ꠔꠃꠞꠣꠔ ৩: ꠟꠦꠛꠤꠀꠘ 1 - Siloṭi Asmani Kitab (Latin lipi)

Zalail kurbani adae ḳorar niom

¹ Ou fobitro Kaba gor mani Milon-tambu bananir bade, Mabude Musa nobire ono anaia ḳoila,

² “Tumi hoḳol Boni Israilre zanai deo, ḳeu zudi kurbani hishabe Mabudor dorbaro kunu foshu dito sae, te goru ba sagol-meṛar fal taki foshu ania kurbani dilauk.

³ “Kurbani deorae zudi gorur fal taki zalail kurbani adae ḳorto sae, te furafur nikut egu bisal ante oibo. Ania Mabudre kushi korar niote ou bisalre Milon-tambur duaror gese loia aibo.

⁴ Aia zalail kurbanir niote ana ou bisalor ḳollar ufre at toibo, teu tar gunar kofora hishabe iṭare kobul ḳora oibo.

⁵ Bade Mabudor samne ou bisalre he zobo ḳorbo. Ar imam Harunor ze fuainte imamoti koroin, tara ou bisalor lou nia Milon-tambur duaror samnor kurbani kanar sairo galat siṭai diba.

⁶ Bade kurbani deorae ou bisalor ḳal ḳalia hari, ogur gust ṭukra ṭukra ḳorba.

⁷ Ar imam Harunor fuainte kurbani kanar ufre zalail angra toiba, er ufre daru hazaiba.

⁸ Hazaia ou darur ufre bisalor ḳolla, sorbi, gustor ṭukrain toiba.

⁹ Kurbani deorae gorur ṭeng ar feṭor bitoror hokkolta fani dia doia saf ḳoria diba, ar imame ota nia asta bisalor hokkolta kurbani kanar ufre zalailiba. Iṭar nam oilo zalail kurbani, Mabudor name agunit deoa kurbani, ou dumar gerane tain kushi oin.

¹⁰ “Ar kunu manshe zudi sagol-meṛar fal taki zalail kurbani adae ḳorar kiali oy, te ikṭa furafur nikut egu faṭa oite oibo.

¹¹ Kurbani deorae ikṭare kurbani kanar uttor galat nia Mabudor samne zobo ḳoria harle, imam Harunor ze fuainte imamoti koroin, tara ogur lou nia kurbani kanar sairo galat siṭai diba.

¹² Bade kurbani deorae iṭar gust ṭukra ṭukra ḳori kaṭia dile, imam sabe ogur sorbi, ḳolla ar gustor ṭukrain nia kurbani kanar zalail angrar ufror darur ufre hazaiba.

¹³ Kurbani deorae iṭar ṭeng, feṭor bitoror hokkolta fani dia doia saf ḳoria diba, ar imam sabe ita hokkolta shomet asta foshure kurbani kanar ufre zalailiba. Iṭa oilo zalail kurbani, Mabudor name agunit deoa geran ala kurbani, ou dumar gerane tain kushi oin.

¹⁴ “Ar kunu faki dia zudi Mabudor namor ou zalail kurbani adae ḳorar kial oy, te kurbani deorae ḍufi faki ba faro loia aibo.

¹⁵ Aile, imame kurbani kanar daro gia ou fakir ḳolla mura maria siṛia algaia hari kurbani kanar ufre ou ḳollare zalailiba, ar ogur lou nia kurbani kanar ek galat siṭai diba.

¹⁶ Imame fakir bitoror gila-toli ar foir nia kurbani kanar fub galar salir ṭekir maze falai diba.

¹⁷ Ar ogur ḍaḳnat doria ola baṭe siṛiba, zate iṭar dui ṭukra furafur alog na oy. Bade imam sabe iṭa nia kurbani kanar zalail angrar ufror darur ufre toia zalailiba. Iṭa-o oilo zalail kurbani, Mabudor name agunit deoa geran ala kurbani, ou dumar gerane tain kushi oin.