Umshumayeli 7 - Siswati 1996 Bible

Kuhlakanipha nebulima

¹ Libito lelihle lincono kunemakha lamnandzi, nelilanga lekufa lincono kunelekutalwa.

² Kuncono kuya endlini lapho kulilwa khona kunekuya endlini lapho kunelidzili khona, ngobe kufa kusiphetfo sabo bonkhe bantfu; labo labaphilako kufanele bakufake enhlitiyweni yabo loko.

³ Lusizi luncono kuneluhleko, ngobe buso lobudzabukile buyayilungela inhlitiyo.

⁴ Inhlitiyo yalabahlakaniphile isendlini yalabalilako, kodvwa inhlitiyo yetilima isendlini yalabatsakasile.

⁵ Kuncono kulalela nawekhutwa ngumuntfu lohlakaniphile kunekunaka kubongelelwa tilima.

⁶ Njengekusasamba kwemanyeva nakasha ngaphansi kwelibhodo, lunjalo-ke neluhleko lwetilima. Nako loko kulite.

⁷ Ngempela, inkhohliso yenta umuntfu lohlakaniphile abe silima; umdizo wonakalisa inhlitiyo nengcondvo.

⁸ Siphetfo sentfo sincono kunesicalo sayo, nekubeketela kuncono kuneligcabho.

⁹ Ungasheshi ucansuke emoyeni wakho, ngobe intfukutselo ihlala esifubeni sesilima.

¹⁰ Ungabuti utsi: “Kwabangelwa yini kutsi tinsuku takadzeni tibe ncono kunaleti tetfu?” Ngobe akukahlakaniphi kubuta leyo mibuto.

¹¹ Kuhlakanipha kuyintfo lenhle njengelifa, kantsi futsi kusita labo labasabona lilanga.

¹² Kuhlakanipha kuyintfo yekukhosela njengobe nemali kuyintfo yekukhosela, kodvwa buhle belwati kutsi: Kuhlakanipha kuyawulondvolota kuphila kwemnikati wako.

¹³ Cabangisisa ngemisebenti yaNkulunkulu. Ngubani longacondzisa loko lakwenta kwaba sigwegwe?

¹⁴ Natintfo tihamba kahle, tsakasa; kodvwa natintfo tingahambi kahle, khumbula naku: Nkulunkulu ukuvumela kutsi kwenteke kokubili. Ngako-ke umuntfu angeke akwati kubona lutfo ngelikusasa lakhe.

¹⁵ Kulokuphila kwami lokulite ngikubone kokubili loku: Umuntfu lolungile ufela ekulungeni kwakhe, nemuntfu lomubi uphila sikhatsi lesidze ebubini bakhe.

¹⁶ Ungatenti umuntfu lolunge kakhulu, futsi ungabi ngulohlakaniphe kunabo bonkhe; empeleni utibulalelani nje?

¹⁷ Ungatenti umuntfu lomubi kakhulu, kantsi futsi ungatenti silima kakhulu; empeleni ufunelani kufa, sikhatsi sakho sekufa singakefiki?

¹⁸ Kuhle kutsi ukubambe loku, kodvwa ungakuyekeli-ke lokwa. Umuntfu lowesaba Nkulunkulu uyawuphumelela kuko konkhe.

¹⁹ Kuhlakanipha kwenta umuntfu munye abe nemandla kakhulu kunebabusi belidolobha labalishumi.

²⁰ Kute nome munye umuntfu lolungile emhlabeni lowenta lokuhle kuphela, kubete lakonako.

²¹ Ungawanaki onkhe emavi lakhulunywa bantfu, ungahle uve nesisebenti sakho sikuhlambalata,

²² ngobe ngisho nawe wati kahle enhlitiyweni yakho kutsi kukanyenti kangakanani uhlambalata labanye bantfu.

²³ Konkhe loku ngakuhlolisisa ngekuhlakanipha, ngase ngitsi: “Ngitimisele kuba ngulohlakaniphile,” kodvwa loko bekungetulu kwemandla ami.

²⁴ Lokungiko sibili kukhashane kakhulu, kantsi futsi kujule kakhulu, ngubani longakutfola?

²⁵ Ngase ngijikisela ingcondvo yami ekufunisiseni kwati nasekuphenyisiseni kuhlakanipha nekuhleleka kwetintfo, nasekucondzisiseni bulima bebubi kanye nebuhlanya bebulima.

²⁶ Ngikhandza lokubaba kakhulu kunekufa: umfati lolugibe nalonenhlitiyo lengusochaka, yebo, umfati lotandla takhe titibopho. Indvodza lejabulisa Nkulunkulu iyawubaleka kuye, kodvwa indvodza lesoni uyakuyibamba.

²⁷ UMshumayeli utsi: “Ase ubuke naku lengikutfolile: Kuhlanganisa intfo lencane ngayinye ngayinye kulokunye, kuze ngitfole indzikimba.

²⁸ Ngatsi ngisaphenyisisa ngingatfoli lutfo, ngatfola indvodza yinye lecondzile kulayinkhulungwane, kodvwa kwabate ngisho namunye umfati locondzile kubo bonkhe.

²⁹ Naku kuphela lengikutfolile: kutsi Nkulunkulu wadala umuntfu, wamenta waba ngulocondzile, kodvwa bantfu besuka bayawufuna emachinga abo lamanyenti.”