ꠎꠛꠥꠞ ꠡꠞꠤꠚ 31 - ছিলটি আছমানি কিতাব (বাংলা লিপি)আল-জবুর ৩১ এবাদত-বন্দেগি পরিচালকর লাগি: হজরত দাউদর মিজমর। 1 আশ্রয় লইছি গো মাবুদ তুমার ছায়ায়, মোরে যানু না পায় কুনুদিন শরম-লজ্জায়, তুমার হক বিচারে রেহাই দেও আমায়। 2 আমার মিনতি হুনিয়া জলদি বাচাও মোরে, পাহাড়র সুড়ং অইয়া তুমি বাচাও আমার জানরে, আশ্রয় বাংকার অও গো তুমি নিরাপদে রাখো মোরে। 3 তুমি আমার আশ্রয়-সুড়ং, মজবুত বাংকার, পথ দেখাইয়া চালাও মোরে দুহাই লাগে তুমার। 4 লুকাইয়া পাতাইল ফান্দো থাকি মোরে করো উদ্ধার, তুমিউ খালি আমার আশ্রয়, আমার বাংকার। 5 আমার রুহ তুমার আতো সপিয়া দিলাইলাম, ও মাবুদ, হক আল্লা, বাচাইছো তো আমার জান। 6 অসাড় মুর্তির পুজারিরে ঘিন্নাই আমি, মাবুদর উপরেউ আমি ভরসা করি খালি। 7 আমার জানর সব মছিবত বেহাল দশা দেখছো তুমি, তুমার দয়া-মায়া পাইয়া খুশি-ফুর্তি করমু আমি। 8 দুশমনর আতো তুমি দিছো না মোরে তুলিয়া, খুলা-মেলা মাঠো মোরে রাখছো উবা করাইয়া। 9 দয়া করো ওগো মাবুদ মছিবতো আছি, চউখ আর দেহ-কায়ায় কুনুমন্তে জিতা রইছি। 10 জিন্দেগি মোর ক্ষয় অইলো দুখ-কষ্টয় কান্দি কান্দি, গুনার দায় বল কমিয়া হুকাই গেছে মোর আড্ডি। 11 দুশমন অকলে মোরে ঘিন্নায়, আমার আরি-ফরিয়েও নিন্দায়, চিনা-জানা জনে দেখলে ডরাইয়া হরে, দৌড়াইয়া বাগে মানষে পথে-ঘাটে দেখলে মোরে। 12 মুর্দা জনর লাখান তো ফাউরিলিছে মোরে, ভাংগা-নষ্ট মালর লাখান মনো করে আমারে। 13 বউতর কানা-কানি আমি হুনিয়ার, ডর-খফে ভরা চাইরোবায় আমার, আমার বিরুদ্ধে তারা হকল একখানো অইছে, জান কাড়িয়া নিতোগি করি ফন্দি করিছে। 14 আমি তো ভরসা করছি মাবুদ তুমার উপরে, তুমিউ আমার মাবুদ আল্লা জানাই হকলরে। 15 আমার হায়াতি তো তুমারউ আতো, খেদাওরা দুশমন থাকি হেফাজত করো। 16 তুমার নুরর দিদার দেখাও আমি গুলামরে, তুমার আপন দয়া-মায়ায় বাচাও আমারে। 17 শরম দিও না মোরে মাবুদ জানাই মিনতি, নাফরমানে শরম পাইয়া রসাতলে যাউকগি। 18 দুইও ঠোট বন্দ অইযাউক বেইমানি যে মাতে, বড়াই-গরিমা দেখায় যারা পরেজগারর লগে। 19 তুমার আশিক বন্দার লাগি জমা আছে কতো দয়া, আশ্রয় লইছে যারা তুমার ছায়াত আইয়া, হকলর ছামনে তারারে দেখাইছো তুমার অতো মায়া। 20 তারারে লুকাইয়া রাখো তুমারউ পাক দিদারো, দুশমনর জিফরার দাপট থাকি রাখো তুমার বসত ঘরো। 21 মাবুদউ মুবারক, দুশমনর ঘেরাও করা নগরো, আচানক দয়া-মায়ায় রাখছইন মোরে নিরাপদো। 22 ডরর চুটে কইছলাম তো আমি, “হরি গেছি দুরই তুমার নজর থাকি,” আমি যেবলা ডাকিছলাম সাইয্যর লাগি, ডাকর জুয়াপ দিলায় তুমি হুনলায় মিনতি। 23 মাবুদর আশিক বনো ওরে পরেজগার হকল বন্দা, হক মানষরে বাচাইয়া তাইন অহংকারিরে দেইন কঠিন সাজা। 24 বুকুত সাওস রাখো দিলো যুগাও বল, আছো যত মাবুদর আশিক বন্দা অকল॥ |
© Ahle Kitab Society. All rights reserved.