ꠔꠃꠞꠣꠔ ৩: ꠟꠦꠛꠤꠀꠘ 18 - ছিলটি আছমানি কিতাব (বাংলা লিপি)

নাজাইজ মিলা-মিশা আর হারাম বিয়া-শাদি

¹ আর মাবুদে মুছারে কইলা,

² “তুমি বনি ইছরাইলরে কও, আমি আল্লাউ তুমরার মাবুদ।

³ এরলাগি তুমরা আগে যে মিসর দেশো বসত করতায়, হিনর মানষে যেতা করে তুমরা ইতা করিও না। আর আমি তুমরারে যে কেনান দেশো নিরাম, হউ দেশো গিয়া হারলে, হনর মানষে যেতা করে ইতাও তুমরা করিও না। তারা যেলা চলে, তুমরা ইলা চলিও না।

⁴ বরং আমার দেওয়া শরিয়ত মাফিক তুমরার জিন্দেগি কাটাইবায়। খুব খিয়াল করিয়া আমার দেওয়া হুকুম-আহকাম আমল করবায়। মনো রাখিও, আমি আল্লাউ তুমরার মাবুদ।

⁵ আমার বাতাইল নিয়ম-কানুন আর শরিয়তর হুকুম-আহকাম তুমরা আমল করবায়, যে জনে ইতা আমল করে হে এর উছিলায় তার জান বাচাইবো। আমিউ তো মাবুদ।

⁶ “আপন লউর খেশ-কুটুমর লগে শরিলি মিলা-মিশা বা বেইজ্জতি কাম করিও না। আমিউ তো মাবুদ।

⁷ তুমরার মাজর কেউ যানু নিজর মাʼর লগে শরিলি মিলা-মিশা করিয়া তার বাফর মান-ইজ্জত না লুটে। এইন তো তার মা, এন লগে মিলা-মিশা করা হারাম।

⁸ হাতন মাʼর লগেও মিলা-মিশা করা হারাম, আরনায় বাফর বেইজ্জতি অইবো।

⁹ নিজর বইন বা হাতন বইনর লগে মিলা-মিশা করাও হারাম, আপন বাফর তরফা বইন বা মাʼর তরফা বইন অইলেও হারাম। তারা এক বাড়িত জনম অউক বা আলাদা বাড়িত জনম অইলেও হারাম।

¹⁰ পুয়া বা পুড়ির ঘরর নাতিনর লগে শরিলি মিলা-মিশা করা হারাম, ইতায় তো নিজর বেইজ্জতি অয়।

¹¹ হাতন মাʼর ঘরর বইনর লগে শরিলি মিলা-মিশা করা হারাম, তাই তো বইন।

¹² আপন ফুফুর লগে শরিলি মিলা-মিশা করা হারাম, এইন তো বাফর লউর কুটুম।

¹³ আপন মইর লগে শরিলি মিলা-মিশা করা হারাম, এইন তো মাʼর লউর কুটুম।

¹⁴ আপন চাচার মান-ইজ্জত লুটিয়া তান বউর লগে শরিলি মিলা-মিশা করা হারাম, এইন তো চাচী।

¹⁵ আপন পুয়ার বউর লগে শরিলি মিলা-মিশা করা হারাম, তাই তো নিজর বউমা।

¹⁶ ভাইর বউর লগে শরিলি মিলা-মিশা করা হারাম, আরনায় ভাইর বেইজ্জতি অইবো।

¹⁷ কুনু বেটি মানষর লগে শরিলি মিলা-মিশার বাদে তাইর পুড়ির লগে, তাইর পুয়া বা পুড়ির ঘরর নাতিনর লগে শরিলি মিলা-মিশা করা হারাম, এরা তো তাইর লউর কুটুম, ইতা বড় খবিছি কাম।

¹⁸ আর বউ জিতা থাকা হালতে হালি বা জেঠালিরে বিয়া করিয়া হতিয়ালা করাও হারাম।

¹⁹ “হায়েজ বা বেটিয়ারা মাসিক বেমার থাকা হালতে কুনু বেটিন্তর লগে মিলা-মিশা করা হারাম।

²⁰ দুছরা কুনু বেটার বউর লগে শরিলি মিলা-মিশা করিয়া, নিজরে নাপাক বানাইও না।

²¹ “তুমরার মাজর কেউ নিজর পুয়া বা পুড়িরে আগুইনদি জালাইয়া, মুলক দেবতার নামে বলি দিয়া, আপন আল্লার পবিত্র নামরে অসম্মান করিও না। আমিউ তো মাবুদ।

²² “বেটিন্তর লগে যেলা শরিলি মিলা-মিশা করইন, বেটাইন্তে-বেটাইন্তে অলা খবিছি পুংগামি করা হারাম।

²³ কুনু পশুর লগে খবিছি মিলা-মিশা করিয়া, কুনু বেটাইন নাপাক বনিও না। কুনু পশুর লগে কুনু বেটিন্তেও খবিছি মিলা-মিশা করিও না। ইলাখান খবিছি মিলা-মিশা তো জগতর নিয়মর উল্টা।

²⁴ “অউ লাখান কুনু খবিছি বেইজ্জতি কাম করিয়া, তুমরার মাজর কেউ যানু নিজরে নাপাক না বানায়। মনো রাখিও, তুমরার ছামনে থাকি যত জাতি অকলরে আমি খেদাই দিরাম, তারা তো অতা খবিছি করিয়া নিজরে নাপাক করছিল।

²⁵ অতার লাগি তারার দেশর মাটি নাপাক বনিগেছে, তারার নাফরমানির কারনে আমি অউ দেশরে সাজা দিরাম, অউ দেশর মাটিয়ে তার প্রজা অকলরে বমি করি ফালাই দের।

²⁶ অইলে তুমরা খালি আমার দেওয়া শরিয়ত আর হুকুম-আহকাম মানিয়া চলিও। তুমরার নিজর জাতির বা তুমরার মাজে বসত কররা ভিন-দেশি কেউ যানু অলা খবিছি বেইজ্জতির কুনুজাত কাম না করে।

²⁷ আগে থাকি যেতা জাতি অকল হউ দেশো বসত করের, তারা অউ নমুনার খবিছি বেইজ্জতি কাম অকল করায় হনর মাটিরে নাপাক বানাইলিছে।

²⁸ অখন তুমরাও হনো গিয়া যুদি হতার লাখান নাপাকি কাম করো, তে তারার লাখান তুমরারেও হউ দেশর মাটিয়ে বমি করি ফালাইবো।

²⁹ “ইলা খবিছি কুনু কাম কেউ করলে, তুমরার সমাজ থাকি তার নাম মিটাইলিবায়।

³⁰ আমার হুকুম-আহকাম তুমরা মানিও, তুমরা হউ দেশো গিয়া হারি হনর পুরানা বাসিন্দা অকলর চাল-চলনে চলিও না। তারার খবিছি রীতি-রেওয়াজ মানিয়া তুমরা নাপাক অইও না। মনো রাখিও, আমি আল্লাউ তুমরার মাবুদ।”