আছমানি কিতাব: মালাখি 1 - Siloṭi Asmani Kitab (Latin lipi)

¹ Malaki nobir usillae Boni Israilor gese Mabudor ohi.

Boni Israilre Allar mohobbot

² O Boni Israil, ami Mabude ḳoiram, ami to hamesha tumrare mohobbot ḳori. Oile tumra ḳoirae, “Tumi kila amrare mohobbot ḳorlae?” Te huno, Ish kita Iakubor bai asil na ni? Oile ami to tumrar ḳandanor murobbi Iakubre mohobbot ḳorsi,

³ ar Ishʼre horaia raḳsi. Ami tar faṛ oḳol binash ḳorsi, tar biṭa-maṭi morubumir hialor aḳra banaisi.

⁴ Ishʼor aolad Idumi oḳole ḳoito fare, “Amrare surmar ḳora oile-o amra i surmar ḳora hoḳolta hirbar banailimu.” Oile ami Alla Rabbul Alamine ḳoiar, tara ita banaile-o ami bangilimu, ikanre ḳoa oibo, ‘Naformanir desh, ze deshor manshor loge Mabude hamesha gusa ḳoroin.’

⁵ I halot tumrar nizor souke dekia ḳoibae, “Israil deshor shimanar bare-o Mabudor takkot ḳaim ase.”

Imam oḳlor gafloti

⁶ O imam oḳol huno, ami Alla Rabbul Alamine ḳoiar, fuainte tarar bafre ijjot ḳoroin, saḳore-o tarar malikre ḍorain. Ou laḳan ami eḳzon malik oile, amar bae ḍor-ḳof kuai? Ar ami eḳzon baf oile amar faona ijjot kuai? Tumra-u to amare beijjot ḳorso. Oile tumra hirbar ḳoirae, “Amra kila tumare beijjot ḳorlam?”

⁷ Tumra to amar kurbani kanar ufre nafak kurbani dirae. Dia ḳoirae, “Amrar kurbani nafak oilo kila?” Tumra buzairae Mabudor kurbani kana kunta-u nae.

⁸ Ami Alla Rabbul Alamine zikairam, kurbanir niote tumra zebla anda foshu loia ao, ita kunu ṭik oy ni? Ar lula-lengṛa, bemari foshu kurbani deo, ita ṭik ni? Tumrar deshor razare oula foshu ufohar dia deḳo sain, tain kushi oin ni? Ar tumrar abdar raḳoin ni?

⁹ Huno, Alla Rabbul Alamine ḳoiram, tumra amar dorbaro rohomot mangile kunu lab oibo ni? Tumra zebla nizor ate-u olaḳan kurbani deo, te ami ar tumrare rohom ḳormu kila?

¹⁰ Haere hae! Tumrar maze eḳzone-o zudi amar Baytul-Mukaddosor geiṭ ḳanain bond ḳorilto, tumra amar kurbani kanar ufre beḳamaya aguin na zalaitae, te ami kushi oilam one. Oḳon to ami Mabud tumrar ufre kushi nae, ar tumrar at tone kunu lilla-sodga-o kobul ḳortam nae.

¹¹ Huno, Alla Rabbul Alamine ḳoiar, duniar eḳ mata taki aroḳ mata forzonto tamam zatir maze amar kudroti shan ḳaim or. Tamam zomino amar name agor batti zalani or, manshe faḳ-saf lilla-sodga dira. Hoḳol zatir maze-u to amar shan-shouḳot ḳaim ase.

¹² Oile tumra amar namre beijjot ḳorrae. Tumra to ḳoirae, “Mabudor kurbani kana kunta-u nae, i kurbanir kunu dam-u nai.”

¹³ Amare beijjotir niote ḳoirae, “Ita to ḳamoḳa ḳoshṭo deoa!” Te Alla Rabbul Alamine ḳoiar, tumra ḍaḳati kora, ar lula-lengṛa, bemari foshu ania kurbani dirae, ami kunu ota kurbani tumrar at tone kobul ḳormu ni?

¹⁴ Ami Alla Rabbul Alamine ḳoiar, ḳeuror falor maze nikut meda foshu ase, ogure kurbani korar lagi he nioto ḳorse, oile bade ṭogami kori kunu kut-ala foshu Mabudor name kurbani dey, tar ufre lannot foṛouk! Ami to mohan bashsha, tamam zatie amare tazim ḳore.