Tikhulu 8 - Siswati 1996 Bible

¹ Sive saka-Efrayimu sabuta Gideyoni, satsi: “Usiphatseleni kanje? Awukasimemi ngani nawuyakulwa nemaMidiyani?” Bamsola kakhulu ngaloko.

² Kodvwa wabaphendvula watsi: “Yini nje lengiyente kahle kwendlula nine? Angitsi sivuno semagelebisi lesikhwinyitwa baka-Efrayimu sincono kakhulu kunesivuno sibili saka-Abiyezeri?

³ Nkulunkulu wanikela bo-Orebi naZebi, baholi bemaMidiyani, etandleni tenu. Yini lengikhone kuyenta kwendlula nine?” Ngaloko, kumsola kwabo kwabotja.

Gideyoni utfumba emakhosi akaMidiyani

⁴ Gideyoni nemadvodza akhe langema-300, nome abesadziniwe, kodvwa achubeka acosha emaMidiyani, aze ewelela ngesheya kwemfula iJordane.

⁵ Wakhuluma kulamadvodza aseSukhothi, watsi: “Phanini emabutfo ami kudla; asadziniwe futsi alambile, kantsi ngisachubeka kucosha boZeba naSalmuna, emakhosi emaMidiyani.”

⁶ Kodvwa tindvuna taseSukhothi tatsi: “Senibatfumbile yini boZeba naSalmuna? Kepha singawanikelani kudla lamabutfo akho?”

⁷ Gideyoni wabaphendvula watsi: “Njengobe nisho nje, kuyawutsi Simakadze anganikela boZeba naSalmuna esandleni sami, ngiyawudladlabula imitimba yenu ngemanyeva esiganga nangetinchachabutane.”

⁸ Wesuka lapho wakhuphukela ePheniyeli, nakhona wenta sona leso sicelo, kodvwa nabo bamphendvula njengalaba baseSukhothi.

⁹ Ngako wakhuluma kulamadvodza asePheniyeli, watsi: “Ngiyawutsi nase ngibuya sengincobile ngiwubhidlite lombhoshongo.”

¹⁰ BoZeba naSalmuna babeseKhakhori kanye nemphi yabo leyayinemadvodza labengaba ti-15 000, bonkhe lababesele emabutfweni etive tangasemphumalanga. Kwase kufe emadvodza lati-120 000, tingwazi cobo lwato.

¹¹ Gideyoni wenyuka ngendlela yetihambi emphumalanga yeNoba neJogbeha, watitsela etikwalamabutfo, wona angakacapheli.

¹² BoZeba naSalmuna, emakhosi lamabili emaMidiyani, babaleka, kodvwa wabacosha, wabakhandza, wabatfumba, wadvungulula yonkhe imphi yabo.

¹³ Gideyoni, umsa waJowashi, wabuya emphini ngeSikhala saseHeresi.

¹⁴ Wabamba lijaha laseSukhothi waliphenya ngemibuto, lona lase limbhalela emabito etindvuna taseSukhothi labengema-77, lekwakutibondza talelo dolobha.

¹⁵ Gideyoni weta kulamadvodza aseSukhothi, wafike watsi: “Naba boZeba naSalmuna, lenaningicoloshela ngabo, nitsi: ‘Sewubatfumbile yini boZeba naSalmuna? Pho, singawanikelani kudla lamabutfo akho lasadziniwe?’ ”

¹⁶ Watsatsa lamadvodza, tibondza telidolobha laseSukhothi, wafundzisa sifundvo ngekuwajezisa ngemanyeva esiganga nangetinchachabutane.

¹⁷ Waphindze wabhidlita umbhoshongo wasePheniyeli; wabulala nemadvodza alelo dolobha.

¹⁸ Wabuta boZeba naSalmuna watsi: “Bekubobani lamadvodza lenawabulala eThabori?” Bamphendvula batsi: “Lamadvodza abefanana nawe ngulowo nalowo abenesimo sebuntfwabenkhosi.”

¹⁹ Gideyoni wabaphendvula, watsi: “Lawo madvodza bekubomnaketfu, kungemadvodzana amake longitalako. Ngifunga kuphila kwaSimakadze, kube anibabulalanga, nami-ke bengingeke nginibulale.”

²⁰ Wagucukela ngakuJetheri, umsa wakhe lomdzala, watsi: “Babulale.” Kodvwa Jetheri akayihoshulanga inkemba yakhe, ngobe abesengumfana futsi esaba.

²¹ BoZeba naSalmuna bakhuluma, batsi: “Kota, kutekwentiwa nguwe matfupha loko; ‘indvodza yindvodza ngemandla ayo.’ ” Ngako Gideyoni wasondzela kubo wababulala, wase utsatsa imihlobiso etintsanyeni temakamela abo.

Leminye imisebenti yaGideyoni

²² Ema-Israyeli akhuluma kuGideyoni, atsi: “Sale sewusibusa, wena nemsa wakho nemtukulu wakho, ngobe usisindzise esandleni semaMidiyani.”

²³ Kodvwa Gideyoni wawatjela watsi: “Ngingeke nginibuse, ngisho nemsa wami imbala. NguSimakadze lotanibusa.”

²⁴ Wachubeka watsi: “Kunye lengikucelako, kutsi ngulowo nalowo angiphe licici esabelweni senu semphango.” Bekulisiko lema-Ishmayeli kufaka emacici egolide.

²⁵ Ema-Israyeli aphendvula atsi: “Singajabula kukunika wona.” Ngako endlala ingubo, bonkhe bantfu ngulowo nalowo wajika licici kuyo labelitsetse emphangweni yakhe.

²⁶ Sisindvo salamacici labewacelile saba ngemakhilogremu labengaba li-19 nemagremu langema-500, ngaphandle kwemihlobiso letinhlobonhlobo netingubo letatibukhwebeletane letatembatfwa ngemakhosi aseMidiyani kanye netingcibe lebetisetintsanyeni temakamela awo.

²⁷ Gideyoni wenta sidziya segolide, wasibeka edolobheni lakubo i-Ofra. Onkhe ema-Israyeli eta aphinga ngekukhonta sona; loko kwaba lugibe kuGideyoni kanye nemndeni wakhe.

Kufa kwaGideyoni

²⁸ Atfotjiswa kanjalo-ke emaMidiyani ngaphansi kwa-Israyeli, akazange aphindze atiphakamise. Ngesikhatsi saGideyoni ema-Israyeli aba nekuthula iminyaka lengema-40.

²⁹ Jerubhali, umsa waJowashi, wabuyela ekhaya kubo.

³⁰ Gideyoni abenemadvodzana labengema-70, labetalwa nguye, ngobe abenebafati labanyenti.

³¹ Lesinye singani sakhe, lesasihlala eShekhemu, samtalela indvodzana, layetsa libito watsi ngu-Abimeleki.

³² Gideyoni, umsa waJowashi, wafa asakhulile kakhulu ngeminyaka. Wangcwatjwa ethuneni leyise, Jowashi, lelalise-Ofra, kulema-Abiyezeri.

³³ Wenelela kufa nje Gideyoni, ema-Israyeli aphindze abuyela kuboBhali, aphinga nabo ngekubakhonta. Atimisela Bhali Bherithi, atsi ngunkulunkulu wawo,

³⁴ angete amkhumbula Simakadze Nkulunkulu wawo, labewephule etandleni tato tonkhe titsa tawo kuyo yonkhe indzawo.

³⁵ Akazange entele umusa emndenini waJerubhali lekwakunguGideyoni, njengako konkhe lokuhle labekwentele wona.