Tikhulu 17 - Siswati 1996 Bible

Tithico taMikha

¹ Kwakukhona indvodza lekwakutsiwa nguMikha, libito layo; yayiyaseveni letintsaba kulaka-Efrayimu,

² yakhuluma kunina yatsi: “Lesiliva lengemakhilogremu langaba li-13 leyayitsatfwe kuwe, lengakuva ukhipha ticalekiso ngayo, ngimi lowayitsatsa, ilapha kimi.” Unina wakhuluma kuyo, watsi: “Simakadze akakubusise, ndvodzana yami.”

³ Lendvodza yatsi nayibuyisela lesiliva lengemakhilogremu labengaba li-13 kunina, yena watsi: “Ngicinisile lesiliva ngiyehlukanisela Simakadze ngenca yendvodzana yami, kuze kutekwentiwa sitfombe lesibatiwe nesithico lesibunjiwe. Ngitayibuyisela kuwe.”

⁴ Ngako lendvodza yayibuyisela lesiliva kunina, unina watsatsa emakhilogremu langaba mabili nesigamu esiliva wawaniketela kumbumbi wetinsimbi, lowabumba wenta ngayo sitfombe nesithico. Kwatsatfwa, kwafakwa endlini kaMikha.

⁵ Lendvodza lenguMikha beyinendumba, ngako yenta sidziya sebaphristi, yabumba tithico, yase ibeka lomunye wemadvodzana ayo kutsi abe ngumphristi wayo.

⁶ Ngaleto tikhatsi sive sema-Israyeli sasingenayo inkhosi, wonkhe umuntfu abetentela lakubona loko kukuhle emehlweni akhe.

⁷ Lenye insizwa yemndeni wakaLevi leyayiphuma eBhetlehema kulakaJuda, beyikadze ihlala nelusendvo lwakaJuda,

⁸ yesuka kulelo dolobha yahamba yayawufuna lenye indzawo yekuhlala. Yatsi isahamba indlela yayo, yefika ekhaya lakaMikha, eveni letintsaba kulaka-Efrayimu.

⁹ Mikha wayibuta watsi: “Ulichamukisaphi?” Lensizwa yaphendvula yatsi: “NgingumLevi waseBhetlehema kulakaJuda. Ngifuna indzawo yekuhlala.”

¹⁰ Mikha watsi kuyo: “Hlala lapha kami, utawuba ngubabe kimi nemphristi wami, ngitakunika isiliva lengemagremu langaba li-110 ngemnyaka, ngikunike nekwekwembatsa kwakho nekudla kwakho.”

¹¹ Ngako lomLevi wavuma kuhlala kalendvodza; lensizwa yaba njengalenye yemadvodzana ayo lendvodza.

¹² Ngako Mikha wase ugcoba lensizwa lengumLevi, yase iba ngumphristi wakhe, yahlala ekhaya kakhe.

¹³ Mikha wakhuluma yedvwa watsi: “Manje sengiyati kutsi Simakadze utaba nemusa kimi, njengobe lomLevi asangumphristi wami nje.”