Umshumayeli 10 - Siswati 1996 Bible

¹ Njengobe timphungane letifile tenta emakha abe neliphunga lelibi, kanjalo nebulima lobuncane nje benta kuhlakanipha neludvumo kulahlekelwe simo sako.

² Inhlitiyo yalohlakaniphile ibheke ekulungeni, kodvwa yesilima ibuke ebubini.

³ Nome sihamba emgwacweni, silima asikhombisi ingcondvo, sihambe sikhombisa bonkhe bantfu kutsi singiso.

⁴ Nangabe intfukutselo yembusi ikuvukela, ungawushiyi umsebenti wakho. Kutfobeka kulungisa emaphutsa lamakhulu.

⁵ Kukhona bubi lengibubonile lapha ngaphansi kwemtfunti welilanga, sono lesentiwa ngumbusi:

⁶ Tilima tifakwa etikhundleni letiphakeme, kutsi labakhulu nalabanjingile bafakwe kuletiphansi.

⁷ Ngibone tigcili tigibele emahhashi, kwatsi bantfu labakhulu bahamba phansi ngetinyawo njengetigcili.

⁸ Umuntfu lomba umgodzi angahle awele kuwo. Umuntfu lobhidlita lubondza angahle alunywe yinyoka.

⁹ Umuntfu lomba ematje enkwali angahle alinyatwe ngiwo; lowo locheketa tingodvo angahle alinyatwe ngito.

¹⁰ Nangabe lizembe lisidlindzi lingakacali lalolwa, umuntfu kudzingeka asebentise emandla lamakhulu; kodvwa likhono liletsa imphumelelo.

¹¹ Nangabe inyoka iluma ingakatfotjiswa, kute inzuzo kulowo mwungi wayo.

¹² Emavi laphuma emlonyeni wemuntfu lohlakaniphile amentela ludvumo, kodvwa silima sidliwa tindzebe taso.

¹³ Ekucaleni emavi aso abulima, kutsi ekugcineni abe kwedzelela nebuhlanya;

¹⁴ silima siba nemavi lamanyenti. Kodvwa ekugcineni kubate lowatiko kutsi yini letako. Ngubani nje longamtjela kutsi kutakwentekani emvakwakhe?

¹⁵ Silima sitigugisa sona ngemisebenti yaso size sife, ngobe asiyati nendlela leya edolobheni.

¹⁶ Nako kuwe wena live, nangabe sigcili sesigucuke saba yinkhosi yakho, kantsi nebantfwabenkhosi belive lakini badla lidzili ekuseni.

¹⁷ Libusisiwe live, nangabe inkhosi yalo yatalwa ingulehlakaniphile, nebantfwabenkhosi balo badla ngesikhatsi lesingiso, labadlela emandla, hhayi kudzakwa.

¹⁸ Nangabe umnikati wendlu avilapha, luphahla lwendlu yakhe luyahhibika; kantsi futsi nakayingileka nje, indlu yakhe igcina seyingenela.

¹⁹ Lidzili lentelwa injabulo, neliwayini lenta kutsi kutsakaswe; kodvwa imali iyimphendvulo yako konkhe.

²⁰ Ungakhulumi kabi ngenkhosi, ngisho nangekucabanga kwakho, nangalonjingile ekamelweni lakho, ngobe inyoni yemoya ingahle iwetfwale emavi akho, nesitfunywa lesinemaphiko singahle sisho kutsi utsiteni.