Tikhulu 4 - Siswati 1996 Bible

Debhora

¹ Emvakwekufa kwa-Ehudi, ema-Israyeli aphindza enta lokubi emehlweni aSimakadze.

² Ngako Simakadze wawanikela kuJabini, inkhosi yaseKhenani, labebusa eHasori. Indvuna yemphi yakhe kwakunguSisera, labehlala eHaroshethi Hagoyimu.

³ Jabini abenetincola tensimbi letatingema-900; wabusa sive sema-Israyeli ngelulaka nangesihluku iminyaka lengema-20. Ema-Israyeli akhala acela lusito kuSimakadze.

⁴ Debhora, umphrofethikati, umfati waLapidothi, abengumholi wema-Israyeli ngaleso sikhatsi.

⁵ Nakateka emacala, abevamise kuhlala ngaphansi kwesihlahla seLisundvu laDebhora, emkhatsini weRama neBetheli, eveni letintsaba laka-Efrayimu; sive sema-Israyeli sasita kuye sitekwehlulelwa nguye emibangweni yaso.

⁶ Watfumela kutsi kubitwe Bharaki, umsa wa-Abinowami, eKhedeshi kulakaNaftali, walayeta kuye watsi: “Simakadze, Nkulunkulu wema-Israyeli, ukuyala utsi: ‘Hamba uyewutsatsa emadvodza lati-10 000 akaNaftali newakaZebuloni uwahole uye eNtsabeni iThabori.

⁷ Ngitamuhunga Sisera, indvuna yemphi yaJabini, kanye netincola nemabutfo akhe emphi kutsi aye emfuleni iKhishoni, ngimniketele esandleni sakho.’ ”

⁸ Bharaki wamphendvula watsi: “Ngitakuya nangabe nawe utawuhamba nami; kodvwa nangabe awuhambi nami, ngingeke ngiye.”

⁹ Debhora watsi: “Kulungile, ngitawuhamba nawe, kodvwa ngenca yaloko ludvumo lungeke lube lwakho, ngobe Simakadze utawunikela Sisera esandleni semfati.” Ngako Debhora wahamba naBharaki baya eKhedeshi,

¹⁰ lapho efike wabita boZebuloni naNaftali. Abelandzelwa ngemadvodza lati-10 000, naDebhora wahamba kanye nabo.

¹¹ Hebere, umKheni, abesatehlukanisile nesive semaKheni, situkulwane sakaHobabi, umkhwenyewaboMosi, wayakumisa lithende lakhe eceleni kwesihlahla lesikhulu eveni laseSananimu eceleni kweKhedeshi.

¹² Batsi kube bamtjele Sisera kutsi Bharaki, umsa wa-Abinowami, sewukhuphukele eNtsabeni iThabori,

¹³ Sisera wabutsa tincola takhe tensimbi letatingema-900 nawo onkhe emadvodza, esuka eHaroshethi Hagoyimu aze efika emfuleni iKhishoni.

¹⁴ Debhora wakhuluma kuBharaki, watsi: “Sukuma uhambe, lamuhla ngilo lilanga lapho Simakadze anikela Sisera esandleni sakho. Simakadze akahambi embikwakho yini?” Ngako Bharaki wehla eNtsabeni iThabori alandzelwa ngemadvodza lati-10 000.

¹⁵ Kwatsi ekuhlaseleni kwaBharaki Simakadze wasanganisa wabhubhisa Sisera kanye netincola takhe temphi, nemabutfo akhe, ngelusiko lwenkemba. Sisera washiya incola yakhe, wabaleka ngetinyawo.

¹⁶ Kodvwa Bharaki wacosha tincola kanye nayo yonkhe imphi, waze wayawufika eHaroshethi Hagoyimu. Onkhe emabutfo aSisera awa ngelusiko lwenkemba, kwabate ngisho namunye lowaphunyuka.

¹⁷ Noko Sisera yena wabaleka ngetinyawo, waze wayawungenisa ethendeni lakaJayeli, umfati waHebere, umKheni, ngobe kwakunebudlelwane emkhatsini waJabini, inkhosi yaseHasori, nelusendvo lwakaHebere, umKheni.

¹⁸ Jayeli waphuma wahlangabeta Sisera, wafike watsi kuye: “Wota nkhosi yami, ngena ngekhatsi, ungesabi.” Ngako Sisera wangena ethendeni lakhe, Jayeli wambonya ngengubo yekulala.

¹⁹ Wakhuluma kuJayeli, watsi: “Ngomile, ngicela mane unginatsise emanti.” Wagwabula ingula yelubisi wamnatsisa, wabuye wamgubhetela.

²⁰ Sisera wakhuluma kulomfati, watsi: “Mani emnyango welithende; nakukhona lofikako akubute kutsi ukhona yini umuntfu lokhona lapha ngekhatsi, ubotsi: ‘Kute.’ ”

²¹ Kodvwa Jayeli, umkaHebere, wesuka watsatsa sikhonkhwane selithende kanye nesandvo, wamnyonyobela ngesikhatsi asetumekile alele. Wafike wamphisela ngalesikhonkhwane enhlafunweni, saze sayawuphumela emhlabatsini; kwaba kufa kwaSisera njalo loko.

²² Bharaki wefika acosha Sisera, Jayeli waphuma wamhlangabeta, wafike watsi: “Wota, ngitekukhombisa lendvodza loyifunako.” Ngako wangena kanye naye. Wabona Sisera alele nesikhonkhwane selithende enhloko yakhe, afile.

²³ Ngalelo langa Nkulunkulu wancoba Jabini, inkhosi yemaKhenani, wamehlisa embikwema-Israyeli.

²⁴ Sandla sema-Israyeli sacina saba nemandla etikwaJabini, inkhosi yemaKhenani, ema-Israyeli, aze ambhubhisa amcedza.