Zakhariya 14 - Siswati 1996 Bible

IJerusalema nebetive

¹ Lilanga laSimakadze liyeta, lapho iyakwehlukaniswa khona embikwemehlo enu imphango letsatfwe kini.

² Ngiyakubutsela tonkhe tive eJerusalema kutekulwa nayo; lelidolobha liyawutfunjwa, tindlu tiphangwe, nebesifazane badlwengulwe. Incenye yebantfu balelidolobha iyawutfunjwa, kodvwa laba labanye bantfu labayawube basele bangeke basuswe kulelidolobha.

³ Simakadze uyawuphuma ayekulwa naleto tive, njengobe avama kulwa ngelilanga lemphi.

⁴ Ngalelo langa tinyawo takhe tiyakuma etikweNtsaba Yemincumo, ngasemphumalanga kweJerusalema, bese kutsi leNtsaba Yemincumo ichekeke ekhatsi kusukela ngasemphumalanga kuye ngasenshonalanga, kwakheke sigodzi lesikhulu, incenye yalentsaba iyawukhweshela ngasenyakatfo, kutsi incenye lenye ikhweshele ngaseningizimu.

⁵ Niyawubalekela ngasesigodzini sentsaba yami, ngobe lesigodzi siyawufikela e-Aseli. Yebo, niyawubaleka njengamhlazane nibalekela kutamatama kwemhlaba ngesikhatsi sa-Uziya, inkhosi yakaJuda. Simakadze-ke longuNkulunkulu wami uyawube sewuyefika kanye nabo bonkhe labangcwele bakhe.

⁶ Ngalelo langa kuyawubate kukhanya, nekucandza, nesitfwatfwa.

⁷ Kuyakuba lilanga leliyincophamlandvo, leliyawubate imini nebusuku, lilanga lelatiwa nguSimakadze. Kuyawutsi nakutakuhlwa, kuvele kukhanya.

⁸ Ngalelo langa emanti laphilako ayawugeleta aphuma eJerusalema, incenye yawo igeletele elwandle lolungasemphumalanga, kutsi incenye yawo igeletele elwandle lolungasenshonalanga, busika nehlobo.

⁹ Simakadze uyawuba yinkhosi emhlabeni wonkhe. Ngalelo langa kuyawuba naSimakadze munye, Libito lakhe kube Libito lakhe kuphela.

¹⁰ Lonkhe live, kusukela eGeba kuye eRimoni, eningizimu neJerusalema, liyawufanana ne-Arabha. Kodvwa iJerusalema iyawuphakanyiswa ihlale isendzaweni yayo, kusukela eSangweni lakaBhenjamini kuye endzaweni yeliSango Lekucala, eSangweni Lasekoneni, nekusukela eMbhoshongweni waHananeli kuye ematjeni enkhosi ekuhluta liwayini.

¹¹ Iyakuhlalwa bantfu; ingeke iphindze ibhujiswe. IJerusalema iyawulamuleleka.

¹² Lesi-ke sishayo Simakadze layawushaya ngaso tonkhe tive letalwa neJerusalema: Umtimba wabo uyawubola baseme ngetinyawo tabo, emehlo abo ayawubola etingojeni tawo, netilwimi tabo tiyawubola emilonyeni yabo.

¹³ Ngalelo langa bantfu bayawushaywa nguSimakadze ngekutfutfumela lokukhulu. Ngulowo nalowo uyawubamba sandla salomunye bahlaselane bodvwana.

¹⁴ NaJuda uyakulwa amelane neJerusalema. Ingcebo yato tonkhe tive letakhelene nayo iyawubutsiselwa ndzawonye, kube tincumbi letinkhulu tegolide, netesiliva kanye netetimphahla tekwembatsa.

¹⁵ Sishayo lesifanana naso siyawushaya emahhashi neminyuzi, nemakamela, netimbongolo, kanye nato tonkhe tilwane kuleto tinkambu.

¹⁶ Kuyawutsi bonkhe labayawube basele etiveni tonkhe lebetihlasela iJerusalema benyuke iminyaka ngeminyaka kuyawukhonta iNkhosi, Simakadze longuSomandla, nekugubha uMkhosi Wemadlangala.

¹⁷ Nangabe letinye tive temhlaba tingayi eJerusalema kuyawukhonta iNkhosi, Simakadze longuSomandla, tiyawubate imvula.

¹⁸ Nangabe emaGibhithe akenyuki kuyawuhlanganyela, nawo ayawubate imvula. Simakadze uyakwehlisela etikwabo leso sishayo lashaya ngaso tive letingenyuki kuyewugubha uMkhosi Wemadlangala.

¹⁹ Lesi kuyakuba sijeziso seGibhithe nesijeziso setive tonkhe letingenyuki kuyewugubha uMkhosi Wemadlangala.

²⁰ Ngalelo langa umbhalo lotsi “kwehlukaniselwe simakadze” uyawucoshwa ngisho nasetinsimbini letincencetsa tisematomini emahhashi; nemabhodo ekupheka endlini yaSimakadze ayawufanana netindishi letingcwele letisembikwelilati.

²¹ Onkhe emabhodo aseJerusalema newakaJuda ayakwehlukaniselwa Simakadze longuSomandla, kutsi bonkhe labetako kutakwenta umhlatjelo batsatse lamanye alamabhodo bapheke ngawo. Ngalelo langa sewuyawubate umtsengisi endlini yaSimakadze longuSomandla.