ꠔꠃꠞꠣꠔ ৪: ꠡꠥꠝꠣꠞꠤ 19 - Siloṭi Asmani Kitab (Latin lipi)

Kurbanir lal gair sali

¹ Erbade Mabude Musa ar Harunre ḳoila,

² “Tumra Boni Israilre ḳo, Mabude shoriotor hukum mafik bataisoin, tumra furafur lal rongor egu ḍeki goru loia amrar gese ao, ou ḍeki shullo-ana nikut oito, ar tair ḳando kunudin zual lagani oise na.

³ Ogu ania tumra imam Ali-Azoror gese dibae. Imame iṭare kempor bare nia tan samne zobo ḳoraiba.

⁴ Zobor bade tan angulo kisu lou loia Milon-tambur samna bae shatbar siṭaiba.

⁵ Tan samne-u ou gair ḳal, gust, lou ar gufor shudda at-boṛ aguindi zalailio.

⁶ Ou ḍekire zalanir shomoy imame debdaru gasor kisu daru, esub gasor ḍeṭa, ar lal rongor kisu sutare ou agunir maze falaiba.

⁷ Bade tain naiba, ar finnor ḳafoṛ-sufoṛ-o doiba. Naia-doia harle tain kempor bitre zaita farba, oile hainja forzonto tain nafak halote roiba.

⁸ Ze zone ou ḍekir hoḳolta zalaibo, he-o naia hari kafoṛ-sufoṛ doibo ar hainja forzonto nafak roibo.

⁹ Ou ḍekir zalail sali kanain kunu fak-saf manshe tulia nia, kempor bare kunu pak zagat toibo. Boni Israile fak-saf oar fani tiar ḳorar lagi ou salire zotone toiba. Bade nafak taki fak-saf oar ḳalo ou fani kamo lagaiba.

¹⁰ Ze zone ou sali tulbo, he-o tar ḳafoṛ-sufoṛ doite oibo ar hainja forzonto nafak roibo. Iṭa Boni Israil ar tarar maze boshot ḳorra hoḳol zatir lagi siroḳalin niom.

Mora lash soar niom-ḳanun

¹¹ “Ḳeu zudi kunu murdar lash soilae, te shat din bora he nafak roibo.

¹² Lash soar tin nombor ar shat nombor din, fak-saf oar fobitro fani dia nizore doia harle he fak-saf oibo. Ar i niom na manle he nafak-u roibo.

¹³ Lash soar bade ḳeu zudi fak-saf na oy, te he Mabudor gorre nafak banae. Ou zonre Boni Israilor shomaz taki fusilibae. Pak-saf oar fani tar shorilo na siṭanie, tar nafaki tar loge roibo.

¹⁴ “Ar tambur bitre kunu manush morigele, zera ou tambut hamaiba ar zera tambut asla, tara hoḳol-u shat din bora nafak roiba.

¹⁵ Ou boshot tambur bitoror zeta tal-bashon hora dia gura asil na, ota-o nafak oizibo.

¹⁶ “Bondor maze kula zagat falail kunu lashre zudi keu soilae, te he shat din bora nafak roibo. I lash kunu laṛair ḳarone ouk, ba emne mora ouk, zera soibo era nafak. Kunu mora manshor aḍḍi ba ḳoyborre soile, he-o shat din bora nafak roibo.

¹⁷ “Ola nafak manshore fak-saf ḳorar niote ze lal ḍekir gust zalani oise, ogur kisu sali eḳṭa gamlat loia, ou gamlat futor fani borte oibo.

¹⁸ Bade kunu fak-saf manshe esub gasor ḳoyṭa ḍeṭa ania fanit buṛaia hou murdar tambu, er bitoror hoḳol mal-samana ar manshor ufre siṭai diba. Zoto zone emne mora, ba kun oia mora kunu murdar lash, morar aḍḍi-guḍḍi ba ḳoybor soise, tarar ufre-o ou fani siṭai diba.

¹⁹ Pak-saf ou zone nafak manshor ufre haftar tin nombor ar shat nombor din fani siṭai diba, ar shat nombor din tara fak-saf oiba. Tara gusol ḳoria finnor ḳafoṛ-sufoṛ doiba, ar ou shat nombor dinor hainja taki fak-saf bonba.

²⁰ Oile nafak oar bade ḳeu zudi nizore fak-saf na ḳore, te tare shomaz taki fusia falaibae. He nizore nafak rakia Mabudor Herem Shorifre-o nafak banaise. Pak-saf oar fani tar ufre na siṭanie, he nafak roise.

²¹ Ita oibo Boni Israilor lagi eḳṭa siroḳalin niom. “Ze zone ou fak-saf oar fani siṭaiba, ein nize-o tan ḳafoṛ-sufoṛ doite oibo. I fak-saf oar fani kunu manshe soile, he hainja forzonto nafak roibo.

²² Nafak halote i zone zotota soibo, ita hoḳolta nafak oizibo, tar soa kunu zinish zegie soibo, he-o hainja forzonto nafak roibo.”