Umshumayeli 4 - Siswati 1996 Bible

Kucindzetelwa, nemshikashika, nekweswela bungani

¹ Ngaphindze ngabuka ngabona konkhe kucindzetelana lokwentiwako lapha ngaphansi kwemtfunti welilanga: Ngabona tinyembeti talabacindzetelwe, bate ngisho nemdvudvuti; emandla abengakubacindzeteli babo, kodvwa labo labacindzetelwe bate ngisho nemdvudvuti.

² Ngakhandza kutsi labafile bayajabula; labo lasebalala bancono kunalaba labaphilako.

³ Kodvwa loncono kunabo bonkhe ngulowo losengakatalwa losengakawuboni lomonakalo lowenteka lapha ngaphansi kwemtfunti welilanga.

⁴ Ngabona kutsi wonkhe umshikashika nako konkhe kuphumelela kwemuntfu kusukela ekuhawukeleni kwakhe lutfo kumakhelwane wakhe. Nako loko kulite, kufanana nekucosha umoya.

⁵ Silima sigoca tandla, silambe size sife.

⁶ Kuncono kubamba ngesandla sinye ube nekuthula emoyeni, kunekubamba emabhabha ngemshikashika nekucosha umoya.

⁷ Ngaphindze futsi ngabona lokunye lokulite lapha ngaphansi kwemtfunti welilanga:

⁸ Bekunemuntfu labehleti yedvwana, abengenandvodzana ate nemnakabo. Abeshikaneka siphelane ajinge angeneliseki ngebunjinga bakhe, watibuta watsi: “Empeleni ngikhandlekela bani? Ngitemukelani lokujabula?” Nako loko kulite, umsebenti lolusizi!

⁹ Babili bancono kunamunye, ngobe batfola umvuzo lomuhle ngemsebenti wabo:

¹⁰ Nakuwa lomunye wabo, lomngani wakhe uyamsita amsukumise, kodvwa maye kulowo muntfu loyedvwa, lotsi nakawa angabi naye lotamsita amsukumise.

¹¹ Kantsi futsi bantfu nabalele bababili bayafutfumetana; kodvwa umuntfu angatifutfumeta kanjani alele yedvwa?

¹² Nangabe umuntfu ayedvwa, angehlulwa nakahlaselwa; kantsi nabababili bangativikela. Intsambo lenemicu lemitsatfu ayisheshi idzabuke.

Intfutfuko ilite

¹³ Uncono umuntfu lomusha lophuyile nalohlakaniphile kunenkhosi lendzala lesilima nalengasatitsatsi teluleko.

¹⁴ Umuntfu lomusha angaphuma ejele angene esihlalweni sebukhosi, nome abengulotelwe angulomphofu embusweni walenkhosi.

¹⁵ Ngabona kutsi bonkhe bantfu labake baphila lapha ngaphansi kwemtfunti welilanga balandzela lona lomusha labetsetse sikhundla senkhosi.

¹⁶ Bangaba banyenti kabi bantfu labangabuswa yinkhosi. Kodvwa itawutsi ingakhotsama, bantfu bangakubongi loko lekwentile. Nako loko kulite, kufanana nekucosha umoya.