Tikhulu 18 - Siswati 1996 Bible

Mikha nesive sakaDani

¹ Ngaleso sikhatsi sive saka-Israyeli sasite inkhosi. Kungatona leto tikhatsi lapho sive sakaDani sasehla senyuka, sifuna indzawo lapho sasingahlala khona, sakhe, ibe yindzawo yaso; ngobe sona sasingakasitfoli sabelo saso etiveni taka-Israyeli.

² Ngako sive sakaDani satfumela tingwazi letisihlanu, tisuka eSora nase-Eshtayoli, kutsi tiyewuhlola live tilitfungatse. Letingwazi tatimelele tonkhe tinsendvo tato. Bakubo batitjela batsi: “Hambani niyewuhlola lelive, nilitfungulute lonkhe.” Lamadvodza alingenela live letintsaba laka-Efrayimu, aze efika ekhaya kaMikha, lapho efika alala khona.

³ Lamadvodza atsi nasasondzela lapha ekhaya kaMikha, aliva livi lalensizwa leyayingumLevi, ngako ase ayaphambukela; angena, ayibuta atsi: “Waletfwa ngubani lapha? Umsebenti wakho lowentako yini kulendzawo? Ufunani lapha?”

⁴ Lensizwa yase ibatjela konkhe lokwentiwa nguMikha kuyo, yatsi: “Ungicashile, sengingumphristi wakhe.”

⁵ Lamadvodza atsi kuye: “Sicela mane usibutele kuNkulunkulu kutsi kungabe luhambo lwetfu lutawuphumelela kahle yini.”

⁶ Umphristi wawaphendvula watsi: “Hambani nekuthula. Luhambo lwenu luvunywe nguSimakadze.”

⁷ Ngako lamadvodza lasihlanu ahamba aze efika kulaseLayishi, lapho efika akhandza kutsi bantfu bakhona baphila kahle nangekuphepha, njengebaseSidoni, babengasoli lutfo futsi bavikelekile. Njengobe-ke lelive labo lalingesweli lutfo, babesive lesiphumelelako. Babehlala khashane kakhulu nebaseSidoni, bangenabo ngisho lobuncane budlelwane nalabanye bantfu.

⁸ Atsi nasabuyela emuva eSora nase-Eshtayoli, bantfu bakubo bawabuta batsi: “Nitikhandze tinjani tintfo?”

⁹ Abaphendvula atsi: “Asihambeni sibahlasele! Sesibonile kutsi lelive lihle kakhulu. Anisiwulibala kuhlala lapha ningenti lutfo. Buyani silihlasele silidle.

¹⁰ Nanifika lapho, nitawukhandza kutsi bantfu bakhona abasoli lutfo, ngisho naloluncane. Lelo-ke live lelikhulu leninako konkhe lokungahle kudzingwe ngumuntfu, Nkulunkulu ulinike nine.”

¹¹ Ngako kwahloma emadvodza langema-600, esive sakaDani, ahlomela imphi, ashuca onkhe esuka eSora nase-Eshtayoli.

¹² Ahamba efika emisa eKhiriyathi Jeyarimu kulakaJuda. Ngiko-ke lelive lelingasenshonalanga kweKhiriyathi Yeyarimu libitwa ngekutsi yiMahane Dani, kuze kube ngulamuhla.

¹³ Besuka lapho bashuca baze befika eveni letintsaba kulaka-Efrayimu, bafikela kaMikha.

¹⁴ Lamadvodza lasihlanu labetewuhlola lelive laseLayishi akhuluma kulabomnakabo atsi: “Niyati nje kutsi kulenye yaletindlu kunesidziya semphristi kanye nabonkulunkulu bemindeni, nesitfombe lesibatiwe, nesithico lesibunjiwe? Nine-ke seniyati kutsi nitakwentani.”

¹⁵ Ngako base bayaphambukela, bangena endlini yalensizwa yemLevi leyayisekhaya kaMikha, bafike bayibingelela.

¹⁶ Lamabutfo akaDani labengema-600 labehlome aphelele, ema ngasekungeneni kwelisango.

¹⁷ Lamadvodza lasihlanu labetewuhlola lelive angena ngekhatsi, afike atsatsa lesitfombe lesibatiwe, nalesidziya sebaphristi, nalabonkulunkulu bemindeni kanye nalesithico lesibunjiwe. Lomphristi yena bekasolo emile nalamabutfo langema-600 lapha ngasekungeneni kwelisango.

¹⁸ Kwatsi ngalesikhatsi lamadvodza angena lapha kaMikha, atsatsa lesitfombe lesibatiwe, nalesidziya sebaphristi, nalabonkulunkulu bemindeni kanye nalesithico lesibunjiwe, lomphristi wawabuta watsi: “Nentani?”

¹⁹ Bamphendvula batsi: “Thula! Ungakhulumi lutfo. Buya lapha kitsi utewuba ngubabe wetfu nemphristi wetfu. Akuncono yini kuwe kutsi utewukhonta sive lesilusendvo lwesive sema-Israyeli ube ngumphristi, kunekutsi ukhonte likhaya lendvodza yinye?”

²⁰ Ngako lomphristi wase uyajabula. Watsatsa lesidziya sakhe, nalabonkulunkulu bemindeni nalesitfombe lesibatiwe, wahamba nalesive sakaDani.

²¹ Besuka lapho babeka bantfwababo embili netifuyo tabo, nemitfwalo yabo yonkhe, bajika bahamba.

²² Batsi sebahambe indzawo lendze kusuka kaMikha, emadvodza labomakhelwane baMikha abitwa, esukela bakaDani abacosha aze abakhandza.

²³ Njengobe bebahambe babamemeta laba bakaDani bagucuka bakhuluma kuMikha, batsi: “Kwenteke njani? Ubabutseleni labantfu kutsi nitesihlasela?”

²⁴ Mikha wabaphendvula, watsi: “Nitsetse bonkulunkulu lengatentela bona, nemphristi wami nahamba naye. Ngisasele nani-ke? Ningangibuta kanjani nitsi: ‘Kwenteke njani?’ ”

²⁵ BakaDani baphendvula batsi: “Ungaphindzilitani natsi, funa kusuke emadvodza lanenhlitiyo lencane akuhlasele, wena kanye nemndeni wakho wonkhe nife.”

²⁶ Ngako bakaDani besuka bachubeka nendlela yabo; njengobe Mikha wavele watibonela kutsi lamadvodza anemandla kunaye, wancandzeka wabuyela ekhaya.

²⁷ Ngako bavele batsatsa loko lokwakubunjwe nguMikha kanye nemphristi wakhe, baya naye eLayishi. Bafike bahlasela sive lesinekuthula nalesingasoli lutfo, basigwaza ngetinkemba, bashisa nelidolobha laso.

²⁸ Kute namunye labengaselekelela lesive, ngobe sasihlala khashane kakhulu nebaseSidoni, singenabudlelwane namuntfu. Lelidolobha laso lalisesigodzini lesasiseceleni kweBhethi Rehobu. BakaDani baphindza balakha kabusha lelidolobha, bahlala kulo.

²⁹ Baletsa libito batsi yiDani, baletsa ngeyisemkhulu labenguDani, umsa wa-Israyeli. Noko ngaphambili lelidolobha lalatiwa ngekutsi yiLayishi.

³⁰ Ngulapho-ke lapho bakaDani bafike batimisela khona letithico tabo. BoJonathani, umsa waGeshomu, labetalwa nguMosi, kanye nemadvodzana akhe babebaphristi besive sakaDani, kwaze kwaba sikhatsi sekutfunjwa kwelive.

³¹ Bachubeka kusebentisa lesithico lesasentiwe nguMikha ngaso sonkhe leso sikhatsi indlu yaNkulunkulu iseseShilo.