ꠎꠛꠥꠞ ꠡꠞꠤꠚ 38 - ছিলটি আছমানি কিতাব (বাংলা লিপি)আল-জবুর ৩৮ হজরত দাউদর মিজমর। ইয়াদগারি। 1 ধামকি দিও না গো মাবুদ গুছা করিয়া, সাজা দিও না মোরে রাগ করিয়া। 2 তুমার তীরর ফলায় তো গাথিলিছে মোরে, তুমার আতে গো মাবুদ জাতিয়া ধরছে আমারে। 3 তুমার গুছার চুটে আমার কায়ার হকল অংগ বেমার, এগু আড্ডিও ভালা নায় তো গুনার দায় আমার। 4 আমার নিজর বদ কামো আমি হাবুডুবু খাইয়ার, ইতা বড় কঠিন বোঝা-ভার লাগের আমার। 5 আমার বেআখলির লাগিয়া জখম অকল থাকিয়া, পচা দুর্গন্দ বার অর পচা ঘা অইয়া। 6 আমি উন্দা অইয়া গুজা বনিগেছি, মনর দুখে হারাদিন করি ঘুরাঘুরি। 7 আমার কমরর মাজে কতো জালা-যন্ত্রনা, আমার কায়ার কুনু অংগউ নায় তো ভালা। 8 চিন্তা করতে করতে আমি ভাংগিয়া চুরমার, দিলর জালায় আমি হামেশা কাতরাইয়ার। 9 মাবুদ গো তুমার দরবারোউ আমার দিলর চাওয়া-পাওয়া, আমার ভিতরর আহাজারি তো তুমার গেছে লুকাইল না। 10 আমার দিলে ডরাইয়া কাপের, শরিলর বল গেছেগি ছাড়িয়া, চউখে দেখার খেমতা মোর মোটেউ নায় ভালা। 11 আপন জন আর দুস্ত অকলে মোর কষ্ট দেখিয়া হরিয়া থাকে, আমার আরি-ফরি পরিচিত জনেও দুরই উবাই তামশা দেখে। 12 আমারে খুন করার মতলব যারার তারা ফান্দ পাতে, সর্বনাশ চায় যারা মোর তারা আমার বিরুদ্ধে মাতে। ছল-চতুরির ধান্দায় তারা হারা দিন থাকে। 13 কালুয়ার লাখান তো আমি কানে কুন্তা হুনি না, বোবার লাখান দশা আমার মুখ খুলি না। 14 অলান মানুষ অইছি আমি যেগুয়ে কুন্তা হুনে না, মুখেদি যার কুনু ছওয়ালর জুয়াপ বার অয় না। 15 মাবুদ গো বার চাওয়াত আছি আমি তুমারউ আশায়, ওগো মাবুদ এলাহি মোর মিনতির জুয়াপ তুমি তো দিবায়। 16 আমি তো কইছি, “আমার পাও পিছলি গেলে, আমারে লইয়া তারা যানু বড়াই করতো না পারে।” 17 পড়ি যাইয়ার পড়ি যাইয়ার আমার হালত অলা, আমার চখুর ছামনে ঘুরের খালি দিলর জালা-যন্ত্রনা। 18 আমার হকল অপরাধ আমি করছি স্বীকার, আমার গুনার বোঝা লইয়া অশান্তি করিয়ার। 19 আমার দুশমন অকল বউত তরতাজা বলবান, তারা বউত বিনা কারনে মোরে যারা ঘিন্নাইন। 20 আমি তারার ভালাই করলে তারা করে খেতি, তারা মোরে দুষি কয় ভালাইর পথে চলি করি। 21 ও আমার মাবুদ আমারে ছাড়িয়া যাইও না, হরিয়া যাইও না আমা থাকি ওগো আমার আল্লা। 22 আমারে সাইয্য করাত জলদি আও তুমি, ও আমার মাবুদ আমার জান বাচানির কান্ডারি॥ |
© Ahle Kitab Society. All rights reserved.