ꠀꠍꠝꠣꠘꠤ ꠇꠤꠔꠣꠛ: ꠁꠃꠘꠥꠍ 3 - Siloṭi Asmani Kitab (Latin lipi)

Ninob ṭauno toblig kora

¹ Bade Iunusor ufre dusrabar Mabudor ou ohi nazil oilo.

² Tain ḳoila, “Tumi roana deo, oḳon hou boṛo ṭaun Ninob zao, ar ami tumare zeta batai dimu tumi outa tarar gese elan ḳoro.”

³ Mabudor hukum mafik Iunus roana oia Ninob gela. Ninob oilo kub boṛo ṭaun, i ṭaunor eḳ mata taki aroḳ matat zaite tin din lagto.

⁴ Iunus hou ṭauno hamaia eḳdinor fot gela, gia elan ḳorla, ḳoila, “O Ninobor bashinda oḳol, ar sallish din bade Ninob ṭaun uloṭ-faloṭ oizibo.”

⁵ Ikan hunia Ninobor manshe Allar ufre iman anla, tara ruza raḳar lagi elan ḳorla, ar huru-boṛo hoḳole duk zair ḳorar lagi solar soṭ findila.

⁶ I kobor gia bashshar dorbaro azilo, tain-o bashshai godi saṛia finnor lebas kulia, solar soṭ findia salir maze boila.

⁷ Ar tain asta Ninob ṭauno ou elan ḳoraila, “Bashsha ar tan uzir-nazir oḳlor hukum oilo: manush ba foshu, goru-sagol ḳeu kunuzat dana-fani kunta-u muko dio na.

⁸ Manush ar foshu, hoḳole milia solar soṭ findia dile-zane Allar nam lo, hoḳole zarzir naformanir fot saṛo ar zur-zulum bad dia Allar bae firo.

⁹ Oito fare Allae rohom ḳorba, gozobor kial bodlailiba, tan dau dau ḳora gusa one ṭanḍa oizibo, ar amra binash oitam nae.”

¹⁰ Allae tarar i halot deḳla, tara zarzir naformanir fot bad dia touba ḳorsoin. Dekia tain-o tan agor sinta bodlailila, tarare binash ḳorar ḳota ḳoile-o oḳon ar binash ḳorla na.