ꠎꠛꠥꠞ ꠡꠞꠤꠚ 10 - ছিলটি আছমানি কিতাব (বাংলা লিপি)

আল-জবুর ১০

¹ মাবুদ গো, তুমি কেনে দুরই রইরায়? বিপদর কালো কিতাল্লাগি লুকাইরায়?

² জালিমর বাহাদুরিয়ে দুখি-কাংগাল ভুগে, হেশে তারার চতুরির ফান্দো তারাউ ধরা পড়ে।

³ মন্দ জনে তার মনর বজ্জাতির বাহাদুরি দেখায়, লোভী মানষে মাবুদরে তুচ্ছ মনো করিয়া গালিয়ায়।

⁴ বেটাগিরি করিয়া মন্দ লোকে চায় না তান দিদার, আল্লা বলতে কেউ নাই, অলা একিন তারার।

⁵ দুনিয়াবি জিন্দেগি হামেশা লাভবান তারার, তারার চউখে দেখে না তো হক ইনছাফ তুমার, “ইতা বুলে বউত উপরে,” অখান তারা কয়, “আমার বিরুধিরে ফু দিয়া উড়াইলিমু নিচ্চয়।”

⁶ মনে মনে কয় তারা, “আমার কুনু পতন নাই, কুনু যুগে কুনু দিনউ বিপদ-আপদ আইতো নায়।”

⁷ তার মাতো লান্নত আর ধান্দা, জুর-জুলুমে ভরা, জিফরা ভরা নাফরমানি বজ্জাতির বসত খানা।

^8-9 নিরাই জংলার মাজে হে উত পাতিয়া বয়, নির্জন জাগাত নি-অপরাধিরে খুন করাত রয়। অসহায়-অভাগা অকল তারার দুইও চউখর নিশানা, সিংহয় যেলা খাপ ধরিয়া জংলাত বয় লুকাইয়া, দুখি জনরে ধরার লাগি তারাও অলা বয়, ধরিয়া তারে টানিয়া আনি ফান্দো হারাই থয়।

¹⁰ ফান্দো হারাই নরম করি পিষিয়া চুরমার করে, অসহায়-অভাগা জন তারার নখুর থাবাত পড়ে।

¹¹ মনে মনে কয় তারা, “আল্লায় ইতা দেখইন না, তান মুখ তো লুকাইলিছইন, ইতার বায়দি চাইনও না।”

¹² ও মাবুদ জলদি আও, তুমার আত খান বাড়াও, দুখি-কাংগালরে না ফাউরিয়া জান খান বাচাও।

¹³ নাফরমানে কেনে করে আল্লা পাকরে এলামি? মনে মনে কেনে কয়, “তাইন হিসাব লইবা নি?”

¹⁴ অথচ তুমি তো দুখ-মছিবত দেখরায়, এরার জিম্মাদারি তুমার আতর কবজায়। অসহায় জনে তো তুমার আতোউ নিজরে সপে, তুমার গেছেউ আশ্রয় পায় এতিম-মিছকিনে।

¹⁵ নাফরমান বজ্জাতর বল অখন ভাংগিলাও, তারার হকল বদ কামর হিসাব তুমি লইলাও।

¹⁶ চিরদিন চিরকাল মাবুদউ অইলা বাদশা, তান জমিন থাকি বিধর্মী জাতি সর্বনাশ অইবা।

¹⁷ মাবুদ গো, কাংগাল-দুখির আশা তুমি পুরা করো, তারার মনো সাওস যুগাই দিলর ফরিয়াদ হুনো।

¹⁸ এতিমর বায় চাও গো আল্লা, বিচার করো সব জালিমর, ডর দেখানি বন্দ করিলাও মাটির পয়দা মানুষর॥