Umshumayeli 1 - Siswati 1996 Bible

Konkhe kulite

¹ Lawa ngemavi eMshumayeli, umsa waDavide, inkhosi yaseJerusalema:

² “Lite lelite!” kusho uMshumayeli. “Kulite mbamba! Konkhe kulite.”

³ Umuntfu utfolani ngawo wonkhe umshikashika lawusebentelako lapha ngaphansi kwemtfunti welilanga?

⁴ Titukulwane tiyefika, titukulwane tiyendlula, kodvwa umhlaba uyakusala unjalo phakadze naphakadze.

⁵ Lilanga liyaphuma, lilanga liyashona, libuyele endzaweni yalo lapho liphuma khona.

⁶ Umoya uphephetsela ngaseningizimu, bese uyajika ucondza ngasenyakatfo, ushaye situngeletane, ujikeleta lapho uhambe khona.

⁷ Yonkhe imifula ingenisa elwandle, noko lwandle alugcwali, lapho ichamuka ngakhona imifula, iphindze ibuyele khona futsi.

⁸ Tonkhe tintfo tiyadzinana, kute umuntfu longatichaza. Liso alizange leneliswe kubuka, kantsi nendlebe ayigcwali ngekuva.

⁹ Lokwake kwaba khona kuyawuphindze kube khona futsi, lokwase kwentiwa kuyawuphindze kwentiwe futsi; kute intfo lensha, lapha ngaphansi kwemtfunti welilanga.

¹⁰ Kukhona yini intfo umuntfu langasho ngayo atsi: “Ase nibuke, kusha-ke loku”? Cha, kwase kwaba khona endvulo, kwakukhona sisengakabikho.

¹¹ Bantfu bakadzeni abakhunjulwa, nalabo labalandzelako abayiwukhunjulwa ngulabo lababalandzelako.

Inhlakanipho ilite

¹² Mine, Mshumayeli, ngangiyinkhosi yema-Israyeli eJerusalema.

¹³ Ngatimisela kutsi ngekuhlakanipha ngifundze ngiphenyisise ngako konkhe lokwentiwa emhlabeni. Maye, mkhulu umtfwalo Nkulunkulu lawetfwese bantfu!

¹⁴ Ngikubone konkhe lokwentiwako ngaphansi kwemtfunti welilanga; konkhe kulite, kufanana nekucosha umoya.

¹⁵ Loko lokugwegwile kungeke kucondziseke, loko lokungekho kungeke kubalwe.

¹⁶ Ngaticabangela ngatsi: “Mine ngikhulile, ngacokelela incumbi yekuhlakanipha, ngabendlula bonkhe labase babusela eJerusalema ngaphambi kwami; sengikubone kakhulu kuhlakanipha kanye nelwati.”

¹⁷ Ngatimisela engcondvweni yami kukwati kuhlakanipha, nebuhlanya nebulima, kodvwa ngefika lapho ngibona khona kutsi nako loko kufanana nekucosha umoya.

¹⁸ Ngobe kuhlakanipha lokukhulu kutala lusizi lolukhulu: Umuntfu utsi angaba nelwati lolukhulu, nekuhlupheka kwakhe kube kukhulu.