Tikhulu 9 - Siswati 1996 Bible

Abimeleki

¹ Abimeleki, umsa waJerubhali, waya kubomalume wakhe nakuwo wonkhe umndeni wasekhabonina, watsi:

² “Butani tonkhe takhamiti taseShekhemu, nitsi: ‘Ngukuphi lokuncono kini: Kutsi nibuswe ngiwo onkhe lamadvodzana aJerubhali langema-70, nome nibuswe ngumuntfu munye?’ Khumbulani kutsi mine ngiyinyama yenu nengati yenu.”

³ Batsi bomalume bakhe nabakusho loko bakuphindzaphindza kutakhamiti taseShekhemu, tabona kuncono kulandzela Abimeleki, ngobe tatitsi: “Ungumnaketfu.”

⁴ Tamnika isiliva leyayingemagremu labengaba ngema-800, letatiyitsetse ethempelini laBhali Bherithi. Abimeleki walisebentisa ekucasheni tidlova letaba balandzeli bakhe.

⁵ Wahamba waya kubo e-Ofra, wafike labanakabo lababengema-70, emadvodzana aJerubhali, wawabulalela etikwelitje linye. Kodvwa Jothamu, litfunjana laJerubhali, waphunyula ngobe wabhaca.

⁶ Tonkhe takhamiti taseShekhemu nabo bonkhe baseBhethi Milo babutsana ngephansi kwesihlahla se-okhi ensikeni yaseShekhemu batewubeka Abimeleki kutsi abe yinkhosi.

⁷ Jothamu watsi kube atjelwe ngaloko, wenyuka waya esicongweni seNtsaba iGerizimu, wafike wamemetela khona watsi: “Lalelani kimi, takhamiti taseShekhemu, kuze Nkulunkulu anilalele.

⁸ Ngalelinye lilanga tihlahla taphuma tayawutigcobela yato inkhosi. Takhuluma esihlahleni semncumo tatsi: ‘Bani yinkhosi yetfu.’

⁹ “Kodvwa sihlahla semncumo saphendvula, satsi: ‘Ngingacala ngilahle emafutsa ami, languwona enta bonkulunkulu nemadvodza bahlonipheke, ngiyewuhamba ngintengetela etikwetihlahla?’

¹⁰ “Tihlahla tesuka lapho takhuluma esihlahleni semkhiwa, tatsi: ‘Kota, utewuba yinkhosi yetfu.’

¹¹ “Kodvwa lomkhiwa waphendvula, watsi: ‘Ngingacala ngilahle lamakhiwa ami lamahle nalanongotela kangaka, ngiyewuhamba ngintengetela etikwetihlahla?’

¹² “Tihlahla tase tikhuluma esihlahleni semvini, titsi: ‘Kota, utewuba yinkhosi yetfu.’

¹³ “Kodvwa lomvini waphendvula, watsi: ‘Ngingacala ngilahle leliwayini lami lelingulona lijabulisa bonkulunkulu nemadvodza, ngiyewuhamba ngintengetela etikwetihlahla?’

¹⁴ “Ekugcineni tonkhe tihlahla takhuluma esihlahleni semanyeva, tatsi: ‘Kota, utewuba yinkhosi yetfu.’

¹⁵ “Sihlahla semanyeva saphendvula letihlahla, satsi: ‘Nanicinisile kutsi nifuna kungibeka inkhosi etikwenu, wotani nitewukhosela emtfuntini wami; kodvwa nakungenjalo, akuphume umlilo esihlahleni semanyeva udle imisedari yaseLebanoni!’

¹⁶ “Kungabe-ke benikwenta kahle nangeliciniso sibili yini lokubeka lo-Abimeleki kutsi abe yinkhosi yenu? Bekungukona kumfanele yini Jerubhali ngaloko lenikwentile emndenini wakhe? Tifanelwe nguloko yini tonkhe letintfo latenta Jerubhali kini?

¹⁷ Khumbulani kutsi babe wanilwela kanjani atilahla ematsambo akhe kutsi anephule etandleni temaMidiyani.

¹⁸ Kodvwa lamuhla senivukele indlu yababe, nabulala emadvodzana akhe langema-70 niwabulalela etikwelitje linye, nabeka Abimeleki, indvodzana yentfombatana leyayisigcili sakhe, namenta inkhosi yetakhamiti taseShekhemu, ngobe angumnakenu.

¹⁹ Nangabe-ke nente kahle nangekweliciniso sibili kuJerubhali nasemndenini wakhe lamuhla, Abimeleki, akabe kujabula kwenu, nani nibe kujabula kwakhe!

²⁰ Kodvwa nakungenjalo, akuphume umlilo ku-Abimeleki unidle, nine takhamiti taseShekhemu netaseBhethi Milo; akuphume umlilo nakini, nine takhamiti taseShekhemu netaseBhethi Milo, udle Abimeleki!”

²¹ Jothamu wesuka lapho wabaleka wayawubhaca eBheri, wafike wakha khona, wahlala, ngobe abemesaba umnakabo, Abimeleki.

²² Abimeleki wabusa sive sema-Israyeli iminyaka lemitsatfu.

²³ Nkulunkulu watfumela umoya lomubi emkhatsini wa-Abimeleki nesive saseShekhemu, savuka indlwabane, savukela Abimeleki.

²⁴ Nkulunkulu wakwenta loku kuze kutsi licala lekubulawa kwemadvodzana aJerubhali labengema-70, nekucitseka kwengati yabo, kuphindziselwe kumnakabo labengu-Abimeleki kanye nakuto takhamiti taseShekhemu, letatingutona tamsita nakabulala bomnakabo.

²⁵ Takhamiti taseShekhemu tacipha Abimeleki ngekubeka emadvodza eticongweni tetintsaba kutsi alalele kukhuthuza nekugebenga bonkhe bantfu lababendlula lapho; loko kwabikwa ku-Abimeleki.

²⁶ Kwabe sekufika Gali, umsa wa-Ebedi, eShekhemu, ahamba nabomnakabo, emadvodza aseShekhemu ase etsembela kuye.

²⁷ Batsi kube baphume bonkhe baye emasimini abo bayewuvuna emagelebisi, babuya bawahluta, base benta lidzili ethempelini lesithico sabo. Babetsi ngesikhatsi banatsa, badla, bacalekise Abimeleki.

²⁸ Gali-ke, umsa wa-Ebedi, wababuta, watsi: “Ngubani Abimeleki, ngubani yena Shekhemu, kutsi tsine singabakhotsama kuye? Akasiye yini umsa waJerubhali? Yena Zebuli akasilo liphini lakhe yini? Khotsamani emadvodza akaHamori, uyise waShekhemu! Kudzingeke ngani-ke kutsi sikhonte Abimeleki?

²⁹ Kube mane lesive besiphetfwe ngimi, ngabe ngiyamsusa Abimeleki. Ngabe ngitsi kuye: ‘Khipha imphi yakho yonkhe!’ ”

³⁰ Watsi kube Zebuli, umphatsi welidolobha, akuve loku lekwakukhulunywa nguGali, umsa wa-Ebedi, watfukutsela wagana sicoco.

³¹ Wakhipha tigijimi ngasense, watitfumela ku-Abimeleki, watsi: “Gali, umsa wa-Ebedi, nabomnakabo sebatseleke lapha eShekhemu, manje sebasusa umsindvo wekutsi lelidolobha lonkhe alivukele wena likuhlasele!

³² Ngako-ke kubotsi ebusuku wena nebantfu bakho nite nitewubalalela ematsafeni.

³³ Kutawutsi ekuseni nakuphuma lilanga, nivumbuke nilihlasele lelidolobha. Kutawutsi boGali nalamabutfo akhe nabaphuma bakuhlasele, wente loko sandla sakho lesingakwenta kubo.”

³⁴ Ngako Abimeleki nawo onkhe emabutfo akhe baphuma bashuca ebusuku bavimbetela iShekhemu, behlukene ticheme letine.

³⁵ Watsi kube Abimeleki nalamadvodza labehamba nawo abone Gali, umsa wa-Ebedi, asaphumile eme esangweni lelidolobha, bavumbuka etindzaweni tabo lapho bebabhace khona.

³⁶ Gali watsi kube ababone, wakhuluma kuZebuli watsi: “Bukela kuvumbuka bantfu lapha eticongweni tetintsaba, bayewuka!” Zebuli wamphendvula watsi: “Ubona ematfunti entsaba afanana nebantfu.”

³⁷ Kodvwa Gali waphindza wakhuluma, watsi: “Bukela bantfu bavumbuka ekhatsi nelive, bayehla, kunelibutfo lelikhulu lelichamuka ngasesihlahleni sebaphenguli.”

³⁸ Zebuli wakhuluma, ambuta watsi: “Khumbula emagama akho. Akusiwe lona bewutsi: ‘Ngubani yena Abimeleki kutsi singabuswa nguye?’ Akusiwo nje lamadvodza bewuwacoloshela? Phuma-ke uyekulwa nawo!”

³⁹ Ngako Gali wahola takhamiti taseShekhemu walwa na-Abimeleki.

⁴⁰ Abimeleki wamcosha; labanyenti bawa balimala kuloko kucoshwa kwabo, balala lucaca yonkhe indlela kuya ngasekungeneni kwelisango.

⁴¹ Abimeleki wahlala e-Aruma; Zebuli wakhipha Gali kanye nabomnakabo wabacosha eShekhemu.

⁴² Ngelilanga lelilandzelako bantfu baseShekhemu baphuma baya emasimini, loko kwabikwa ku-Abimeleki.

⁴³ Ngako watsatsa lamabutfo akhe wawehlukanisa ticheme letintsatfu, watsi atibhace lena emasimini. Watsi nakabona bantfu baphuma edolobheni, wavuka wayawubahlasela nekubabulala.

⁴⁴ Abimeleki nalamabutfo akhe bagijima bayakuma ekungeneni kwelisango lelidolobha. Kwatsi emacembu lamabili esukela laba lababesemasimini, bacotfula imbokodvo nesisekelo.

⁴⁵ Lonkhe lelo langa Abimeleki wachubeka wahlasela lelo dolobha, waze walitfumba, wabulala bonkhe bantfu lababekulo. Walibhidlita lonkhe, wase ulinyenyeta ngeluswayi.

⁴⁶ Tatsi kube tikuve loko takhamiti tembhoshongo waseShekhemu, tabaleka tawolekela engungwini yelithempeli la-Eli Bherithi.

⁴⁷ Abimeleki watsi kube atjelwe kutsi bonkhe bantfu bembhoshongo waseShekhemu bancwabelane lapho,

⁴⁸ wakhuphuka yena nelibutfo lakhe, baya eNtsabeni iSalmoni. Watsatsa lizembe, wagawula emagala etihlahla, wawetjatsa emahlombe. Watjela lamadvodza labehamba nawo, watsi: “Sheshisani! Yentani loku leningibona ngikwenta!”

⁴⁹ Ngako yonkhe indvodza yagawula akayo emagala, yawetjatsa, yalandzela Abimeleki. Bafika bawambombela emnyango walengungu, base balumeka umlilo kulawo mahlahla labesemnyango. Bantfu bafutsetelana ekhatsi kulengungu yembhoshongo waseShekhemu basha bangcongca: emadvodza, nebafati lababeyinkhulungwane sebabonkhe.

⁵⁰ Abimeleki wesuka lapho wacondza eThebesi, nayo wafike wayihlasela, wayitfumba.

⁵¹ Noko ngekhatsi kwalelidolobha bekunembhoshongo locinile, lapho kwakubalekela khona bantfu bakulelidolobha, babhace, emadvodza nebafati. Batikhiyela ngekhatsi, bakhuphuka bayawuhlala etulu esicongweni salombhoshongo.

⁵² Abimeleki wesukela wona lombhoshongo wayawuhlasela. Kodvwa watsi asasondzela emnyango wawo lombhoshongo atsi usetawulumeka ngemlilo,

⁵³ lomunye umfati wehlisela lenkhulu imbakadza yelitje etikwenhloko yakhe, yabhidlita lukhakhayi lwa-Abimeleki.

⁵⁴ Masinyane Abimeleki wabita ludzibi lwakhe, watsi: “Sheshisa uhoshule inkemba yakho ungibulale, kuze bangasho batsi: ‘Wabulawa ngumfati.’ ” Ngako inceku yamcedzela, wafa.

⁵⁵ Ema-Israyeli atsi kube abone kutsi Abimeleki sewufile, aphuma atibuyelela ekhaya.

⁵⁶ Nkulunkulu wabuphindzisela kanjalo-ke ku-Abimeleki lobo bubi labebentile kuyise ngekubulala bomnakabo lababengema-70.

⁵⁷ Nkulunkulu wawajezisa nalamadvodza aseShekhemu ngalobo bubi bawo. Sicalekiso lesakhulunywa nguJothamu, umsa waJerubhali, sagcina sibehlele.