Tikhulu 19 - Siswati 1996 Bible

UmLevi nesingani sakhe

¹ Ngaleso sikhatsi sive saka-Israyeli sasite inkhosi. Lomunye-ke umLevi labehlala endzaweni lesemaphandleni, eveni letintsaba kulaka-Efrayimu, waganwa watitsatsela nesingani saseBhetlehema kulakaJuda.

² Kodvwa lesingani sakhe sasingaketsembeki kuye. Samshiya sabuyela ekhaya kubo eBhetlehema kulakaJuda. Sahlala lapho kwaze kwaphela tinyanga letine,

³ waze lomLevi wahamba wayakusincenga kutsi sibuye. Abehamba nesisebenti sakhe netimbongolo letimbili. Safike samngenisa endlini yeyise; uyise watsi nakambona, wamemukela ngekujabula.

⁴ Uyisetala, uyise walentfombi, wamncenga kutsi ahlale; ngako wahlala naye emalanga lamatsatfu, badla, banatsa naye, walala khona lapho.

⁵ Kwatsi ngelilanga lesine bavuka ekuseni, watilungiselela kuhamba, kodvwa loyise walesingani wakhuluma kulomkhwenyane wakhe, watsi: “Ticabule ngalokudliwako kucala, bese-ke uyahamba.”

⁶ Ngako base bahlala phansi bobabili, badla, banatsa ndzawonye. Emvakwaloko loyise walentfombatana watsi: “Ngiyacela, sale ulala kulobusuku balamuhla, khona utetijabulisa.”

⁷ Watsi lomLevi nakatsi uvukela kutsi asale ahamba, uyisetala wamncenga; ngako wase uyahlala ngalobo busuku.

⁸ Ekuseni ngelilanga lesihlanu lomLevi watsi uyavuka asatilungiselela kutsi ahambe, uyisetala wakhe watsi: “Ase uticabule, sewuhlale kuze kusuluke lilanga!” Ngako baphindza bahlala phansi bobabili badla.

⁹ Lendvodza nalesingani sayo nalesisebenti batsi nabatilungiselela kuhamba, uyisetala, uyise walesingani, watsi: “Buka la, manje sekuyahwalala, sale senilala, ngobe vele selishonile. Hlala phansi utijabulise, kutawutsi kusasa ekuseni uvuke-ke uhambe indlela leya ekhaya.”

¹⁰ Kodvwa lendvodza ngobe yayingasafuni kuphindze ilale lobunye busuku, yesuka yacondza eJebhusi, lekuyiJerusalema, yahamba kanye nalesingani sayo netimbongolo tayo letimbili letatiboshelwe.

¹¹ Batsi nase basedvutane neJebhusi nelilanga lase liyawumbamba unina, lesisebenti sakhuluma kulomnumzane waso satsi: “Buyani siphambukele kulelidolobha lemaJebhusi, silale khona busuku bunye.”

¹² Umnumzane waso wasiphendvula watsi: “Cha; singeke singenise edolobheni lebetive, bantfu labangesiwo ema-Israyeli. Sitakwendlula siye eGibeya.”

¹³ Wachubeka watsi: “Buyani setame kuyawufika eGibeya nome-ke eRama, sifike silale kulenye yaleto tindzawo.”

¹⁴ Ngako-ke bachubeka bahamba; lilanga labashonela nabayawungena eGibeya kulakaBhenjamini.

¹⁵ Befika lapho bema, sebatawulala khona. Bahamba bayawuhlala enkhundleni yelidolobha, kwabate namunye lowabanaka kutsi abatsatse ayekubangenisa kakhe, bayewulala khona.

¹⁶ Ngaleyo ntsambama kwachamuka likhehla, lelalilaseveni letintsaba laka-Efrayimu, lalihlala lapha eGibeya, bantfu bakuleyo ndzawo bekubakaBhenjamini. Lelikhehla lalitibuyela emasimini alo.

¹⁷ Latsi nalibuka labona letihambi tihleti lapha enkhundleni yelidolobha, labuta lelikhehla latsi: “Nilibangisephi? Nilichamukisaphi?”

¹⁸ Lendvodza yaliphendvula yatsi: “Ngekwetfu siyendlula, silichamukisa lena eBhetlehema kulakaJuda, silibhekise khashane kulela letintsaba laka-Efrayimu, lapho ngakhe khona. Bengilena eBhetlehema kulakaJuda, manje sengiya ekhaya kami. Kute namunye longitsetse wangingenisa endlini yakhe.

¹⁹ Sinetinhlanga netjani baletimbongolo tetfu, nesinkhwa neliwayini letfu, tsine tinceku takho: mine nceku yakho, nalencekukati yakho, nalensizwa lesihamba nayo. Asidzingi lutfo.”

²⁰ Lelikhehla lakhuluma kubo, latsi: “Kuthula akube kini! Nemukelekile endlini yami. Ngitaninika konkhe lenikudzingako. Mane nje ningacali nilale lapha enkhundleni yelidolobha ebusuku.”

²¹ Ngako labatsatsa layawubangenisa endlini kalo; lapha naletimbongolo tabo tjani, tadla. Batsi nase bacedzile kugeza tinyawo tabo, base bahlala phansi, badla banatsa.

²² Batsi basachubeka nekudla, batijabulisa, lamanye emadvodza labetidlova takulelo dolobha atseleka, abavimbetela kulendlu. Agunkluta lesivalo salendlu, abememeta lelikhehla, umnikati walendlu, atsi: “Khipha lendvodza lengenise lapha kakho, sifuna kulala nayo.”

²³ Lomnikati walendlu waphumela ngaphandle wakhuluma nawo, watsi: “Hhayi, bangani bami, ningayenti intfo leluhlata kangaka. Njengobe lendvodza isivakashi sami, ningayenti lentfo lelihlazo kangaka.

²⁴ Bukani la, nansi indvodzakati yami lengayati indvodza ikanye nalesingani salendvodza. Ngitanikhiphela bona masinyane, ningasebentisa bona, nente nome ngabe yini kubo leniyifunako, kodvwa kulendvodza ningabenti lobubi lobulihlazo kangaka.”

²⁵ Kodvwa lamadvodza latidlova akazange amlalele kutsi utsini. Ngako lomnumzane wakhipha lesingani sakhe, wawanika; asidlwengula, asigilisa tonkhe tiga, kwaze kwasa, ase ayasiyekela.

²⁶ Kwatsi nasekusile lesingani sabuyela emuva kulendlu lapho bebangenise khona nalendvodza yaso, safike satijika emnyango, salala, satsi dzalakaca, kwaze kwaphuma lilanga.

²⁷ Lendvodza yaso yatsi nayivuka ekuseni seyilungele kuchubeka neluhambo lwayo, yavula umnyango yakhandza lesingani sayo silele, sise dzalakaca ngasemnyango, tandla taso telulekele ngasesivalweni.

²⁸ Yakhuluma kuso lesingani, yatsi: “Vuka sambe.” Kodvwa kwabate imphendvulo. Lendvodza yase isetjatsisa lapha embongolweni lesingani sayo, yangenela indlela yayo yaya kayo.

²⁹ Yatsi kube ifike ekhaya lendvodza yatsatsa umukhwa, yahlinza sidvumbu salesingani sayo ikhipha sitfo ngasinye ngasinye, saze saba titfo letili-12, yatfumela letitfo kuto tonkhe tigodzi kulaka-Israyeli.

³⁰ Bonkhe lababetibona babekhuta bababate batsi: “Yehheni! Intfo lenje ayizange seyibonwe, futsi akuzange sekwenteke, seloku sive sema-Israyeli sakhuphuka nasiphuma eGibhithe. Cabangisisangi ngalokhu! Kufanele kutsatselwe tinyatselo! Sifuna kuva kahle kutsi kufanele sente njani!”