Tikhulu 21 - Siswati 1996 Bible

Bafati besive sakaBhenjamini

¹ Emadvodza abente sifungo aseseMispa, atsi: “Kute ngisho namunye loyakwendzisa indvodzakati yakhe kumuntfu wesive sakaBhenjamini.”

² Sive sakhuphukela eBetheli, lapho safike sahlala phansi embikwaSimakadze; laze layawushona solomane simpongoloza sikhala kabuhlungu,

³ sitsi: “Awu! Simakadze, Nkulunkulu wema-Israyeli, loku kwentekeleni ka-Israyeli? Kwentiwa yini kutsi kube nesive lesinyamalalako ka-Israyeli lamuhla?”

⁴ Ekuseni ngakusasa bantfu bavuka bakha lilati, betfula khona iminikelo yekushiswa neminikelo yekuthula.

⁵ Baka-Israyeli babuta batsi: “Ngubani emkhatsini wato tonkhe tive taka-Israyeli longazange aye kuyawuhlangana embikwaSimakadze?” Phela bebafunge bagomela kutsi lowo longazange ete emhlanganweni embikwaSimakadze eMispa uyawubulawa nome kanjani.

⁶ Baka-Israyeli basidzabukela sive sakaBhenjamini, lesasingumnakabo, batsi: “Lamuhla lesinye sive sincunyiwe etiveni taka-Israyeli.

⁷ Sitawubanika kanjani bafati laba lase basele, ngobe sesente sifungo ngaSimakadze kutsi singabendziseli ngisho namunye wemadvodzakati etfu?”

⁸ Ngako base bayabuta batsi: “Ngusiphi sive, etiveni tema-Israyeli, lesingazange site emhlanganweni embikwaSimakadze eMispa?” Bakhandza kutsi bekute ngisho namunye lophuma eJabeshi Gileyadi labetile enkambu kulowo mhlangano.

⁹ Batsi nasebabala bantfu, bakhandza kutsi bekute ngisho namunye lobuya kulaseJabeshi Gileyadi labekhona.

¹⁰ Ngako umhlangano watfumela emabutfo lati-12 000 kutsi aye eJabeshi Gileyadi, afike abulale bonkhe labahlala khona, ngisho nebafati nebantfwana.

¹¹ Batsi: “Naku lekufanele nikwente: nifike nibulale bonkhe labadvuna nalabasikati labangasito tintfombi letingayati indvodza ngekulala nayo.”

¹² Bakhandza emkhatsini webantfu lababehlala eJabeshi Gileyadi kutsi bekunetintfombi letatingayati indvodza ngekulala nayo tingema-400; batitsatsa bahamba nato, batimikisa enkambu leyayiseShilo eKhenani.

¹³ Ngako umhlangano watfumela livi kubakaBhenjamini lababehlala edvwaleni iRimoni, bamemetela kubo kuthula.

¹⁴ Ngako bakaBhenjamini babuya ngaleso sikhatsi, bafike babanika letintfombi taseJabeshi Gileyadi letatisele tingakabulawa. Noko atizange tibenele bonkhe.

¹⁵ Sive sabadzabukela bakaBhenjamini, ngobe Simakadze abesavule sikhala etiveni taka-Israyeli.

¹⁶ Baholi bemhlangano bakhuluma batsi: “Ngenca yalabafati bakaBhenjamini lababulewe, sitabatsatsaphi bafati bekunika lamadvodza lasilele?

¹⁷ Lensali yakaBhenjamini kufanele ibe netindlalifa, kuze lesive saka-Israyeli singapheli.

¹⁸ Tsine ma-Israyeli singeke sibendzisele emadvodzakati etfu, ngobe safunga satsi: ‘Akacalekiswe lowo loyakwendzisa indvodzakati yakhe kaBhenjamini.’ ”

¹⁹ Bachubeka batsi: “Bukani la, kukhona umkhosi waSimakadze eShilo logujwa kanye ngemnyaka, ngasenyakatfo yaseBetheli, emphumalanga nemgwaco lomkhulu lowendlula eBetheli ucondze eShekhemu, ngaseningizimu yeLebona.”

²⁰ Ngako batjela lamadvodza akaBhenjamini batsi: “Hambani niyewubhaca lapha etivinini,

²¹ nilindze; kutawutsi tintfombi taseShilo natichamuka nato titewugidza, nine bese niyaphoseka niphuma lapha etivinini, ngulowo nalowo atibambele wakhe umfati kuletintfombi taseShilo, nihambe nibuyele eveni lakini kaBhenjamini.

²² Kutawutsi boyise nabomnakabo nabakhala kitsi, tsine sibatjele sitsi: ‘Mane nisentele bubele nibasite, ngobe asizange sibatsatsele bafati ngesikhatsi semphi, futsi-ke nine aninacala, ngobe abakendziselwa ngini lamadvodzakati enu.’ ”

²³ Ngako lamadvodza akaBhenjamini avele enta njalo. Kwatsi letintfombi tisagidza, kwaba nguleyo ndvodza yatibambela yinye intfombi, yayetfwala, yahamba nayo, yayawuba ngumfati wayo. Lamadvodza abuyela efeni lawo, afike avusa emadolobha; abuyela ahlala kahle.

²⁴ Ngaleso sikhatsi onkhe ema-Israyeli esuka kuleyo ndzawo abuyela emakhaya, ngulowo nalowo wabuyela esiveni sakubo naselusendvweni lwakhe, efeni lakabo.

²⁵ Ngaleto tikhatsi sive sema-Israyeli sasingenayo inkhosi, ngulowo nalowo abetentela loko lakubona kukuhle emehlweni akhe.