Tikhulu 7 - Siswati 1996 Bible

Gideyoni uhlasela emaMidiyani

¹ Ngakusasa ekuseni ngeluvivi, Jerubhali, labenguGideyoni, nawo onkhe emadvodza labehamba nawo bemisa emtfonjeni waseHarodi. Inkambu yabakaMidiyani yayingasenyakatfo esigodzini lesasisedvute neNtsaba iMore.

² Simakadze wakhuluma kuGideyoni, watsi: “Lamadvodza lohamba nawo manyenti kakhulu kutsi nginganikela emaMidiyani etandleni tawo, funa baka-Israyeli batishaye tifuba batsi: ‘Sitisindzise ngemandla etfu.’

³ Ngako memetela kulamadvodza utsi: ‘Nakukhona lowesabako nalongenwa ngemanti emadvolweni, akasuke lapha eNtsabeni iGileyadi, ancandzeke, abuyele ekhaya.’ ” Ngako kwancandzeka emadvodza lati-22 000, kwasala lati-10 000.

⁴ Kodvwa Simakadze wakhuluma kuGideyoni, watsi: “Asemanyenti lamadvodza. Watsatse wehlele nawo emfuleni, ngitakuhlungela wona khona lapho. Nangitsi: ‘Lona utawuhamba nawe,’ kufanele ahambe, kodvwa nangitsi: ‘Lona angeke ahambe nawe,’ kufanele angahambi.”

⁵ Ngako Gideyoni watsatsa lamadvodza wehlela emfuleni. Nasefike lapho, Simakadze wakhuluma kuye, watsi: “Yehlukanisa labo labanatsa ngekucapha lamanti njengenja, kulabo labaguca phansi nabanatsako.”

⁶ Emadvodza lanatsa emanti ngekuwakhaphatela nangekuwacapha aba ngema-300. Onkhe lawa lamanye emadvodza aguca phansi ngemadvolo anatsa.

⁷ Simakadze wakhuluma kuGideyoni, watsi: “Ngalamadvodza langema-300 lanatse ngekucapha ngitanisindzisa, nginikele emaMidiyani etandleni takho. Hambisa onkhe lawa lamanye emadvodza, ngulowo nalowo abuyele kubo.”

⁸ Ngako Gideyoni onkhe lamadvodza wawabuyisela emathendeni awo, kodvwa wasala nalawa langema-300, latsatsa imiphako nemacilongo alawa lamanye. Inkambu yemaMidiyani yayingentasi kwakhe, esigodzini.

⁹ Kubo lobo busuku Simakadze wakhuluma kuGideyoni, watsi: “Vuka, wehlele enkambu, ngobe ngitayinikela esandleni sakho.

¹⁰ Nawesabako kuhlasela, yehlela enkambu nenceku yakho, Phura,

¹¹ ulalele kutsi batsini. Emvakwaloko utawuba nesibindzi sekuyihlasela lenkambu.” Ngako yena naPhura, inceku yakhe, behlela kulabo lababegadze inkambu.

¹² EmaMidiyani, nema-Amaleki, nato tonkhe tive tangasemphumalanga tatimise esigodzini, titse gwacalala njengemabulo esikhonyane. Emakamela ato abengeke asabaleka, abesafanana nesihlabatsi selusentse lwaselwandle.

¹³ Gideyoni wefika ngesikhatsi lenye indvodza isalandzisa umnganayo liphupho itsi: “Ngibhudze sinkhwa sebhali lesiyindingilizi sita sigicikela enkambu yemaMidiyani. Sifike sashaya lithende ngemandla laze lasiphuka, lafohloka.”

¹⁴ Lomnganakhe waphendvula watsi: “Phela loko kungeke kusho lutfo ngaphandle kwenkemba yaGideyoni, umsa waJowashi, waka-Israyeli. Nkulunkulu unikele emaMidiyani nenkambu yonkhe esandleni sakhe.”

¹⁵ Watsi kube Gideyoni eve leliphupho kanye nenchazelo, wakhotsama Nkulunkulu, wamkhonta. Wancandzeka wabuyela enkambu yaka-Israyeli, wafike wamemeta watsi: “Vukani! Simakadze unikele inkambu yemaMidiyani esandleni senu!”

¹⁶ Wahlela lamadvodza langema-300, wawenta emabutfo lamatsatfu. Onkhe lamadvodza wawanika emacilongo nemajeke labengenalutfo, kanye netidlwane lebetisekhatsi emajekeni, watsi ngulowo nalowo akakubambe ngetandla.

¹⁷ Wabayala watsi: “Nibobuka mine, ningilingise. Nitawutsi nangifika emnyeleni wenkambu, nente njengobe nami ngenta.

¹⁸ Nangabe mine nalaba labangalapha ngakimi sishaya emacilongo etfu, nani nonkhe, kutungeleta yonkhe inkambu, niboshaya emacilongo enu nimemete nitsi: ‘YaSimakadze neyaGideyoni.’ ”

¹⁹ Gideyoni nalamadvodza lalikhulu labehamba naye befika emnyeleni wenkambu ekhatsi nebusuku nabasandza kuntjintja laba lababegadze inkambu. BoGideyoni bashaya emacilongo abo, bafohlota lamajeke labebawaphetse ngetandla.

²⁰ Onkhe-ke lamabutfo lamatsatfu ashaya emacilongo awo afohlota nalamajeke awo, abambe letidlwane ngesancele, ngesekudla aphetse lamacilongo labewashaya, amemeta atsi: “Inkemba yaSimakadze naGideyoni!”

²¹ Kwatsi bonkhe bantfu baseme etindzaweni tabo batungelete lenkambu, onkhe emaMidiyani abaleka, akhalela etulu.

²² Atsi kube lamacilongo langema-300 akhale, Simakadze wasanganisa onkhe lawo madvodza labekuleyo nkambu yemaMidiyani, agucukelana odvwana, agwazana. Imphi yonkhe yesuka yabaleka yacondza eBhethi Shitha kuya eSerera, kuze kuyewufika emnyeleni we-Abela Mehola, eceleni kweThabhathi.

²³ Ema-Israyeli akaNaftali, newaka-Asheri, nawo onkhe akaManase amenyetwa, acosha emaMidiyani.

²⁴ Gideyoni wakhipha tigijimi kulo lonkhe live letintsaba laka-Efrayimu, watsi: “Yehlani nihlasele emaMidiyani, niyekuwavimbetela etindzaweni tonkhe temanti nasematubukweni emfula iJordane asengakefiki, nize niyewufika eBhethi Bhara.” Ngako onkhe emadvodza aka-Efrayimu amenyetwa ahamba ayawuvimba tonkhe tindzawo letatinemanti nasematubukweni emfula iJordane, kuze kuyewufika eBhethi Bhara;

²⁵ adzimate atfumba nebaholi lababili bemaMidiyani, bo-Orebi naZebi. Orebi yena bambulalela edvwaleni lase-Orebi, kwatsi Zebi yena bambulalela etjeni lekuhlutela liwayini lelaliseZebi. EmaMidiyani bawacosha, baze babuya netinhloko tabo-Orebi naZebi, bafike batinika Gideyoni, labamkhandza ngesheya kwemfula iJordane.