Tikhulu 2 - Siswati 1996 Bible

Ingilosi yaSimakadze eBhokhimu

¹ Ingilosi yaSimakadze yakhuphuka isuka eGilgali yaya eBhokhimu, yafike yatsi: “Nganikhipha eveni laseGibhithe, nganihola ngaze nganingenisa kulelive lengafunga ngalo ngatsi ngiyakulinika boyihlomkhulu. Ngatsi kubo: ‘Ngingeke ngisephule sivumelwane sami nani.

² Nani aniyikusenta sivumelwane nebantfu bakulelive, kodvwa niyakuwabhidlita emalati abo.’ Noko nine anikangilaleli. Nikwenteleni loku?

³ Manje-ke ngiyanitjela ngitsi ngingeke ngisaticosha letive embikwenu. Setiyawuba ngemanyeva emihlubulweni yenu, nabonkulunkulu bato sebayawuba lugibe kini.”

⁴ Kwatsi kube ingilosi yaSimakadze ikhulume konkhe loku esiveni sema-Israyeli, sive sonkhe sakhala kakhulu,

⁵ saze setsa leyo ndzawo satsi yiBhokhimu. Ngulapho-ke lapho banikela khona ngemihlatjelo kuSimakadze.

Kufa kwaJoshuwa

⁶ Kwatsi kube Joshuwa awakhulule ema-Israyeli, kwaba ngulowo nalowo wayawutitsatsela sabelo sakhe kulelo live.

⁷ Sive sakhonta Simakadze imphilo yonkhe yaJoshuwa kanye neyalabadzala labaphila kwendlula yena baze babona tonkhe tintfo letinkhulu Simakadze latentela sive sema-Israyeli.

⁸ Joshuwa, umsa waNuni, inceku yaSimakadze, wafa asaneminyaka leli-110.

⁹ Bamngcwaba eveni lelalisabelo sakhe eThimnathi Heresi, eveni letintsaba kulaka-Efrayimu, enyakatfo neNtsaba iGashi.

¹⁰ Kwatsi kube sonkhe leso situkulwane sife siphele, kwavela lesinye situkulwane saka-Israyeli lesasingazange simati Simakadze singatani nangetintfo lake watentela sive saka-Israyeli.

Sive sema-Israyeli siyekela kukhonta Simakadze

¹¹ Ngako sive sema-Israyeli senta lokubi emehlweni aSimakadze; sakhonta boBhali.

¹² Bafulatsela Simakadze, Nkulunkulu waboyise, lowabakhipha eGibhithe. Balandzela bakhonta labanye bonkulunkulu labehlukene baleto tive labebahlala emkhatsini wato. Batfukutselisa Simakadze,

¹³ ngekutsi bamfulatsele yena bayewukhonta boBhali nabo-Ashtarothe.

¹⁴ Intfukutselo yaSimakadze yabavutsela baka-Israyeli, wabanikela etandleni tebaphangi, tabaphanga. Wabanikela etandleni tetitsa tabo letatibatungeletile, bangabe basakwati ngisho nekutivikela kuto.

¹⁵ Kwakutsi njalo baka-Israyeli nabaya kuyakulwa, sandla saSimakadze sibahlanekele njengobe abefungile kubo. Babaselusizini lolukhulu.

¹⁶ Ngako Simakadze wabe sewubavusela tikhulu letatingutona tabephula etandleni talabo baphangi.

¹⁷ Noko baka-Israyeli abazange batilalele tikhulu tabo, bachubeka baphinga nalabanye bonkulunkulu, bakhonta bona. Abazange babalingise boyise, bona bajika masinyane endleleni lababehamba ngayo boyise, indlela yekulalela imiyalo yaSimakadze.

¹⁸ Kwakutsi njalo nje Simakadze nakabavusela sikhulu, abenaso lesikhulu, abasindzise etandleni tetitsa tabo, nasisekhona leso sikhulu; ngobe Simakadze abeba nesihe nabo ngesikhatsi sebakhaliswa kucindzetelwa nakushaywa titsa tabo.

¹⁹ Kodvwa kwakutsi nje sikhulu singafa, bantfu babuyele etindleleni tabo letimbi kakhulu kunetaboyise, balandzele labanye bonkulunkulu, babakhonte, bakhotsame kubo. Bala kwehlukana netindlela tabo letimbi, nemikhuba yabo, nenkhani yabo.

²⁰ Ngako Simakadze wasitfukutselela kakhulu sive sema-Israyeli, watsi: “Njengobe lesive sisephulile sivumelwane lengasibekela boyisemkhulu, futsi asikangilaleli,

²¹ angisayikusicosha ngisho nasinye sive embikwaso kuleto letashiywa nguJoshuwa ekufeni kwakhe.

²² Sengiyawusebentisa tona nangivivinya sive sema-Israyeli, kuze ngibone kahle kutsi siyakuyigcina yini indlela yaSimakadze, sihambe ngayo, njengobe kwakwenta bokhokho baso.”

²³ Ngako Simakadze wativumela leto tive kutsi tihlale, wangete waticosha masinyane ngekutinikela esandleni saJoshuwa.