Tikhulu 5 - Siswati 1996 Bible

Ingoma yaboDebhora naBharaki

¹ Ngalona lelo langa boDebhora naBharaki, umsa wa-Abinowami, bahlabela ingoma, batsi:

² “Baholi baka-Israyeli bahamba embili, bantfu batinikela bona ngenhlitiyo lemhlophe. Dvumisani Simakadze!

³ “Lalelani lapha, nine makhosi! Lalelani nani babusi. Ngiyakuhlabela kuSimakadze. Ngiyakuhlabela ngidvumise Simakadze, Nkulunkulu wema-Israyeli.

⁴ “Yebo, Simakadze, nawuphuma eSeyiri, nawuhlasela usuka eveni laka-Edomu, umhlaba watamatama, emazulu acitsa. Emafu acitsa imvula.

⁵ Tintsaba tatamatama embikwaSimakadze, longuSimakadze waseSinayi. Tatamatama embikwaSimakadze, Nkulunkulu wema-Israyeli.

⁶ “Ngemihla yaShamgari, umsa wa-Anathi, yebo, ngemihla yaJayeli imigwaco yayekelwa, tihambi tangenela tindledlana letijikeletako.

⁷ Emakhaya kwakukhala libhungane, kwaze kwavuswa mine, Debhora, ngavuka njengenina wesive sema-Israyeli.

⁸ Nabakhetsa bonkulunkulu labasha, kwefika imphi emasangweni emadolobha; kwabate lihawu nesikhali lokwabonakala kulabati-40 000 baka-Israyeli.

⁹ Inhlitiyo yami ikubaholi baka-Israyeli, yebo, ikulabo labatinikele emkhatsini wesive. Dvumisani Simakadze!

¹⁰ “Nine lenigibela timbongolo letimhlophe, nihleti etihlalweni tetingubo, nani lenihamba ngendlela, khulumani ngako loku.

¹¹ Lalelani emaphimbo ebahlabeleli emitfonjeni. Babonga bagambute ngetento letilungile taSimakadze, tento letilungile temabutfo akhe aka-Israyeli. Sive saSimakadze sehla, sehlela emasangweni elidolobha.

¹² “Vuka, vuka, Debhora! Vuka, vuka uhlabele ingoma! Sukuma, Bharaki! Tfumba batfunjwa bakho, wena msa wa-Abinowami.

¹³ “Kwatsi emadvodza labesasele ehlela kubahlonishwa. Bantfu baSimakadze beta kimi, ngisho bonkhe labanemandla ekulwa.

¹⁴ Labanye bachamuka ka-Efrayimu, labatimphandze tabo tika-Amaleki. Bhenjamini abekanye nebantfu lababekulandzela. Tindvuna tehla tiphuma kaMakhire, netiphatsimandla tiphuma kaZebuloni, tiphetse intfonga yendvuna yemphi.

¹⁵ Emakhosi aka-Isakhari abenaDebhora, yebo, Isakhari abenaBharaki, agijima amlandzela aya esihosheni. Emitfonjeni yakaRubeni kwaba khona kutihlolisisa kakhulu enhlitiyweni.

¹⁶ Nisaleleni netimvu ngemuva kutekulalela tinkwela tebelusi? Emitfonjeni yakaRubeni kwaba khona kutihlolisisa kakhulu enhlitiyweni.

¹⁷ Gileyadi abehlala ngesheya kweJordane. Kepha Dani abentiwa yini kutsi azulazule ngasemikhunjini? Asheri wasala ngaselusentseni lwelwandle, wahlala akhululekile ematubukweni alo.

¹⁸ Sive sakaZebuloni satilahla ematsambo, sinikela imphilo yaso. Naye Naftali wenta njalo ematsafeni.

¹⁹ “Emakhosi eta, alwa; emakhosi aseKhenani alwa khona eThanaki ngasemitfonjeni yaseMegido, kodvwa abetfwalanga siliva, ngisho nemphango.

²⁰ Esibhakabhakeni tinkhanyeti talwa, yebo, tisagijima ngemivila yato, talwa naSisera.

²¹ Umfudlana iKhishoni wabakhukhula, umfudlana lomdzala, umfudlana iKhishoni. Mphefumulo wami, chubeka, unyatsele ngemandla!

²² “Kwadvuma tigi tetinselo temahhashi. Gidzidzidzi! Gidzidzidzi! Aholobha emahhashi akhe lanemandla!

²³ “Ingilosi yaSimakadze yatsi: ‘Calekisa Merozi. Calekisa bantfu bayo kabuhlungu, ngobe abazange bete kutawusita Simakadze, yebo, kutawusita Simakadze, nakalwa nalabanemandla.’

²⁴ “Akabusiswe kakhulu Jayeli kulabasikati, umfati waHebere, umKheni. Akabusiswe kakhulu kunabo bonkhe labasikati labahlala emathendeni.

²⁵ Sisera wacela emanti, Jayeli wamnika lubisi ngendzebe lelungele bahlonishwa. Wamletsela lubisi lolunelulata.

²⁶ Sandla saJayeli sacukula sikhonkhwane selithende, sandla sakhe sangesekudla satsatsa sandvo sembati. Waphisela Sisera, wamphihlita inhloko, yebo, wamfohlota wamhlahlela enhlafunweni.

²⁷ Sisera wacimuleka etinyaweni taJayeli, walala khona lapho. Sisera wacimuleka etinyaweni taJayeli, lapho awela khona. Ngulapho acimuleka khona, wawa, wafa.

²⁸ “Unina waSisera wahlola ngelifasitelo, wakhala emvakwelutsango lwendlu watsi: ‘Kwentiwa yini kutsi incola yakhe yephute kangaka kubuya? Kwentiwa yini bukhehlekhehle betincola takhe bephute kuvakala?’

²⁹ Emkhatsini wemantfombatana akhe lehlakaniphe kakhulu yamphendvula. Yebo, yakhuluma kuye, yatsi:

³⁰ ‘Kambe ngabe babutsa behlukaniselane imphango, kutsi intfombi yinye nome timbili tibe tendvodza yinye, kutsi tembatfo letimibalabala tibe taSisera, yebo, tembatfo letimibalabala naletihlotjisiwe tibe yimphango, tembatfo letihlotjiswe ngala nangale tentsamo yami, konkhe loku kube yimphango?’

³¹ “Yebo, Simakadze, shangatsi tonkhe titsa takho tingabhubha. Kodvwa labo labatsandza wena bangakhanya njengelilanga naliphumako ngemandla alo.” Live laba nekuthula iminyaka lengema-40.