ꠁꠘ꠆ꠎꠤꠟ ১৮: ꠚꠤꠟꠤꠝꠘ 1 - Siloṭi Asmani Kitab (Latin lipi)

Hozrot Paulusor salam

¹ Ami Paulus, Isa al-Mosir lagi bondi asi. Ami ar amrar bai Timotie, amrar logor toblig korra mayar dust Filimonor gese leḳram.

² Boin Afia, amrar loge imanor zudda Arkipas ar tumar baṛir zomator hoḳolre salam zanairam.

³ Amrar gaibi baf Alla Pake ar Hozrot Isa al-Mosie tumrar ufre rohomot ar shanti nazil ḳoroukka.

Hozrot Pauluse Filimonor tarif ḳorla

⁴ Ami hamesha munazator shomoy tumar ḳota iad ḳoria Allar shukria adae ḳori.

⁵ Ḳaron Hozrot Isa al-Mosir ufre tumar iman ar pak bonda oḳlor bae tumar mohobbotor ḳota ami hunchi.

⁶ Ami dua ḳori, mumin oḳlor loge tumar ḳatir-shomporko aro baṛouk. Tumi to zano, al-Mosir ḳatire Allae amrare ḳoto bala bala niamot bilai disoin.

⁷ Bai, tumar mohobbot dekia ami kub kushi oisi ar utshaho faisi, tumi to Allar pak bonda oḳlor dilo aram diso.

Onisimre firot neoar lagi onurud

⁸ Tumar i bab dekia ami tumare ekkan ḳota ḳoitam sairam. Ami to al-Mosir name tumare hukum ditam farlam one, tumar ḳam fura ḳorar lagi.

⁹ Oile mohobbotor ḳatire hukum na dia tumare minot ḳoriar. Ami Paulus ou murobbi boyosho al-Mosir lagi bondi halote tumar gese i minoti korram.

¹⁰ Amar aolad Onisimor lagi arzi zanairam, ami zelo bondi taḳa halote he iman ania amar aolad bonigese.

¹¹ Eḳ shomoy tumar gese he beḳama asil, oile oḳon amar ar tumar gese he bout ḳamaora bonigese.

¹² Zai ouk, amar zanor taki beshi mayar ou manshore ami tumar gese firot faṭairam.

¹³ Ami tare amar gese raḳtam saislam, zate kush-ḳobrir dae bondi halote tumar oia he amar kezmot ḳorto fare.

¹⁴ Oile tumar izazot saṛa ami kunta ḳorlam na, zate zur ḳoria tumar bala ḳam adae ḳora na lage. Ami sairam, tumi niz taki-u ou ḳam ḳoro.

¹⁵ Tumi zate siroḳalor lagi tare firia fao, oito fare ou ḳarone-u he tumar ges taki tuṛa dinor lagi horia asil.

¹⁶ Oile tumi oḳon tare ar gulam hishabe faitae nae borong gulam taki boṛo, mani mayar bai hishabe faibae. Ḳas ḳori he amar kub mayar manush, oḳon tumar gese-o he aro mayar, ḳali roḳto-mangshe nae, imandar bai hishabe mayar.

¹⁷ Erdae tumi zudi amare eḳoi imanor bagi zano, te amare zela kobul ḳorar ḳota, tare-o ola kobul ḳorio.

¹⁸ He zudi tumar kunu ḳeti koria taḳe ar tar gese tumar kunu faona taḳe, te mono ḳorio, i faona tumi amar gese fao.

¹⁹ Ami Pauluse nizor ate lekia zanairam, tumar faona ami dilaimu. Ashole ami koitam sairam na ze, tumar nizor zanor lagi-u tumi amar gese rini aso.

²⁰ Bai Filimon, Allar oaste ekkan ḳam ḳoro, eḳzon imandar bai hishabe amar zano aram deo.

²¹ Tumi amar ḳota raḳbae zania-u, tumar gese ou siṭikan leḳlam. Ami mono ḳori, ami zeta ḳorar lagi koiram, er taki beshi tumi korbae.

Hozrot Paulusor shesh ḳota

²² Huno, aro ekkan ḳota ḳoiram, tumi amar lagi memanor kuṭa ṭik koria rakio. Ḳaron ami asha ḳorram, tumrar duar usillae amare tumrar gese firot deoa oibo.

²³ Abu-Farase tumare salam disoin, tain Isa al-Mosir lagi amar loge oia bondi asoin.

²⁴ Ar amar logor tobligkari Markus, Aristakus, Dimas ar Luke-o tumare salam zanaira.

²⁵ Amrar Hozrot Isa al-Mosir rohomot tumrar dilo ḳaim rouk. Amin.