ꠀꠍꠝꠣꠘꠤ ꠇꠤꠔꠣꠛ: ꠁꠃꠘꠥꠍ 1 - Siloṭi Asmani Kitab (Latin lipi)

Hozrot Iunus (a:) bagi zaoa

¹ Mattar fua Iunusor gese Mabudor ou ohi nazil oilo,

² “Tumi roana deo, ar Ninob namor hou boṛo ṭauno zao, gia amar gozobor ḳota zanao. Tarar naformani amar dorbaro zair oigese.”

³ Oile Iunuse Mabudor hukumor borkelaf ḳoria bagia Spen desho zaoar lagi roana oigela. Tain Jafa namor zazor gaṭo gia Spen desho zaora ekkan zaz faia, zazor baṛa adae ḳoria bitre hamaia Mabudor samne tone bagita ḳori naiaintor loge oia roana dilaila.

⁴ Oile Mabude doriar maze eḳ bezuita tufan saṛila. Tufanor ṭelae zazḳan bangi zaoar dosha oilo.

⁵ Naiainte ḍoraia zarzir devtar gese ḳanda-ḳaṭi korat lagla. Ar zazor bar ḳomanir lagi mal-samana doriat falai dilo. Oile Iunus zazor tolor talat lamia huti roila, hutia bedum gumo foṛla.

⁶ Ou shomoy zazor sharong Iunusor gese gia ḳoila, “Oi mia! Tumi kemne gumairae? Kunta hunrae nae ni? Uṭo, tumar devtare ḍaḳo. Oito fare tain amrar bae kial ḳorba, amrar zan binash oito nae.”

⁷ Bade naiainte eḳe-oinne ḳoilo, “Ao amra loṭari maria deki, ḳar dushe i mosibot aise.” Teu tara loṭari marlo ar loṭarir maze Iunusor nam uṭlo.

⁸ Ou tara tanre zikaila, “Ḳo sain, ḳar dushe amrar ufre i mosibot aise? Tumi kita ḳam ḳoro? Kuai taki aiso? Kun deshor manush? Tumi kun zator manush?”

⁹ Iunuse zuaf dila, “Baiainre, ami eḳzon Ibrani, Israil zatir manush. Ami behestor malik Alla Mabudor ebadot ḳori, tain-u doria ar zomin foyda ḳorsoin.”

¹⁰ Tain aro ḳoila, Mabudor samne tone bagibar niote tain aia zazo uṭsoin. Ikan hunia tara kub ḍoraia ḳoila, “Hae, hae! Tumi ita kun zator ḳam ḳorlae?”

¹¹ Doriar tufan zebla aro bezuita bab dorlo, ou shomoy tara tanre zikailo, “Amra tumare kita ḳorle doria tir oibo?”

¹² Iunuse zuaf dila, “Amare doria doriat falai deo, teu doria shanti oizibo. Ami to zani, amar dushe-u afnaintor ufre i gozobi tufan aise.”

¹³ Oile naiainte tane na falaia zazḳan kinaro biṛanir lagi zan-foran shofia daṛ baila, tufanor zur ḳali baṛte-u roilo, erdae tara zazḳan kinaro nita farla na.

¹⁴ Teu tara Allar gese foriad ḳorlo, ḳoilo “O Mabud, rohom ḳoro, ou manshor zanor lagi tumi amrare mario na, i ni-oforadir zanor ḳarone amrare dayi korio na. O Mabud, ita hoḳolta-u to tumar munsha.”

¹⁵ Bade tara Iunus nobire doria doriat falai dilo, ar doriar tufanor ḍeu dom loililo.

¹⁶ I halot dekia tara Mabudre kub ḍoraila. Tara Mabudor name foshu-kurbani dila ar mannot manla.

¹⁷ Mabude kub boṛo eḳ masre zugai toisla Iunusre gililibar lagi, tain tin din, tin rait hou masor feṭo roila.