Naforman bojjator bol oḳon bangilao, tarar hoḳol bod ḳamor hishab tumi loilao.

¹⁶ Sirodin siroḳal Mabud-u oila bashsha, tan zomin taki bidormi zati shorbonash oiba.

¹⁷ Mabud go, ḳangal-dukir asha tumi fura ḳoro, tarar mono shaosh zugai dilor foriad huno.

¹⁸ Etimor bae sao go Alla, bisar ḳoro shob zalimor, ḍor deḳani bond ḳorilao maṭir foyda manushor.