ꠎꠛꠥꠞ ꠡꠞꠤꠚ 40 - ছিলটি আছমানি কিতাব (বাংলা লিপি)আল-জবুর ৪০ এবাদত-বন্দেগি পরিচালকর লাগি: হজরত দাউদর মিজমর। 1 ছবর করিয়া চাই রইছলাম আমার আল্লার লাগি, খিয়াল করি তাইন জুয়াপ দিলা আমার ফরিয়াদ হুনি। 2 গলাইমা গাড়া থাকি তুলিয়া আনলা মোরে, ফেকর গাতর মরন দশাত বাচাইলা আমারে। আমার পাওরে ভর দেওয়াইলা পাথরর উপর, শক্ত মাটিত ঠাই যুগাইলা আমার দুই পাওর। 3 যুগাই দিলা আমার মুখো নয়া গজল তান, অখন আমি গাই আমার আল্লার গুনগান। দেখবো ইতা বউত জনে, দেখিয়া ডরাইবো, তেউ তারা আল্লার উপরে ইমান আনিবো। 4 ধইন্য খালি হউ বন্দা, মাবুদউ যার ঠিকানা, ভুল পথে গিয়া যেতায় করে বড়াই-গরিমা, ইতার বায়দি হে তো ফিরিয়াও চায় না। 5 ওগো আমার মাবুদ আল্লা গনিয়া ফুড়াইল যাইতো নায়, তুমার কুদরতি কামর হিসাব আরো নানান চিন্তা-উপায়, জানাইয়া বা কইয়া আমি ফুড়ানির সাইধ্য নাই, তুমার তুল্য কে আছে, কেউ নাই কেউ নাই। 6 কুরবানি আর লিল্লা-ছদগায় খুশি অও না তুমি, খুশি অও না তুমি গো, খুশি অও না তুমি, চাও না তুমি জালাইল কিবা কফরার পশু কুরবানি, হুনার লাখ দুই কান দিছো মোরে হুনিয়া যানু মানি। 7 তেউ আমি কইলাম আল্লা, আইছি আমি অনো, লেখা আছে আমার বেয়াপার যেলা কিতাবো, 8 ওগো আমার আল্লা, আমি খুশি তুমার মর্জি পুরনে, হক্কল হুকুম গাথা আমার দিলর ভিতরে। 9 মহা জন-সমাবেশো আমি জানাইছি, তুমার হকল হক্কানি কামর খুশ-খবরি, আমার আওয়াজ বন্দ করি না ইতা তো জানো, তুমি স্বয়ং সাক্ষি আমার, ও মাবুদ গো। 10 লুকাইয়া রাখছি না মোর দিলর ভিতর, তুমি যে সঠিক হক্কানি জানাইছি খবর, তুমার দেওয়া নাজাত আর হক-হালালি কইছি হকলরে, দয়া-মায়া আর হক তুমি জানাইছি মহা সমাবেশে। 11 ও মাবুদ! বন্দ করিও না মোর লাগি তুমার রহমতর দুয়ার, তুমার দয়া আর হক অউক মোর চিরকালর কান্ডার। 12 দেখরায়নি! হিসাব ছাড়া মছিবতে বেরিলিছে মোরে, পেচাইলিছে আইয়া আমার হকল অপরাধে, দেখিয়ারনা কুন্তা আমি আমার চউখেদি, আমার মাথার চুল থাকিও ইতা তো বেশি, মোর পিঞ্জিরার মন ময়নাও ছাড়িয়া গেছইনগি। 13 ও আল্লা, তুমার দোহাই দিয়ার আমার জান বাচাও, মাবুদ গো, আমারে সাইয্য করাত জলদি আও। 14 আমার জানরে যেতায় নিতা চাইরা কাড়িয়া, নিচা অউক তারার মাথা শরমিন্দা বনিয়া। আমার খেতি অইলে যেতায় করবা খুশি, বেইজ্জত বনিয়া তারা বাগি যাউক খরেদি। 15 আমার খেতিয়ে যেতায় কইন, অইছেরে অইছে, মুখ লুকাইয়া হরউক অতা নিজর লাজ-শরমে। 16 অইলে খুশি-বাসি করউক তুমার আশিক বন্দার দলে, তুমার দেখাইল বাচার পথ ভালা পাইন যেতা জনে, হর-হামেশা জপি জপি ফুর্তি করউক তারা, তুমিউ মহান মউলা, তুমিউ মহান আল্লা! 17 দুখি কাংগাল জন তো আমি বড়ই অভাবি, আমার লাগি তো চিন্তা করইন মাবুদ এলাহি। তুমিউ মোর সাইয্যকারি জান বাচানির ঠিকানা, আমারে বাচাও গো মালিক দেরি করিও না॥ |
© Ahle Kitab Society. All rights reserved.