Zakhariya 7 - Siswati 1996 Bible

Simakadze uyakusola kuzila kwekutentisa

¹ Ngemnyaka wesine wekubusa kwenkhosi Dariyusi, kwefika livi laSimakadze kuZakhariya ngelilanga lesine enyangeni yemfica, inyanga yaKhislevu.

² Bantfu baseBetheli bebatfumele boShareseri, naRegemi Meleki kanye nemancusa abo kutsi bayewuncenga Simakadze

³ ngekutsi babute baphristi basendlini yaSimakadze longuSomandla kanye nebaphrofethi, batsi: “Ngilile yini ngizile nekudla ngenyanga yesihlanu, njengaloku bengivele ngenta kuleminyaka leminyenti leyendlulile?”

⁴ Livi laSimakadze longuSomandla lase liyefika kimi, latsi:

⁵ “Buta kubo bonkhe bantfu bakulelive nakubaphristi babo, utsi: ‘Ngalesikhatsi nizila kudla nilila ngenyanga yesihlanu neyesikhombisa kuleminyaka lengema-70 leyendlulile, benivele nizilela mine yini?

⁶ Kona ngesikhatsi nidla ninatsa, anitenteli nine yini lawo madzili?

⁷ Akusiwo yini emavi aSimakadze lawo lamenyetelwa ngebaphrofethi bakucala, ngesikhatsi iJerusalema kanye nemadolobha layitungeletile asephumulile, aphumelela lapho khona kwaze kwatinta iNegevu nelihlanze langasenshonalanga?’ ”

Kungalaleli kwenta kutsi batfunjwe

⁸ Livi laSimakadze laphindze lefika futsi kuZakhariya, latsi:

⁹ “Naku lokushiwo nguSimakadze longuSomandla, utsi: ‘Yehlulelani ngekwemtsetfocotfo, niphatsane ngemusa nangeluvelo kulowo nakulowo.

¹⁰ Ningabacindzeteli bafelokati, netintsandzane, nemihambima kanye nalabamphofu. Etinhlitiyweni tenu ningafiselani lokubi lomunye nalomunye.’

¹¹ “Kodvwa bala kulalela, bavuka inkhani bafulatsela, bavala tindlebe tabo.

¹² Benta tinhlitiyo tabo taba lukhuni njengelitje, bangete bawulalela umtsetfo, bangawalaleli nemavi lakhulunywa nguSimakadze longuSomandla, lawatfumela ngaMoya wakhe ngebaphrofethi bakadzeni. Ngako-ke Simakadze longuSomandla watfukutsela kakhulu.

¹³ “Simakadze longuSomandla utsi: ‘Ngatsi nangibabita bangete balalela ngekusabela, ngako-ke nabo nabamemeta, angizange ngibalalele.

¹⁴ Ngabasakata ngesiwunguwungwana, ngabasa kuto tonkhe tive, lapho bafike baba tihambi khona. Live lasala likhala libhungane emvakwabo, kangangekutsi kute muntfu labengaphuma angene kulo. Balenta kanjalo-ke lelive lelalijabulile kutsi libe ngusehlane kahlongasibi.’ ”