Tikhulu 15 - Siswati 1996 Bible

Kutiphindzisela kwaSamsoni kumaFilisti

¹ Kwatsi ngalelinye lilanga Samsoni wahamba wayawuvakashela umkakhe, waya ngesikhatsi kuvunwa kolo amphatsele lizinyane lembuti, wafike wakhuluma watsi: “Ngifuna kuyawungena endlini yemkami.” Kodvwa uyisetala wamalela kutsi angene.

² Uyisetala wakhuluma kuye, watsi: “Mine bengicabanga kutsi vele sewumalile, ngako ngase ngimendzisela lomunye walamajaha bewuhleti nawo. Lomlamu wakho lomncane akamengci yini ngebuhle? Tsatsa yena esikhundleni semkakho.”

³ Samsoni wakhuluma kubo, watsi: “Manje angisenacala lekuhlasela emaFilisti, ngiwalimate.”

⁴ Ngako wesuka lapho wayawubamba timphungutja letingema-300, watikhunganisa ngemisila, atikhunga ngatimbili, atifulatselanisa, wase ubophela tidlwane kulamafindvo.

⁵ Wase ulumeka letidlwane ngemlilo, wayekela letimphungutja, tatsi bhibi emasimini akolo labesomile emaFilisti. Ngaleyo ndlela kwasha onkhe emabibi akolo labese avuniwe nalowo kolo labesesemasimini kanye nemasimi emagelebisi newetihlahla temincumo, kwasha kwangconga.

⁶ EmaFilisti atsi nakabuta, atsi: “Ngubani lona lowente loku?” atjelwa kutsi: “NguSamsoni, umkhwenyane waseThimna, ngobe umfati wakhe wendziselwa umngani wakhe.” Ngako emaFilisti esuka ayawushisa lomfati kanye nayo yonkhe indlu yeyise, bafa baphela.

⁷ Samsoni wakhuluma kubo, watsi: “Njengobe senente nje, ngingeke ngisaniyekela, ngiyawuze ngitiphindziselele, ngenele kini.”

⁸ Wabahlasela ngelulaka lolumatima, wagwaza labanyenti babo. Wase uyehla wayawuhlala emgedzeni welidvwala lelalise-Etamu.

Samsoni uncoba emaFilisti

⁹ EmaFilisti akhuphuka ayawumisa kulakaJuda, agcwala aze efika ngaseLehi.

¹⁰ Emadvodza akaJuda abuta atsi: “Yini indzaba nitekulwa natsi?” Bawaphendvula batsi: “Sitewubamba Samsoni, simbophe. Sitakwenta kuye njengobe naye entile kitsi.”

¹¹ Ngako kwaphuma emadvodza akaJuda lati-3 000, ehlela kulomgedze welidvwala lase-Etamu, akhuluma kuSamsoni atsi: “Awuboni yini kutsi tsine siphetfwe ngemaFilisti? Yini lena loyente kitsi?” Wawaphendvula lamadvodza watsi: “Mine ngimane nje ngenta loko kubo nabo labakwente kimi.”

¹² Akhuluma kuSamsoni atsi: “Sitele kutakukubopha bese sikuniketela kumaFilisti.” Samsoni watsi: “Fungani kimi kutsi ningeke ningibulale nine lucobo.”

¹³ Atsi: “Siyavuma, tsine sitakubopha nje kuphela, bese sikuniketela kumaFilisti. Tsine ngeke size sikubulale.” Ngako Samsoni ambopha ngetindophi letimbili letinsha sha, amkhipha kulelidvwala.

¹⁴ Kwatsi asasondzela eLehi, emaFilisti eta kuSamsoni amemeta. Moya waSimakadze wehlela kuye ngemandla, kwatsi letindophi letatisetandleni takhe, tafanana netintsambo letishiswa ngumlilo, tibopho tadzilika etandleni takhe.

¹⁵ Wabona litsambo lemhlatsi wembongolo, walicukula, wahesha ngalo emadvodza layinkhulungwane.

¹⁶ Samsoni watsi: “Ngemhlatsi wembongolo ngibente timbongolo. Ngemhlatsi wembongolo ngibulele emadvodza layinkhulungwane.”

¹⁷ Watsi kube acedze kusho njalo, walahla lomhlatsi wembongolo phansi; leyo ndzawo yetsiwa libito kwatsiwa yiRamathi Lehi.

¹⁸ Ngenca yekutsi abese ome kakhulu, wakhala kuSimakadze watsi: “Unike inceku yakho lokuncoba lokukhulu kangaka, manje sengingafa nje ngibulawe koma, ngifele esandleni salabangasoki?”

¹⁹ Ngako Simakadze wavula indzawo lenemhholo eLehi, kwachamuka emanti kuyo, Samsoni wanatsa kuyo, emandla akhe abuya, wavuseleleka. Ngako lowo mtfombo, wetsiwa libito kwatsiwa yi-Eni Hakhore; nalamuhla loku usesekhona lapho eLehi.

²⁰ Samsoni wahola sive sema-Israyeli iminyaka lengema-20 ngetikhatsi temaFilisti.