Zakhariya 4 - Siswati 1996 Bible

Umbono welutsi lwesibane

¹ Lengilosi leyayikhulume nami yabuya, yangivusa, njengemuntfu nakavuswa ebutfongweni.

² Yangibuta, yatsi: “Ubonani?” Ngaphendvula, ngatsi: “Ngibona lutsi lwetibane luyigolide lonkhe, lunesitja lesinemafutsa ngetulu, netibane letisikhombisa kulo, netimbobo letisikhombisa tetintsambo tetibane talo.

³ Futsi ngibona netihlahla letimbili temncumo eceleni kwalo, lesinye ngesekudla kwaso lesitja, lesinye ngesancele saso lesitsha.”

⁴ Ngayibuta lengilosi leyakhuluma nami, ngatsi: “Kuyini loku, nkhosi yami?”

⁵ Yangiphendvula yatsi: “Awati yini kantsi kutsi loku kuyini?” Ngaphendvula, ngatsi: “Cha, nkhosi yami.”

Setsembiso saNkulunkulu kuZerubhabheli

⁶ Ngako yakhuluma kimi, yatsi: “Leli livi laSimakadze leliya kuZerubhabheli, litsi: ‘Akuyi ngetikhwepha nangemandla, kodvwa kuya ngaMoya wami,’ kusho Simakadze longuSomandla.

⁷ “Uyini wena, wena ntsaba lenemandla? EmbikwaZerubhabheli uyawuba litsafa lelibekile. Yena-ke uyawubeka litje lekwephetsa lithempeli, kumenyetwe kutsiwe: ‘Nkulunkulu akalibusise! Nkulunkulu akalibusise!’ ”

⁸ Livi laSimakadze lase liyefika kimi, latsi:

⁹ “Tandla taZerubhabheli tibeke sisekelo salelithempeli; netandla takhe futsi titalicedza. Nine-ke niyawube seniyati kutsi Simakadze longuSomandla ungitfume kini.

¹⁰ “Ngubani lowedzelela lilanga letintfo letincane? Emadvodza ayawujabula nakabona intsambo yekucondzisa isesandleni saZerubhabheli. “Lamehlo lasikhombisa ngewaSimakadze, azulazula emhlabeni wonkhe, jikelele.”

¹¹ Ngabe sengibuta lengilosi, ngatsi: “Iyini lemincumo lemibili lengasekudla nangesancele kwalolutsi lwetibane?”

¹² Ngaphindze ngayibuta futsi, ngatsi: “Ayini lamagala lamabili emncumo emaceleni aletimbobo letimbili tegolide letitfulula emafutsa egolide?”

¹³ Yangiphendvula, yatsi: “Awati yini kantsi kutsi loku kuyini?” Ngaphendvula, ngatsi: “Cha, nkhosi yami.”

¹⁴ Ngako yatsi: “Laba ngulababili labagcotjelwe kutsi bakhonte Simakadze wemhlaba wonkhe.”