ꠔꠃꠞꠣꠔ ১: ꠙꠄꠖꠣ ꠘꠣꠝꠣ 1 - Siloṭi Asmani Kitab (Latin lipi)

Hozrot Adom (a:) (1:1—5:32) Asman-zomin foyda

¹ Foyla-u Allae asman ar dunia foyda ḳorla.

² Duniai niraḳar ar ḳali asil, goin fanir ufre fura andair asil. Allar ruhu er ufre solasol ḳorta.

³ Bade Allae formaila for ouk, ar for oilo.

⁴ Allae deḳla for bala. Tain andair taki forre alga ḳoria

⁵ er nam raḳla din, ar andairor nam raḳla rait. Hainja gelo, bian-o gelo, ikṭa oilo foyla din.

⁶ Bade Allae formaila, fanir maze gumbuzor laḳan faḳ zaga ouk, ar fani dui bag oizauk.

⁷ Ar Allae faḳ zaga foyda ḳoria, tolor ar ufror fani alga ḳorla. Ar oula oilo.

⁸ Allae gumbuzor laḳan ze zaga banaila, tar nam raḳla asman. Hainja gelo, bian-o gelo, ikṭa oilo dui nombor din.

⁹ Erbade Allae formaila, asmanor tolor fani eḳ zagat dola ouk, ar hukna zaga deḳa zauk. Ar oula oilo.

¹⁰ Allae hukna zagar nam raḳla zomin ar zomail fanir nam doria. Tain deḳla ita bala.

¹¹ Bade Allae formaila, zomino gash folouk; ar hoḳol zator bisala lota-fata gas-gasalir zonom ouk. Ar zominor ufre hoḳol zator folor gas-o ouk, era nizor zatmoto fol dorbo ar folor maze zarzir bis-o taḳbo. Ar oula oilo.

¹² Zomino gash folilo, hoḳol zator bisala lota-fata gas-birik zonmilo. Zominor ufre hoḳol zator folor gas oilo zetae zarzir zatmoto fol dore, hi folor maze zarzir bis-o ase. Allae deḳla ita bala.

¹³ Hainja gelo, bian-o gelo, ikṭa oilo tin nombor din.

¹⁴ Bade Allae formaila, asmanor maze oula serag oḳol ouk, zara rait taki dinre alga ḳore. Ita alga alga din, bosor ar id-utshobor nishana oibo.

¹⁵ Asman taki tara duniair ufre for dibo. Oula-u oilo.

¹⁶ Allae duiṭa boṛo serag banaila, ermaze boṛoṭare dinor ufre bashshai korar lagi ar huruṭare raitor ufre. Ita saṛa tain tera oḳol-o foyda ḳorla.

¹⁷ Tain erare asmanor maze boaila zate tara duniait for dey.

¹⁸ Era din ar raitor ufre bashshai kore, andair taki forre alga ḳore. Allae deḳla ita bala.

¹⁹ Hainja gelo, bian-o gelo, ikṭa oilo sair nombor din.

²⁰ Bade Allae formaila, fanir maze zandar oḳol fale fale bori zauk, ar duniair ufre asmanor maze fakin uṛouk.

²¹ Ar Allae doriar biraṭ zandar oḳol, ar fanir maze fal bandia gurra hoḳol zator zandar foyda ḳorla, ar hoḳol zator faki-o foyda ḳorla. Tain deḳla ita bala.

²² Tain tara hoḳolre ou laḳan borkot nazil ḳorla, tumra folala oia baṛo ar doriar fani bori zao, duniair maze faki oḳol-o baṛouk.

²³ Hainja gelo, bian-o gelo, ikṭa oilo fas nombor din.

²⁴ Erbade Allae formaila, maṭi taki oula zandar ouk zarar nizor zat oḳolre baṛaibo, erar maze fala heman, maṭit solra huru-muru zandar ar zongli zanuar oḳol-o. Oula-u oilo.

²⁵ Allae duniair maze hoḳol zator zongli zanuar, fala heman ar maṭir maze buke solra zandar banaila. Tain deḳla ita bala.

²⁶ Erbade Allae formaila, ao amrar surote amrar loge mil rakia manush banai. Tara doriar mas, asmanor faki, zanuar, maṭir maze buke solra zandar, ar asta duniair ufre bashshai korouk.

²⁷ Tain tan nizor surote manush foyda ḳorla, ekkere nizor moto ḳori foyda ḳorla, foyda ḳorla beṭa ar beṭi.

²⁸ Ar tarare borkot nazil ḳoria ḳoila, tumitain folala oia baṛia duniai borizao. Duniaire shashon ḳoro, ar doriar mas, asmanor faki, maṭir ufre solra hoḳol zandaror ufre bashshai koro.

²⁹ Erbade Allae formaila, huno, duniar ufror hoḳol zator bisala gas-birik, ar hoḳol zator folor gas zarar nizor zatmoto fol dore zar folor maze tarar nizor bis ase, ita hoḳolta ami tumrar ḳanir lagi dilam.

³⁰ Duniar forteḳ zanuar, asmanor fakin, maṭir maze buke solra zandar, ita hokkol zandaror ḳanir lagi ami hoḳol lota-fata ar gash dilam. Oula-u oilo.

³¹ Allae tan foyda ḳora hoḳolta deḳla, ita hoḳolta-u kub bala oise. Hainja gelo, bian-o gelo. Ikṭa oilo soy nombor din.