Zakhariya 6 - Siswati 1996 Bible

Umbono wetincola letine

¹ Ngatsi ngiphakamisa emehlo njalo ngiyabuka, ngabona kuchamuka tincola letine, tiphuma emkhatsini wetintsaba letimbili, tintsaba telitfusi!

² Incola yekucala yayinemahhashi labovu, yesibili inemahhashi lamnyama,

³ yesitsatfu inemahhashi lamhlophe, yesine yayinemahhashi lamabalabala, onkhe anemandla, kutinjomane sibili.

⁴ Ngabuta lengilosi leyayikhuluma nami, ngatsi: “Nkhosi, lamahhashi naletincola kusho kutsini?”

⁵ Lengilosi yangiphendvula, yatsi: “Lena ngimimoya yomine yasezulwini, iyaphuma ekumeni embikwaSimakadze wemhlaba wonkhe.

⁶ Lencola ledvonswa ngemahhashi lamnyama iya eveni langasenyakatfo, lena ledvonswa ngemahhashi lamhlophe icondze ngasenshonalanga, bese kutsi lena ledvonswa ngemahhashi lamabalabala ibheka ngaseningizimu.”

⁷ Kwatsi nakuphuma lawa lamabalabala, tinjomane letatinemandla kakhulu, atimisela kuwuhlamahlama wonkhe umhlaba. Ingilosi yatsi: “Phumani, niwuhlamahlame wonkhe umhlaba!” Ngako ase ayaphuma awuhlamahlama wonkhe umhlaba.

⁸ Ingilosi yabe seyiyangimemeta, yatsi kimi: “Ase ubuke, lawa lacondze ngaseveni langasenyakatfo asatawubeka Moya wami phansi abe nekuthula eveni lasenyakatfo.”

Umchele waJeshuwa

⁹ Livi laSimakadze lefika kimi, latsi:

¹⁰ “Tsatsa isiliva negolide kulabatfunjiwe boHeldayi, naThobiya, naJedaya, lababefike baphuma eBhabhulona. Hamba ngalona lelo langa uye endlini yakaJosaya, umsa waZefaniya.

¹¹ Ubotsatsa lesiliva negolide, wakhe ngayo umchele, bese uwubeka enhloko yemPhristi Lomkhulu, Jeshuwa, umsa waJosadaki.

¹² Ufike umtjele kutsi naku lokushiwo nguSimakadze longuSomandla, utsi: ‘Nangu umuntfu lolibito lakhe nguLigala, futsi uyawuhluma akhule endzaweni yakhe, akhe lithempeli laSimakadze.

¹³ Nguye-ke longuyena loyawukwakha lithempeli laSimakadze. Uyawukwembatsiswa bukhosi, futsi uyawuhlala esihlalweni sakhe sebukhosi abuse. Uyawuba ngumphristi esihlalweni sakhe sebukhosi. Futsi-ke kuyawuba nekuvana emkhatsini walababili.’

¹⁴ Lomchele uyawubasethempelini laSimakadze ube sikhumbuto ngabo boHeldayi, naThobiya, naJedaya, naHeni, umsa waZefaniya.

¹⁵ “Labo labakhashane kakhulu bayakuta batewusita ngekwelekelela ekwakheni lithempeli laSimakadze; ngulapho-ke niyawukwati khona kutsi Simakadze longuSomandla ungitfumele kini. Loku kuyawukwenteka, nanimhlonipha nimlalela Simakadze longuNkulunkulu wenu.”