ꠎꠛꠥꠞ ꠡꠞꠤꠚ 5 - ছিলটি আছমানি কিতাব (বাংলা লিপি)আল-জবুর ৫ হজরত দাউদর মিজমর। 1 ও মাবুদ, আমার ফরিয়াদ কবুল করো, দিলর কান্দন আমার তুমার কানে হুনো। 2 ও আমার আল্লা, আমার বাদশা তুমি, আমার আওয়াজ হুনো তুমি দয়া করি, দোয়া-মিনতি করি তুমার গেছেউ খালি। 3 তুমি পরতি দিন ফজরে আমার বুলি তো হুনো, দিলর হক্কলতা হাজাই রাখি তুমার দিদারো। 4 তুমি তো ইলা আল্লা নায় খারাপি যার পছন্দ, তুমার মেহমান অইতো নায় কুনু পাপি জন। 5 বড়াই-বেটাগিরি দেখাওরার ঠাই নাই তুমার ছামনে, হকল লাখান নাফরমানি তুমি ঘিন্না করো নিজে। 6 মিছা কথা মাতরারে নিচ্চয় বিনাশ করো তুমি, মাবুদে তো ঘিন্নাইন বেশি খুন-খারাপি ছল-চতুরি। 7 অইলে তুমার দয়া-মায়ায় তুমার ঘরো হামাইমু আমি, নত অইয়া সইজদা করমু তুমার পবিত্র ঘর মুখি। 8 ও মাবুদ, আমার চাইরোবায় তো দুশমনে ভরা, তুমার পরেজগারির পথে মোরে নেও চালাইয়া, আমার ছামনে তুমার পথ করো ছহি-সুজা। 9 তারার মুখর কুনু কথাউ একিনর জুকা নায়, তারার দিল-মন ভরা খালি বিনাশর চিন্তায়, খুলা কয়বরর পচা লাশর লাখান তারার গলা, ফাম-পট্টি মারার উস্তাদ তো তারার জিফরা। 10 ও আল্লা, তুমি ইতারে দুষি সাইবস্তো করো, তারার সর্বনাশ অউক তারার পাতাইল ফান্দো, সীমা ছাড়া নাফরমানির দায় খেদাও অতারে, বিরুধিতা কররা তো অতায় তুমি আল্লার লগে। 11 অইলে তুমার ছায়াত বসতকারি খুশে-বাসে রউক, হর-হামেশা খুশির গজল তারা হকলে গাউক। তুমি বাচাও তারারে তুমার আশিক যারা, আমোদ-ফুর্তি করউক সবে তুমার নামে তারা। 12 তুমিউ মাবুদে পরেজগাররে দেও রহম-বরকত, রহমতর বেড়াদি তুমি তারারে রাখো নিরাপদ॥ |
© Ahle Kitab Society. All rights reserved.