ইঞ্জিল ১৩: ১-থিষল: 1 - Siloṭi Asmani Kitab (Latin lipi)

¹ Ami Paulus, bai Silas ar Timotie Tisholoniki ṭaunor zomator gese leḳram. Tumra amrar gaibi baf Alla Pak ar Hozrot Isa al-Mosir afon zon oiso. Tumrar ufre rohomot ar shanti nazil ouk.

Tisholoniki zomator iman

² Amra dua ḳorar bala hamesha tumrar zomator hoḳlor nam mono ḳoria Allar shukria adae ḳori.

³ Imanor lagi tumra ze ḳam ḳorrae, mohobbotor lagi tumra ze menot ḳorrae ar Hozrot Isa al-Mosir ufre asha-borosha ḳoria tumra ze sobor ḳorrae, ita amrar gaibi baf Allar dorbaro dua ḳorar shomoy hamesha mono ḳori.

⁴ O bai oḳol, Allar mayar bonda oḳol, amra zani, Allae-u tumrare fosond ḳorsoin.

⁵ Amrar kush-ḳobrir toblig kam to tumrar gese ḳali mukor ḳota-u roise na, borong Allai bol, Pak Ruhu, ar nichchit boroshar ufre salu oise. Tumrar balair lagi amra zebla tumrar loge roitam, ou shomoy kilan solchi, ita to tumra zano-u.

⁶ Tumra bout zulum-mosibotor maze-o Pak Ruhur deoa kushie amrar toblig kobul ḳoria, amrar ar malikor fote solrae.

⁷ Oula solia tumra Makidonia ar Gris deshor mumin oḳlor gese eḳ nishana oigeso.

⁸ Malikor kalam tumrar mazdi kali Makidonia ar Gris desho-u sitrise na, borong Allar ufre tumrar imanor ḳota hoḳol zagat-u sitrigese. I befare amra kunta matar zorur nae.

⁹ Hoḳol manshe-u to amrare ḳoira, tumra ḳoto ador ḳoria amrare kobul ḳorsilae, tara eoḳan ḳoira, tumra kila deb-debintor puja bad dia Allar foti oia, zinda hok Allar ebadot ḳorat aiso.

¹⁰ Ar murda oḳlor maz taki zenre zinda ḳori tula oise, hou Isa duniat aoar bar saitae faro. Tain oila Allar ḳas mayar zon Ibnulla, behest taki lamia aira, Allar ze gozob aia lamer, i gozob taki ou Isae amrare basaiba.