ꠔꠃꠞꠣꠔ ২: ꠢꠤꠎꠞꠔ 1 - Siloṭi Asmani Kitab (Latin lipi)

Allae Boni Israilre azad ḳorla (1:1—15:21) Boni Israilor ufre zulum

¹ Allae Hozrot Iakubor noya nam disla Israil, erlagi tan bongshor nam oilo Boni Israil. Iakube tan bibin-baichchain ar foribaror hoḳolre loia Mishor desho gelagi. Ou shomoy tan loge oia zera gela, erar nam oilo,

² Ruben, Shimion, Lebi, Ehuda,

³ Isaḳor, Sobulon, Bin-Iamin,

⁴ Dan, Noftali, Sadu ar Ashir.

⁵ Iakubor bongshor hokkoltae milia shottoir zon asla. Ar Iusuf ag taki-u Mishoro taḳta.

⁶ Bade Iusuf, tan baiain, ar hi amolor hoḳol mara gela.

⁷ Oile tarar bador bongshodor baṛia kub bolala oila. Era sairobae sitria asta Mishor desh borigela.

⁸ Ermaze Mishoro eḳzon noya bashsha oila, ein Iusufre sinoin na.

⁹ Ein nizor proza oḳolre ḳoila, “Saia deḳo, Boni Israil amra taki beshi-o ar bolala-o.

¹⁰ Te ao, amra eḳ fondi kori, ita zenu ar na baṛoin. Arnae tara baṛia heshe zuddor ḳalo amrar dushmonor loge milia amrar birudde zuddo ḳorbo, bade amrar desh taki zaibogi.”

¹¹ Teu tara shordar lagaila erare maria-doria zur-zulum ḳoria ḳam ḳoranir lagi. Era Feraunor foshol raḳar lagi Pitum ar Ramashesh namor duiṭa ṭaun-o banaila.

¹² Oile erar ufre zoto beshi zur-zulum ḳora oilo, era-o oto beshi baṛila ar sitrila. Erlagi Mishori oḳole Boni Israilre kub ḍoraigela.

¹³ Ḍoraia eraredi aro ḳoṭin ḳam ḳoraila.

¹⁴ Maṭi kam, iṭor ḳam ar ḳetor maze ḳoshṭor ḳam ḳoraia erar zanre titta banaililo. Ar tara zur-zulum ḳoria nisṭur-fashanor laḳan ḳam ḳoraito.

¹⁵ Bade Mishoror bashshae Shifra ar Fuah namor duizon Ibrani dai beṭire hukum dila,

¹⁶ “Tumra Ibrani beṭintor dai girit gia, itar fuain foyda oile-u marilaio, ḳali fuṛintore zita rakio.”

¹⁷ Oile hi dai beṭinte Allare ḍoraita gotike, Mishori bashshar hukum na mania fuaintore-o zita raḳta.

¹⁸ Teu bashshae erare nia zikaila, “Ita ḳam ḳene ḳorlae? Fuaintore ḳene zita raḳlae?”

¹⁹ Tara zuaf dila, “Ibrani beṭin Mishori beṭintor laḳan nae, tara bout bolala. Daibeṭi tarar ḳasat zaibar age-u tarar hurutta foyda oizae.”

^20-21 Ou duio beṭie Allare ḍoraita ḳori, Allae rohomot ḳoria tarare-o aolad dila. Ar Boni Israil-o aro beshi kori baṛia kub shoktiman oila.

²² Ita dekia Feraune nizor proza oḳolre hukum dila, “Ibrani oḳlor kunu fuain oile-u tumra Nil nodo falai dio, ḳali fuṛintore zita rakio.”